1 Ana knafina mono ti frezmante Joni'a, Judia kaziga ka'ma mopafi ne-eno Anumzamofo ke huama huno zamasmi'ne. 2 Kefozantamigu tmasunke huta tamagu'a rukrehe hiho, na'ankure mona kumamo'a hago tva'o nehie. 3 Na'ankure korapa ama'na kegu kasnampa ne' Aisaia Joninku anagea hu'ne, mago ageru'mo ka'ma mopafinti kezatino, Ramofo kana vri'nenteta, agri kana eri ante fatgo hiho hu'ne! (Aisa 40:3) 4 Joni'a kemori azokateti trohunte kena masi'neno, trazama nenaza afu'mofo akruteti amu'nofira nehuno, kenu'ene, afi' tumemofo rima'ane ne'ne. 5 Anante Jerusale kumate vahemo'zane, Judia kazigati ene, ana mika Jodani kzigati vahe'mo'zane mika eri hantage'za Joninte etere hazageno, 6 Joni'a Jodani timpi huama kumi'zmi hutere nehzageno, mono ti fre zamante'ne. 7 Hianagi agrama kege'za hakare'a Farisi vahe'ene, Sadusi vahe'ma mono ti frekure hu'za ageno, Joni'a anage huno zamasmi'ne, tamagra ha' osifavemofo mofavre nagare, aza tmasmino amuma ne-ea Anumzamofo rimpahe zampintira fregahaze. 8 Ana hu'nagu rga rentenkeno, tamagu'a rukrehe hunaze huno tamage'za sena, 9 hagi Abrahamu'a nerfakita, tagra knare hunone hutma osiho. Na'ankure nagrama tmagri'ma tmasmi'na, Anumzamo'a amne hanigeno ami havemo'a, Abrahamuna mofavre fore humigahie. 10 Meninena hago sasumemo'a mika zafa agafare kriri'neankino, hakare zafamo knare rgama reontesia zafa'rmina, antagino tevefi mate'vuno atregahie.

11 Nagra amne tinteti mono tina fre nermantoe, tmagu'a rukrahe hnazegu, hianagi Agra henkama ne-emo'a nagrira nagtereno hihamu'ane ne' egahie, higena nagra Agri aganona (sendol) erizafiga osu'noe. Ruotge Avamupine, tevenu'ene Agra mono tina fre tmante'gahie. 12 Witi ne'za eri atru hania kna hago atupa nehigeno, Agra vazihehehu azota azampi erino mani'ne. Hanki akru hre kuma eri hagro nehuno, anampinti nena'a zogirino erino nompi Agra ome nenteno, hona'a tevava tevefi krenkeno tegahie.

13 Anante Jisasi'a Galiliti atreno Joni mono ti frente'snie huno Jodani tinte e'ne. 14 Hianagi Joni'a tima Agri'ma frente'zankura i'o nehuno, Kagra, nagrira tina fre nantesankeno knarera hugahie, hianagi Kagra nagritega neano? 15 Hianagi Jisasi ke nona'a Jonina asmi'no, Menina amne fre nantegahane, na'ankure tagrati'a e'inama hanu'ana fatgo avu'avaza hugahue, higeno Joni'a Agri ke antahino, 16 mono tima frentegeno, Jisasi'a ana timpinti ame huno otino ankenarega mrerino ne-egeno, monamo hagro nehigeno, keana Anumzamofo Avamu'mo maho nma'gna huno akoheno eramino Jisasinte emani'ne. 17 Higeno, monafinkati mago ageru'mo huno, Ama'i Nagrama avesinento'a magoke Mofavre, hige'na Nagra tusi'a muse Agrira hunentoe.