1 Jisasi'a anante ana vea kevugu'ene, amage nentaza disaipol nagaku anage hu'ne. 2  Kasegere ugagota hu'naza vahe'ene, Farisi vahe'mo'za, Mosesi kasege kemofonte nemnize. 3  Ana hu'negu nankna ke'ma tmasmi'sazana, tamagesa antahi ankeretma, tmasmisazaza hiho. Hianagi zamagrama hanaza'zana osiho, na'ankure zamagrama rempima huzami'za zana amage' ante'za nosaze. 4  Zamagra kna'nentake huno erisaga huama'a amuho hu'nea zantmi anakiza vahe zmafunte nentaze. Hu'neanagi zmagra zmazana ante'za zmazankonutira retufe zmage'sa nontahize. 5  Ana mikazama nehzana vahe'mo'za zmagehogu zmagra ana nehaze. Na'ankure zamagra osi nunamu vogisifina mago'a mono kea kre vazite'za, zmazante'ene kokovite'ene anaki'za nofi arente arente zaza kukenare nehaze. 6  Hakare vahe atru hu'za ne'za nenafi kva vahe trate mni'zanku zamavenesi'za, osi mono nompi kva vahe trate mnisnaza zanku zme nesie. 7  Hagi vahe'mo'za maketi kumapima humusema hunezmante'za, rempi huzami vahere'ma hu'za hanaza'zanku zmenesie. 8  Hu'neanagi tamagrikura rempi huzami vahere hu'za osiho. Na'ankure Rempi hurami'nera Magoke mni'negetma, tamagra ana miko'a kogna mni'naze. 9  Hagi ama mopafina nenfa'e hunka mago'mofonkura osuo, na'ankure tamagrira Magoke Nfa'tmimo monafinka mani'ne. 10  Anazanke hutma kvatie hutma mago nekura osiho. Na'ankure magoke Kva tmia Kraisi mni'ne. 11  Ugagotama tmagri'pima hu'nesnimo'a, tmagri eri'za ne' manino. 12  Iza'o agra'ama ante marerisimofona, azeri anteramigahie, iza'o agra'ama anterami'simofona, azeri antesga hugahie.

13  Hu'neanagi kva hiho, kasegere ugagota hu'naza vahe'ene, Farisi vahe'mota, tamagi'ari hutma tavre vahe mni'naze. Mona kumapima vunaku haza vahera, tamagra kafa erigita ahenkani renezmantaze. Na'ankure tamagra tmia unofretma zmatrage'za ufrenaku'ma haza vahera unofraze. 14  [Kva hiho, kasegere ugagota hu'naza vahe'ene, Farisi vahera tamagi'ari hutma tavre vahe mni'naze. Na'ankure tamarga kento a'nemokizmi havige hunezmanteta nozimine, mafka zazimine rezmatga hutma kumzafa erivganereta, kefo zama nehaza zantami refitenaku za'za nunamu nehaze. E'i ana'ma nehzagu tusi'a kna erigahaze.* Amana isa'a [vs 14] koma krenaza avontafepina mago'a agaterenazageta krentenone.]

15  Kva hiho, kasere ugagota hu'naza vahe'ene, Farisi vahera, tamagiri hutma tavre vahe mni'naze. Mago'mo agu'a akarahe hinogura, tamagra mopafina vanohutma, hagerina taka nehaze. Anama hutma mago'ma nevretma, anamofona tamagra mni'naza avamena ageteretma tarezupa tevemofo mofavre azerinesaze. 16  Kva hiho, tamavu'suhu kva vahera, tamagra anage nehaze, iza'o ra mono nonte hunteno huvempa haniana, amne zane! Hianagi inamo'o ra mono nompima me'nea kolimofo agire'ma huvempa hanimo'a, agrama huvempama hunte'nea kere amage anteno. 17  Tamavu suhuno neginagi vahe mni'naze! Ina'nazamo tusi'a razana me'ne, koli mopi, hipi ra mono nomo'ma koliretima azeri ruotge hu'nea zamo'e? 18  Hianagi iza'o, kre sramnavu itamofonte hunteno, huvempa haniana amne'zane. Hianagi iza'o kre sramnavu itamofo agofetu me'nea ofare hunteno huvempama hanimo'a, huvempama hunte'nea ke'are amage anteno. 19  Tamusuhu vahe mni'naze! Ina'nazamo razana me'ne, ofamopi, kre sramnavu itamo ofa azeri ruotgera nehio? 20  E'ina hu'negu, iza'o kre sramnavu itamofonte huvempa hanimo'a, kre sramnavu itare me'neazanku'ene huvempa nehie. 21  Hagi iza'o ra mono nonte'ma huvempama himo'a, anampinkama nemnia Anumzante ene huvempa nehie. 22  Iza'o monamofonte huvempa hanimo'a Anumzamofo traku'ene, anantema nemnia Anumzanku huvempa nehie. 23  Kva hiho, kasegere ugagota hu'naza vahe'ene Farisi vahera, tamagi'ari hutma tavre vahe mni'naze. Na'ankure tamagra migufa'ene, nasene, zonkofea ofa nentaze. Hianagi kasegefima ugagota hu'neazana, fatgo avu'ava huzanki, asunkuzane, ke amage ante'zana tamagena hu'nemize. Hianagi ama zantmine, mago'azama nehzazane tamagena huomitma amne hugahaze. 24  Tamagra tamuvusuhu kva nagare, havigfa kuko antetma azeri netraze, hianagi kemoli afura asagahu nevazize.

