1 Ana knareke Jisasi'a nompinti atreno vuno, tiru ankenare umani'ne. 2 Rama'a vahe'mo'za mni'nere umani korve hzageno, osi botifi mrerino umanige'za, rama'a vahe'mo'za tiru ankenare oti'naze. 3 Rama'a fronka kea anage huno zmasmi'ne. Antahiho hoza kri ne'mo'a avimza krinaku vu'ne. 4  Ana'ma huno avimzama negrigeno'a, mago'a avimzamo'a ka ankinafi evuramigeno, nma zgamo eno eme ne'ne. 5  Mago'a avimzamo'a havege huno osi'a mopa me'nefi evurami'ne. Na'ankure osi'a mopa me'negeno, ame huno hageno mrerine. 6  Hianagi zgemo hanatino mrerino temagi atre'ne, na'ankure rafu'namo krakaka kigeno, zgemo te osapare'ne. 7  Hagi mago'amo ave'ave trazampi evurmigeno, ana ave'ave trazamo hageno rentrako higeno haviza hu'ne. 8  Hu'neanagi mago'amo'a knare mopafi evurmino ne'za rente'ne. Mago'amo'a 100ti'a rentegeno, mago'amo'a 60ti'a rentegeno, mago'amo'a 30ti'a rente'ne. 9  Iza'o agesama me'neniana, ama kea antahise hino.

10 Agri'ma amage'ma nentaza disaipol nagamo'za Jisasinte e'za anage hu'za antahige'naze, nahigenka fronka kefintikera nezmasmi'ne? 11 Jisasi'a ke nona huno, Anumzamofo kumapi oku'a me'nea zantmina kehogu tamaveri nehie. Hianagi zamagrira zmeri nosie. 12  Iza'o mago'azama eri nenimofona, mago'ene ami'nigeno, agra eri avitegahie. Iza'o e'ori nenimofona, mago'a zama eri'neniana hanregahie. 13  Ama'na agafare, Nagra fronka kefintira nezmasmue. Na'ankure zamagra negazanagi keso'e osugahaze, antahigahazanagi antahi so'e hu'za amara osugahaze. 14  E'inama hu'naza'zamo'a kasnampa ne' Aisaia hu'nea nanekemo'a avufa'a fore nehuno anage hu'ne, Tamagra antahigahazanagi, amara osugahaze. Tamagra kegahazanagi, keanke oregahaze. 15  Na'ankure vahe'mokizmi zmarimpamo hanavetino anaki'ne. Higeno zmagesareti'ma kema antahizamo'a amuho hunezmantege'za zmua asu'nekiza, zmurgaretira zamua onke'za, zmagesa nontahiza, zamagu'aretira amara nosazankiza, zmagu'a rukrehera osnagena, Nagra zmaza osugahue. (Aisa 6:9-10)

16  Hianagi tamagra ketama antahitma hazazante Anumzamo asomu hunermante. Na'ankure tamavua negeta tamagesamo'a nentahie. 17  Tamage hu'na neramasmue, korapa rama'a kasnampa vahe'mo'zane, fatgo vahe'mo'za amama negaza'za kenaku hu'nazanagi onke'za, nentahizankea, antahinaku hu'nazagi ontahi'naze.

18  Antahiho, Avimza ase'nea fronka kemofo agu'agesa'a, ama'ne, 19  Mago'a vahe'mo'za Anumzamofo kumamofo knare naneke nentahi'za, antahi ama osaza nagamofona, Sata eno rimpafi me'nea ke emeri atre'ne. Amana hu'ne, kamofo ankinafi avimza kri'nea kna hu'ne. 20  Mago avimazamo have mopafi evurami'neana, amanahu kna vaheku hu'noe. Anumzamofo naneke nentahino, ame'ama huno muse hu'ne. 21  Ana hianagi rafu'na uorminegeno, osi'a knafi mni'negeno ana nanekemofonte rehe'za egeno'a, ana nanekea ame huno atreno traka nehie. 22  Hagi ave'ave trazampi evu rmi'nea avimazana anahu kna hu'ne, Anumzamofo kea antahiteno, ama mopafi afufenoku agesa nentahigeno, ana zamo avazu higeno Anumzamofo kemo'a nena rga'a reonte'ne. 23  Hianagi so'e mopafi kri'nea avimza avimo'a, amanahu vaheku hu'noe, naneke nentahino ana nanenkemofo agu'agesa'a ama nehuno, nena rga'a renteno mago'amo'a 100ti'a rentegeno, mago'amo 60ti'a rentegeno, mago'amo 30ti'a rente'ne.

24 Jisasi'a anage huno mago'ene fronka ke zmasmi'ne, Anumzamofo kumamo'a mago ne'mo hoza'afi knare avimza aseankna hu'ne. 25  Hianagi avimaza aseteno umasenegeno, ha' vahe'amo havi traza'mofo avi ana witi hozafi eme neseno vu'ne. 26  Hianagi witimo hageno rga ome renentegeno, havi trazamo enena hage ama hu'ne. 27  Nena nehigeno kazokzo eri'za vahe'amo'za e'za, hoza nefana antahige'za, ramoka kagra knare avimzanke hoza ka'afina kri'nampi? Inankna huno havi trazana hage'ne? hu'za antahige'naze. 28  Hoza nefa'a anage huno zmasmi'ne, Ha' vahetimo anara hu'ne! huno hige'za, kazokzo eri'za vahe'mo'za anage hu'za asmi'naze, knare tatresanketa ome zanegi atregahumpi? hu'za antahige'naze. 29  Hianagi hoza nefa'a anage huno zmasmi'ne, A'o tra'za zanefisafina witine zanefigahazanki atrenkeno me'neno. 30  Atrenkeno magoka tarega moke hage'ne hoza hamare knare uhnati'o, hozama hamareknare, hoza hamaresaza vahera nagra zamasmigahue. Kotazana havi traza zanegita nofi anakita tevefi kresigu eri atru hiho. Hianagi witi eri atru hutma nezama ante noni'afi eri antegahaze huno zmasami'ne.

