1 Anante Farisi vahe'ene Satusi vahe'mo'za Jisasinte e'za, monafinti avame'za huraveri huo hu'za rehe'za ke'naze. 2 Hianagi Agra anage huno zamasami'ne, kinagamasegeno korimpe'nare kamupseko atigeta, okina zo'ego tugahie nehaze. 3  Hagi nanterama monare kamupse ko netigeta negetma, zaho ko atugahie nehazageno, zaho kora netie. Menina monare fore'ma hiazana refako hutma negazanagi, ama knafima fore'ma hiazana refako hutma nonkazo? 4  Ama knafi havi tamutma ene tamentinti netraza veamotma avame'zanku nantahi negazanagi, mago avame'za eri fore ha'nena onkegahzanki, kasnampa ne Jonama hu'nea avame'zanke kegahaze. (Jona 1:17–2:10)

5 Hianagi amage nentaza disaipol naga'amo'za tirumofo kantu kaziga ankenare unehanati'za, zmage'akani'za breti e'ori' e'naze. 6  Kvahiho Farisi vahe'ene Sadusi vahe'mokizmi yistigura huno Jisasi'a zmasmi'ne. 7 Anage hige'za, zamagra'zmi hugantu kma huza bretima e'orima onazanteku nehie hu'naze. 8 Jisasi antahino keno nehuno, Agra anage hu'ne, Kagra izago osi'a kamentinti nehnamoka! Amu'no tamifi bretima e'ori'naza zankura nahigeta ke hakare nehaze? 9  Tamagrira tamage'akninefi? 5efu'a bretima, 5 tauseni'a vahe'mo'za ne'nazageno, nama'a nege'atrege hu'nazama'a eka eka kupina erivite'naze? 10  Hifi 7ni'a bretiretima 4 tauseni'a veamo'za nene'za zamu'ma hiama'a, eka eka kutamimpima eriri avite'nazana tamagra antahi'nazo? 11  Inankna huta keta antahita nosaze, Nagra bretigura nosue? Hianagi Farisi vahe'ene Sadusi vahe'mokizmi zistigura kva hiho. 12 Anante zmagesa antahi ama nehu'za, bretifi nentageno zonerea zistigu kva hiho nosie. Hianagi Farisine Sadusi vahe'mo'za rempima hunemiza zanku kva hiho nehie.

13 Ananteti Jisasi'ma eno Sisaria Filipai kumate enehnatino, anage huno amage'ma nentaza disaipol naga zmasmi'ne, iza'e hu'za Vahe'mofo mofavregura nehaze? 14 Zamagra ana kenona anage hu'za asmi'naze, mago'amo'za mono ti frezmante Joni'e nehaze, ruga'amo'za Ilaija'e nehaze, mago'amoza Jeremaiapi nehzageno, mago'amo'za kasnampa nere hu'za nehaze. 15 Jisasi'a amanage huno zmantahige'ne, hu'neanagi tamagra iza'e, huta Nagrikura nehaze? 16 Saimoni Pita'a kenona'a anage hu'ne, kagra Kraisige, ksefa huno mni'nea Anumzamofo mofavre mni'nane. 17 Jisasi'a anage huno asmi'ne, Saimoniga, Jona nemofoga, asomu hugantesie. Na'ankure vahe'mo amazana erigaveri nosie. Hu'neanagi Nenfa monafi mni'nemo erigaveri nehie. 18  Nagra anage hu'na negasmue, kagra Pitage, hanki'na ama ana havere, mono noni'a ki'nugeno, fri'zamofo hanavemo'a azeri agete'oregahie. 19  Nagra mona kumapi kinofitmina kamigahue. Kagrama ama mopafi na'ano anakisanana, monafina anakigahie. Na'ano mopafi'ma atresana zana, monafina atregahie. 20 Anante amage nentaza disaipol naga'agu, Kraisi'e hutma vahera ozmasmiho huno zmasmi'ne.

21 Ana knareti'ma e'neana, Jisasi'a amage nentaza disaipol naga'a agafa huno zmasamino, Agrama Jerusale vanige'za, mono kva (elda) vahe'mo'zane, ugagota prisi vahe'mo'zane, kasegere ugota hu'naza vahe'mo'za, rama'a zampi azeri haviza nehu'za ahe frisageno tagufa knarera otigahie, huno zmasami'ne. 22 Pita'a, Jisasi avare rure anteno, agafa huno anage huno kesu'ne, O'e Ranimoke! E'ina hu'zana Anumzamo'a atresigeno, Kagritera forera osugahie! 23 Hianagi Jisasi'a rukrahe huno Pitankura anage hu'ne, maniganenka namefi evuo Sataga! Nagri kana rehiza nehane, na'ankure kagra Anumzamofo antahintahi e'norine, vahe'mofo antahi'za e'nerine.

24 Anante Jisasi'a amage nentaza disaipol naga'agu zmasamino, mago vahemo Nagri namage antenaku hanuno'a, agra'a avesizana, atreteno rugeka zafa'a erino namage eno. 25  Na'ankure asimu'a eriso'e hunakure hanimo'a, asimu'a atregahie. Hianagi iza'o Nagriku huno asimu'a atresimo'a asimu'a erigahie. 26  Mago'mo mika mopafiza eri tru nehuno, agra'a agu amema atre'siana, na'a azahu'za erigahie? Hifi agu amemofo nona huno na'a amigahie? 27  Vahe'mofo mofavremo ankero tmima'ane, Nfa'amofo hanavefi esuno'a, Agra magoke magoke'moma hu'nenia avu'avate anteno mizana amigahie. 28  Nagra tamage hu'na neramasmue, meni ama otitma mni'nafintira mago'amota ofri'mni'netma negesageno Vahe'mofo mofavremo'a kini manino egahie.