1 Jisasi'a ana kumara netreno kuma'arega ege'za, amage'ma nentaza disaipol naga'mo'za avariri'za e'naze. 2 Mni fruhu knama (Sabat) egeno'a agafa huno osi mono nompi rempi huzamigeno, rama'a vahe'mo'za antahizamo'za, antri hu'za zmagogogu nehu'za anage hu'naze, igati amanahu antahintahia erine? Iza amanahu knare antahintahizana ami'ne, nankna huno kagu'vazana eri fore nehie? 3 Ama kapenta ne' Maria mofavrefi? Jemisi'ma Josefi'ma Judasima Saimonikizmi nempu'zimi mani'ne. Hanki asarahe'za tagrane mani'nazafi? Anage nehu'za ha' arente'naze. 4 Anante Jisasi'a anage huno zmasami'ne, kasnampa ne'mofona mika vahe'mo'za antahi amiza, ra agi'a amigahazanagi, kuma'are vahe'mo'za antahi nomizageno, naga'amo'zane, noma'afi vahe'mozanena antahi omi'naze. 5 Anampina mago'a kaguvazana Agra eri fore osu'neanagi, mago mago kri vahete azanteno zmazeri so'e huzmantetere hu'ne. 6 Hanki zamentintima osaza'zankura Jisasi'a antahintahi hakare nehuno, mago'a kuma tamimpi vano huno, Agra rempi huzami'ne.

7 Jisasi'a 12fu'a amage nentaza disaipol naga zamagi hige'za ageno, tare tare huno hunezmanteno, agru osu havi avamu humazmante hihamu zami'ne. 8 Agra amana hugahaze huno zmasamine, nevanutma bretine kutmine, zagonena erinetma oviho, azompage eritma viho. 9  Tamaga ano vazigahazanagi, tare kukena hutma oviho. 10  Ina nonte'ma vanutma, ana nompinke maninetma ana kumara atretma viho. 11  Mago kumate nevanage'za oramavrege, naneketimi ontahisagetma zamatreta nevuta, tmagareti kugusopa ru popo hunetretma vinke'za, anazama hanaza zamo'a hazenkefi mani'naze huno zmaveri hino. 12 Ana hige'za amage'ma nentaza disaipol naga'mo'za vu'za, zmagu'a rukrehe hanazegu, mono kea ome huama hu'za mika vahe zmasami'naze. 13 Zamagra rama'a havi avamura hunezmante'za, krima eri'naza vahe'mokizimi, masave tagi'za frenezmante'za, zmazeri kanamre'naze.

14 Hagi kini Heroti'a, Jisasi agi agenkemo'a ra higeno nentahigeno, mago'amo'za mono ti frezmante Joni frinefinti oti'negu kagu'vazana nehie hu'naze. 15 Hianagi mago'amo'za Ilaiaj'e hu'za nehazageno, mago'amo'za hu'za, agra korapa mani'naza kasnampa vahekna nere hu'naze. 16 Hagi mago'ane Heroti'ma nentahino'a anage hu'ne, Joni agenama akafrinoa ne'mo otino e'negahie! Hu'ne. 17 Na'ankure nefu, Filipi nenaro Herotiasi, Herotima rehanare'nea agenke Jonima huama hu'neazanku, Heroti'a huzmantege'za Jonina ome azeri'za kina nompi ome ante'naze. 18 Na'ankure Joni'a hanavetino ke huvava huno Herotina asamino, negafu a'ma rehanarenka a'ma erinanana kasege rufutaginka knare avu'avara osu'nane. 19 Ana higeno Herodiasi'a Jonina rimpa ahenteno ahe frinaku hu'ne. Hianagi ahe ofri'ne. 20 Na'ankure Heroti'a Joninku koro nehuno, kegva krintene. Na'ankure agra antahino keno hu'ne. Joni'a fatgo huno ruotage hu'nea nere. Joni agenke nentahino agogogu hu'neanagi, Jonima hania kema antahinakura muse hu'ne.

21 Mago kankamu eforema hu'neana, Herotima kasente'nea kna fore higeno, muse huno kasente'nea ne'za nenaku atru nehzageno, agri nompima eri'zama e'neriza vahe'ene sondia vahe'mokizimi ugagota kva vahe'ene, Heroti'a ne'zana ne'ne. 22 Herodiasi mofamo efreno avoma eme hageazamo Heroti'ne ne'za neku zmagima hu'nea vahera zmazeri muse higeno, Heroti'a ana mofa asmino, na'ankuro kve'ma siniazankuma nantahi kesnankena, amane kamigahue hu'ne. 23 Heroti'a huvempa huno ana mofara asamino, na'ankuro kavesinesia zanku'ma nantahi kesnankena, amane kegvama kri'noa kumara amu'nompintira refko hu'na kamigahue. 24 Anage higeno ana mofa'mo atiramino vuno, nererankura na'ane hu'na ome antahigegahue? Higeno nerera'a anage hu'ne, mono ti frezmante Joni agenope hunka ome huo huno asamigeno, 25 ana mofa'mo ame huno Herotinte vuno, menitfa mono ti frezmante Joni agenopa rukafrinka zompafi antenka erinka eme namisane huno higeno, 26 Kini ne'mo nentahino Joninku tusiza huno asuragi ante'neanagi, hanave huvempa kema mofa'ama agrane mani'naza vahe zamufi hunte'nea kegu nentahino, i'ora osu'ne. 27 Hagi kini ne'mo'a ame huno agenama ome akafri vahe huntegeno kina nompi vuno, Joni agena ome akafrine. 28 Ana ne'mo agenopa'a zompafi erino vuno, ana mofa ome ami'geno, ana mofamo erino vuno nererana ome ami'ne. 29 Hagi Joni amage'ma nentaza disaipol nagamo'za ana kema nentahi'za, avufa'a eri'za havegampi ome asente'naze.