25  Kva hiho, kasegere ugagota hu'naza vahe'ene, Farisi vahera, tamagi'ari hutma tavre vahe mni'naze. Na'ankure amega kapumofone, zompamofona tamagra azeri avusese nehaze. Hianagi zmagu'afina kumzafa'sezane zamagraguke huzamo avitene. 26  Tamavu asuhu Farisi vahekure, pusantera zompane kapumofona agu'afi sesehugeno, amega avufamo'a anahu kna huno avusese hino.

27  Kva hiho, kasegere ugagota hu'naza vahe'ene, Farisi vahera, tamagi'ari hutma tavre vahe mni'naze. Na'ankure tamagra efeke paseteti vahe kerire frentageno amega kerimo'a avusese huno knare'za hiakna nehaze, hianagi agu'afinka fri vahe'mokizmi zferinamo ene avusese osu'nea zantamimo avite'ne. 28  E'inahu kante amega'a vahe zamurera tamagra fatgo huta mni'none nehaze. Hianagi tmagu'afinka tavrema huzamo'ene tra ke amage osu'zamo avite'ne.

29  Kva hiho, kasegere ugagota hu'naza vahe'ene, Farisi vahera, tamagi'ari hutma tavre vahe mni'naze, na'ankure tamagra kasnampa vahe'mokizimi keri tro nehutma, fatgo vahe'mokizmi keri konariri hunentaze. 30  Ana nehutma amanage huta nehaze, Korapa tagehezane mni'nona sinifa, tagra anampina ufreta, zmagra'nena kasnampa vahe korana eri megira otro'sine nehaze. 31  Amanahu kema nehazana agafatmi hufore hutma, tagra kasnampa vahema zmahe fri'naza vahe'mokizmi zmagehete hutma nehaze. 32  Tamagra nermageho'zama hunaza'zana huvgareho. 33  Tamagra osifave, tamagra ha' osifavemofo mofavre zge. Inankna hutma tevefima vugahaze huno huramante'neana maniho hugahaze? 34  E'ina hu'negu keho, Nagra kasnampa vahe'ene, antahi'zane vahe'ma, kasegere ugagota hu'naza vahezga, huzmantoge'za neaze, mago'amokizimia, zmahetma hantigahaze, mago'amokizmia osi mono'nontamifi zmazeritma nofi knonu sefu nezamitma, ra kumate kumate zmazeri haviza hutma vano hugahaze. 35  Ana'ma hanageno'a mika fatgo vahe ama mopafi zmahageno tagirami'nea koramo'a, tmagrite egahie. Fatgo ne' Eboli koranteti agafa huno Berekaia nemofo Zekaraiama, tamagra ma ra mono none, kre sramanavu itamofo amu'nompima ahe fri'naza ne'mofo korante vugahie. 36  Nagra tamage hu'na neramasmue. Amana knafi vahe'motmage', ama ana knazana erigahaze.

37  Jerusale vahere, Jerusale vahere. Kasnampa vahe zamahenefritma, huzmantege'za tmagritega aza vahera have knonu zmahe'naze. Nama'a kna mofavre'zgatmia kokoremo anenta'a zga agekonanu zmazeri atru huno refite zmanteankna hunaku nehuanagi tamagria tamavenosie. 38  Keho, tamagri ra mono nomo'a, vahera omnigeno megusa avu'ava hie. 39  Na'ankure Nagra neramasmue, meninteti agafa hutma tamagra Nagrira onagetma maninetma anage hugahaze. Anumzamofo agifima e'nemofona asomu hunteno huta hugahaze.