1 Jisasi'ma Betrehem Judia kaziga mopare, Heroti'ma kini hu'nea knafi fore'ma hige'za, zge hanatitegati antahi'zane vahe'mo'za Jerusalem ehanati'za, anage hu'naze, 2 Jiu vahe'motma Kinima manisia nera inantega ksente'ne? Na'ankure tagra Agri ofuna zge hanati kazigati keteta, mono hunteku e'none. 3 Ama ana nanekema Heroti kini ne'mo nentahino'a, agu'agesamo kore'nehuno tarerare nehigeno, Jerusale kumate vahe'mo'zanena agrama hiaza hu'naze. 4 Heroti'ma pris vahe'zgane, kasegere'ma ugagota hu'naza vahe'ma magopi zamazeri atru huteno'a, inantega Mesaia'a fore hugahie? huno zamantahige'ne. 5 Zamagra, agri husmi'za, Judia kaziga Betrehe kumate ksentegahie, na'ankure korapa Anumzamofo kasnampa (profet) ke huama hu'nea ne'mo avon tafepi amanage huno krente'ne, 6  hagi kagra, Betrehemia, Juda vahe mopafina, kagra Juda vahe'mokizmi ranra kumapintira osasi kumatfana omni'nane, na'ankure kagripinti magora ra nera Israeli vahe ni'ama kegvama hania nera fore hugahie. (Mai 5:2)

7 Heroti'a frakino oku'a antahi'zane vahera zamagenoka huno nankna ana ofumo'a fore hu'ne huno zamantahige'ne. 8 Heroti'a Betrehem viho huno hunezmanteno, anage huno zamasmi'ne, Vutma ana Mofavrea ome haketa ketetma, Agri'ma kefore'ma hanutma eme nasminke'na, nagranena anazanke hu'na monora ome hunta'neno. 9 Ana nanekema kini ne'mo hige'za antahite'za, nevu'za ko'ma zge hanati kaziga mani'neza ke'naza ofumo kagota huzmanteno nevige'za keme nevzageno ana Mofavre mani'nea nomofo agofetu eme otige'za ke'naze. 10 Ana ofuma negageno'a tusi'a muse zamo zamagu'afina avite'ne. 11 Ana nompi emareri'za ana Mofavre'mo, nerera Maria'ene mani'nege'za nege'za, zamugosa regati kepri hu'za mono hunte'naze. Eri'zama vu'naza feno'zana anagi'za, musezama ami'nazana, golima, mananentake paurane (frankincense), mere'ne (myrrh) ami'naze. 12 Anumzamo'ma ava'nafi zamasmino Herotintera oviho hunoma hu'nea kea nentahiza, antahi'zane vahe'mo'za oti'za rugantegati mopa zamirega vu'naze.

13 Antahi'zane vahe'ma vzageno, Ra Anumzamofo ankeromo Josefena ava'nafi efore huno asmi'ne, Otio! Mofavrene, nerera'nena znavrenka Isipi frenka vuo, anantega umani'nege'na Nagrama kasmisugenka eno, na'ankure Heroti'a ana Mofavre hakreno azeri haviza hugahie huno asmi'ne. 14 Anage higeno Josefe'a otino ana Mofavrene, nererane ana kenage agu'afi zanavreno Isipi vu'ne. 15 Anantega Isip vuno umani'negeno Heroti'a fri'ne. Ana'ma hu'neana Anumzamo kasnampa ne'mofo asmigeno korapa kre'nea kemofo nena'a efore hu'ne, Isipitira Nagra Ne'mofavre'ni'a agi hugeno e'ne. (Hos 11:1)

16 Anante Heroti'ma keama, antahi'zane vahe'mo'za revatga hzageno'a, agra tusi'a rimpa he'ne. Agra vahe huzmanteno, Betrehemi kumapinti ene, ana tva'onte me'nea kumapinti, zgegfu'zmimo tare zgekafureti urami'nea mofavre'zga ome zamahe friho huno antahi'zane vahe'mo'za ofugu'ma asmi'za, e'inahu'zana fore hugahie hazageno antahi'nea knagu anage huno zamasmi'ne. 17 Anante korapa mago kasnampa ne' Jeremaia Anumzamo asmigeno kre'nea kemofo nena'a fore hu'ne, 18  mago ageru Rama kumateti antahi'naze, zavi neteno tusi'a asuza eri'ne, Reseli'a mofavre rmima'agu zavi ate'ne, higeno agri'ma azeri tagane'zankura ave'osi'ne, na'ankure magore huno omni tfa higeno'e. (Jere 31:15)

19 Heroti'ma fritegeno, mago Ra Anumzamofo ankeromo Josefena avanafi e'no Isipi eme asmi'ne, 20 otinka, Mofavrene nererane znavarenka Israeli mopare vuo, na'ankure ahe'naku hakre'naza vahera hago fri'naze. 21 Anage higeno Josefe'a otino ana Mofavrene, nererane zanavreno eteno Israeli mopare e'ne. 22 Hianagi, Heroti nemofo Akelasi, nefa no erino Judia kaziga kegva hie kema nentahino'a, ana kaziga vuzanku koro hu'ne. Anumzamo ava'nafima asmi'nea kante anteno, agra (Josefe) atreno Galili kaziga vu'ne. 23 Agra zanavreno viazamo, Nasareti kumate umani'naze. Anama hu'neana korapa kasnampa vahe'mo'za hunte'naza kemo nena'a efore hiankino Jisasinkura Nazareti Nere hu'za agia hegahaze.