30 Anante Jisasi aposol nagamo'za, ehanatiza miko'zama nehu'za, rempima hu'zaminaza nanekea eme asami'naze. 31 Jisasi'a anage huno zmasamine, Nagrane enketa vahe omanitega onsia umanikasa hamneno, (na'ankure vahe'mo'za vute'ete hazageno, ne'za nesaza knazimi omanenegure.) 32 Zamagraku vahe omani kaziga vunaku ventefi mareri'za vu'naze. 33 Hianagi zahufama nevazageno, hakare veamo'za e'irega vazanki hu'za nentahi'za, mopafi rugagi'za miko kumapinti veamo'za kote'za anama umanisare, ko umani'naze. 34 Jisasi'ma anante uhanitino ventefinti takaureno, tusi'a vea kevu nezmageno asunku huzmante'ne. Na'ankure zmagra kvazimi omani sipisipigna hu'nazageno agafa huno hakare kea rempi huzami'ne.

35 Kinaga nesegeno, amage'ma nentaza disaipol naga'mo'za Jisasinte e'za anage hu'naze, vahe omani ka'ma kopi mani'nonkeno hago kinaga nesegu, 36 huzmantege'za hozafi kiza mani'naza kumapine, kuma tamimpi vu'za ne'zama nesazazana ome miza seho hu'naze. 37 Hianagi Jisasi'a anage huno zmasami'ne, Tamagratmi ne'zana zaminke'za neho, hige'za zamagra anage hu'naze, mago kafufi eriza erina miza eriga mizanteti nezana mizaseta zamigara hu'ne hu'za asami'naze? 38 Agra anage huno zmasami'ne, nama'a breti eri'nazafi ome keho? Huno hige'za ome kete'za e'za 5fu'a bretigi, tare nozame me'ne hu'za hu'naze. 39 Anante Jisasi'a amage'ma nentaza disaipol naga'a huzmanteno, zafa asinage hu'nea apepate huzmantege'za omeri atru, eme eritru hu'za maniho huno huzmante'ne. 40 Maka vahe'mo'za fko hu'za mago'a kevufina 100ti'a vahe nemanizageno, mago'a kevufina 50ti'a nemanizageno hutere hu'naze. 41 Mani'nageno 5fu'a bretine, tare noza'ene erino kesga huno monafi negeno, Anumzamofontega susu huteno, eri korino amage'ma nentaza disaipol naga'a veva hnazegu nezamino, nozamea anazanke huno refko huno zami'ne. 42 Ana maka'mo'za nazageno zamu hu'ne. 43 Nene'zama atraza bretine, noza enena zogi'za, 12fu'a eka eka kupi erivite'naze. 44 Bretima ne'nazana 5tauseni'a venenemo'za ne'naze.

45 Jisasi'a ame huno amage nentaza disaipol naga'a ventifi vugote'za kantu Betsaida kaziga vihogu hunezmantage'za nevageno, vahetaminkura viho huno huzmante'ne. 46 Viho huno huso'e huzmanteteno, agonarega nunamu hunaku vu'ne. 47 Kinagama segeno'a ventemo'a timofo amunompi nevigeno, Agrake moparera manine. 48 Jisasi'a nezmagegeno, tusi maraguzatiza azotanu tina vakakiza vu'naze, na'ankure zahomo tusiza huno eme zmaretunefege'za, mraguzatiza nevazageno ko'ma atu masa hu'za nehigeno, Jisasi'a timofo avozare eno zmagatere'za nehige'za, 49 zamagrama timofo agofetu nevigeza nege'za, zmagesama antahizana hankrore nehu'za zamagogo hu'za krafa hu'naze. 50 Na'ankure makamo'za nege'za zmagogogu hu'naze. Hianagi hantaka huno anage huno zmasami'ne, Nagragi oti hanavenetita, korora osiho. 51 Anage huteno mani'naza ventifi marerigeno, zaho'mo amane nehigeno tusiza hu'za antri hu'naze. 52 Na'ankure bretima tamanasino zami'nea zamofo agafa'a, ke so'e osazageno zmaguamo hanavetine.

53 Hanki kantu kaziga takahe'za Genesareti mopare uhanati'za, ventea kina rentete'za, 54 ventifinti atineramizageno'a, vahe'mo'za ame hu'za Jisasi'e hu'za ke'ama nehu'za, 55 zamaga re'za vu'za e'za hu'za, ana kazigama me'nea kuma tamimpinti kri vahetamina sesenku hu'za zmarente'za, Jisasi'a mani'ne haza kumate vu'naze. 56 Hagi ina osi kumatero rankumatero, hozafi kiza maninaza kumapino, Jisasima virega kri vahera zamavre'za maketi kumapi ome zmantene'za, knare tataresanketa zaza kena kamofo atupare azerigahuno huza antahinege'za, kukena'arema avakoma hazamo'za, kri zmimo'a vgarene.