31 Jisasi'a anage huno mago'ene fronka ke zmasmi'ne, Anumzamofo kumamo'a masteti zafa rgamofo avima'agna hu'neankino, vahe'mo erino hoza'afi negrie. 32  Mago'a zafa avigna osu'neanki onensa avima'a me'ne. Hianagi ana osi zafamo'a ra huno mago'a hozafima me'nea zantamina agteregeno zafa segeno, Nma'zgamo eno azankunate no emegino amu ante'ne. (Ezi 31:3-14)

33 Jisasi'a anage huno mago'ene fronka ke zmasmi'ne, mona kumamo'a amanahu hu'ne, mago'mo yisti erino witifi herafiteno kregeno ra hiankna hu'ne.

34 Jisasi'ma maka kema vea kevufi hu'neana fronka kege zamasmi'ne. Hagi Agra amate kea ozmasmi'ne. 35 Amanage huno kasnampa ke hu'nea kemofo avufa'a fore hu'ne, Nagra fronka kefintike kea hugahue. Nagra monane mopa fore osu'nereti'ma eno menima ama knare'ma e'neana, oku'a me'nea kea eri ama hugahue. (Sam-Zga 78:2)

36 Ana huteno ana vahe kevua, zmatreno nompi ufre'ne. Agri'ma amage'ma nentaza disaipol nagamo'za Agrite e'za, anage hu'za asmi'naze, hozafi hage'nea havi trazamofo agu'agesa'a tasmio. 37 Jisasi'a anage huno zmasmi'ne, knare avimza ase'nea nera, Vahe'mofo Mofavre. 38  Hagi hoza, ama mope, knare avimzana, Anumzamofo mofavrermine, havi trazana, Sata mofavreramine. 39  Hagi ha' vahe'mo havi traza kri'neana Sata'e. Hozama hamre kna, mopa vgare kne, hoza hamare vahera, ankero vahezge. 40  Havi traza eri tru hu'za tevereti kre'nazana anahu hu'ne, vgaresia knarera tevefi kregahie. 41  Ana knarera Vahe'mofo mofavremo'a ankero vahe'a huzmantesigeno, kumi'ma nehu'za vahe'mokizmia zmazeri kumipima nentaza vahera, Agra'a kumapintira zmazeri megi atregahie. 42  Zmazeri mate vnige'za amuho tevefi mni'ne'za zavira nete'za, zmavera ani kreki hugahaze. 43  Anama hanige'za fatgo vahe'mo'za nezmafa kumapina zgemo remsa hiankna hu'za manigahaze. Iza'o agesama me'nenigeno'a, ama naneke antahise hino. (Dan 12:3)

44  Mona kumamo'a, zgo'amo mreri'neaza hozafi frakiankna hu'negeno, mago'mo ome keno eri fore huteno, ete eri franekino, musezamo higeno viazamo miko zama'a zgore ome atre vgareteno, ana mopa ome mi'za hu'ne.

45  Mago'ene mona kumamo'a, feno ne'mo knare kintna me'negeno hakrea kna nehie. 46  Zgo'amo mreri'nea kintna mago hakeno eri fore'ma huteno'a, ete vuno miko zama'a mizante ome atreno zgo erino, ana kintna ome mizase'ne.

47  Mago'ene mona kumamo'a, noza kuko timpi atreno rama'a ruzahu ruzahu nozame azeriankna hu'ne. 48  Hagi avi'matetegeno'a avazu hu'za ksepampi atre'za, knare nozame eri'za zompafi ante'naze. Hianagi havi'za hu'nea nozame'a matevu atre'naze. 49  Anahu kna huno mona mopa vgare knarera ankeromo'za e'za fatgo vahe amu'nompinti ke ontahi vahera eme zmavare'za, 50  tevefi matevu'za zmatresigeno ana kumapina zavi nete'za, zmavera ani kreki hugahaze.

51  Tamagra maka kema huana antahi ama nehazafi? Kenona'a anage hu'za Jisasina asmi'naze, izo. 52 Jisasi'a anage huno zmasmi'ne, e'ina hu'negu miko kasegere ugagota hu'naza vahe'mo'za mona kumamofonku e'ina hugahaze hu'za hunezmasamiza vahe'mo'za, nomofo nafa'amo noma'afi ufreno korapa fenozane, ksefa fenozama'a erino atineramia kna nehie.

53 Ana fronka kea Jisasi'a zamasmi vgareteno, ana kuma atreno, 54 Agra kuma agafa'are Nazareti eno osi mono nompi eme rempi hunezmige'za, antri hu'za anage hu'naze, ama ne'mo'a knare antahi'zane, kaguvaza eriforehu hankavea igati erine? 55 Ama kapenta ne'mofo mofavrefi? Nererankura Maria'e nehazafi? Agnahe'za Jemsi ene Josefe ene Simioni ene Judasizafi? 56 Hagi asarahe'za tagrane omni'nazafi? Inaregati ama ne'mo'a maka'zana eri'ne. 57 Nehu'za antahi haviza hunentageno, Jisasi anage huno zmasmi'ne, kasnampa vahe'mofona Agri kumate vahe'mo'zane, maka naga amo'za ra agi nomize. 58  Ana hu'neankino rama'a kaguvazana amafina osugahie. Na'ankure zmagra zamentintia nosaze.