1 Anante mago'a Farisi vahe'ene kasegere ugagota hu'naza vahe'mo'za Jerusaleti, Jisasinte e'za anage hu'za asmi'naze. 2 Na'a hige'za kamage nentaza disaipol nagamo'za tagehe'i avu'ava zana ruhanentagize? Na'ankure zmazana sese osu ne'zana ne'naze. 3 Jisasi'a ana ke nona'a, amanage huno zmasmi'ne, nahigeta tamagra tamagehe'i avu'ava avriri zankuke nehutma, Anumzamofo kasegea rufunetagize? 4  Na'ankure, Anumzamo'a anage hu'ne, Negfane, negrera ke amage antenka agi erisaga huo, iza'o nererane, nefane huhaviza huntesimofona ahe friho hu'ne. 5  Hianagi tamagra anage nehaze, iza'o nererano nefanku huno, kzahu'za ante'noa zana Anumzamofo ami'none haniana, 6  agra nererano nefana antahi omino amagera nonte. Hagi anama nehutma Anumzamofo kea, nermageho avu'avakuke nehutma retufe netraze. 7  Tamagra tavre vahere, Aisaia'ma kasnampa kema hunte'neana tmagriku tamage hu'ne, 8  Ama vahe'mo'za amega zmagiteti Nagia erisaga nehaze. Hianagi nagritetira zamagu'amo'a afete'are me'ne 9  Hianagi nena'a omne mono hunenante'za, rempima hazana vahe'mofo keage nehaze. (Aisa 29:13)

10 Jisasi'a vahe kevu kehutru huteno anage hu'ne, Antahi ankeretma antahi ama hiho. 11  Vahe'mo'za zmagipima nazazamo'a zmazeri haviza nosie. Hianagi agipinti'ma atiramia zamo zmagu'a zmazeri haviza nehie. 12 Anante amage nentaza disaipol nagamo'za e'za, anage hu'za asmi'naze, Farisi vahe'mo'za kema hana antahite'za zmarimpama ahegante'nazana Kagra antahi'nano? 13 Hianagi Jisasi'a ke nona'a amanage huno zmasmi'ne, maka'zama Nagri Nenfama onkri'neana, mika zanefi tregahie. 14  Zmatrenke'za, zamu suhu kva vahe'mo'za, zamusuhu vahera kana zameri'za viho. Na'ankure zamavu suhu vahe'mo'za, zamavu suhu vahera kana zmeri'za vnazana, taregamoke kerifi uramigaha'e. 15 Pita'a amanage huno hu'ne, ana fronka kemofo agafa'a eriama hugeta antahi maneno higeno, 16 Jisasi'a amanage huno hu'ne, tamagranena antahi so'e osu'neta nehazafi? 17  Tamagipima nageno tamarimpafi uneramigeta arifama neraza'zana ontahi'nazo? 18  Hianagi agipinti atiramia zamo'a agu'afinti neankino azeri haviza nehie. 19  Na'ankure agu'afinti havi antahintahizane, vahe ahe fri'zane, monko'zane, arave osu'neno monko'za hu'zane, kumzafa sezane, havigegu eri tamage hu'zama, knare vahe'mofo huhaviza hunte'zana ne-e. 20  Ama'na zantamimo vahera zmazeri haviza nehie. Hianagi azama sese osu'neno ne'za nezamo'a, vahera azeri havizana nosie.

21 Jisasi ana kumara atreno, Taiane Saito kaziga kumate vigeno, 22 mago Kenaniti a'mo eno ranke huno kezatino, kasunku hunanto Ramoka, Deviti nemofoga, mofanimofona havi hankro'mo agu'afi fre'negeno tusi haviza hu'ne. 23 Hianagi Jisasi ana a'mofo kenona osu'ne. Agri amage nentaza disaipol nagamo'za e'za anage hu'za asmi'naze. Muse hugantonanki huntegeno vino, na'ankure agra tusi kereso nehianki huntegeno vino. 24 Hianagi Agra amanage huno kea hu'ne, Nagri'ma hunante'neana Israel vahe'ma fnane hu'naza sipisipiguke huno hunante'ne. 25 Hianagi ana a'mo eno avuga kepri huno amanage hu'ne, Ramoka Kagra naza huo! 26 Higeno Agra ana ke nona anage hu'ne, Mofavre bretima eri'na matevu'na kra ramimofo ami'zamo'a knarera osu'ne. 27 Hu'neanagi ana a'mo anage hu'ne, izo Ramoka, hianagi ana kramoza rama'amofo itareti ankra heramiama'a nenaze. 28 Anante Jisasi ana a'ku anage huno asmi'ne, A'moka, Kagri kmentintimo'a ra krefahie, kagrima kavesinia kante anazana fore hugahie. Higeno, ame huno ana mofa'amofo krimo'a atrente'ne.

29 Ana kuma atreno Jisasi'a Galili tinkenarega vuno, agonarega umrerino anantega umani'ne. 30 Rama'a vahe'mo'za anantega Agrite ne'eza, zmagia zmaza sti'nea vahe'ene, zmagia haviza hu'nea vahe'ene, zmu suhu'nea vahe'ene, zmaza haviza hu'nea vahe'ene, zmagefuna atupa hu'nea vahe'ene, mago'a ruga'a vahe'ene zmare'za Jisasi agafi eme zmantageno zmazeri so'e hu'ne. 31 Tusi'a zmanogu nehu'za antri hu'naze. Kageno agefuna atupahu vahe'mo ke nehigeno zmaza haviza hu'nea vahe'mo'za knare nehzageno agia havizahu vahe'mo otino nevigeno, zamavu asuhu vahe'mo'za zmavua negage'za, Israeli vahe'mokizmi Anumzamofo agi zmagra hesga hu'naze.

32 Jisasi'a amage nentaza disaipol naga'a ke huno anage huno zmasmi'ne, Nagra ama vahe taminkura nasunku huzmantoe, na'ankure zmagra tgufa kna Nagranena mni'nageno nezama nesazazana omne'ne. Nagra huzmantesugeno zmaga ene vuzankura navenosie. Na'ankure kantega nevu'za zamavu evu evu hanige'za traka ome hugahaze. 33 Amage'ma nentaza disaipol nagamo'za anage hu'za Agriku hu'naze, inantegati rama'a bretia erita ama tusi vahe krerfa zmisunke'za, ama vahe omni kokampina erignare hugahaze? 34 Jisasi'a anage huno zmasmi'ne, nama'a breti tamagra eri'naze? Hige'za zmagra anage hu'naze, 7ni'a bretigi, mago'a osi nozame. 35 Vea kevu huzmantege'za mopafi mni'naze. 36 Manitageno ana 7ni'a bretine noza'ene erino Anumza'mofo susu hunteteno, tmanasino amage nentaza disaipol naga'a zmige'za eri'za ana vea kevu zmi'naze. 37 Ana hige'za maka vahe'mo'za ana neza nazageno zmu hutege'za, atrazama'a eri atru hu'za 7ni'a ekaeka ku eri avite'naze. 38 Hagi ana nezama ne'nazana 4tauseni'a vene'nenazamo'za ne'naze, anampina a'nene, mofavre'ramina ohampri'naze. 39 Hagi ananteti Jisasi'a, ana tusi'a vea kevu huzmantege'za nozimirega vu'za e'za nehzageno, botifi mrerino Magatania kaziga vu'ne.