1 Ana knafi mika Roma kamani vahe'mo'za kva hu'naza mopafina, Roma rankva ne' agi'a Sisa Ogastusi'a kasege erinteno, maka vahe'mo'za zamagia eme kreho hu'ne. 2 Hagi Siria mopafina Kuiriniasi Gavana mni'nere, ana knafi ese kna agafa hu'za zamagia kre'naze. 3 Ana hige'za maka vahe'mo'za zamagi kre'naku mopa agafa zimire vutere hu'naze. 4 Josefe'a agranena Galilitira atreno Judia kaziga mrerino Deviti kuma agi'a Nazaretie nehaza kumate vu'ne. Na'ankure agra Deviti nagapinti nere. 5 Josefe'a a'isa kinte'nea a' nevareno, znagi kre'naku amu'ene hu'negene vu'na'e. 6 Hagi anantega umaninakeno, Mariana mofavrema kasentesia kna egeno, 7 ese ne' mofavre kasenteno tavravenu ano vazino, bulimakamofo ne'za zuompafi antegeno mase'ne. Na'ankure miza seno mase nontamina ana mika vahe'moke hiza higeno'e.

8 Hagi ana kuma tva'onte, sipsipi kva vahe'mo'za kenage sipsipia kva hu'za megi'a mani'nageno, 9 ame huno ankeromo efore nehigeno, Ramofo msa'amo anamokizmi remsa hunezmantege'za koro hu'naze. 10 Hianagi ankeromo anage huno zmasami'ne, kore osuta antahi so'e hiho, nagra knare musenke eri'na neonkino, maka ama mopafi vahe'mo'za tusi muse hugahaze. 11 Na'ankure menina Deviti kumatera, tmagri'ma tamagu'vazinia mofavre kasente'ne. Hanki ana nera Ramo, Kraisi'e. 12 Hanki avame'za ome kesnazana amana hu'ne, ana mofavre tavaravefi antegafino bulimaka ne'za zuompafi ante'nenketa ome kegahaze. 13 Anage nehigeno, ame huno rama'a ankeromo'za monafinti anante efore hu'za, Anumzamofo agi erisaga nehu'za anage hu'za,

14 Monafi mrerisa kumapi nemnia Anumzamo'a Ra agi erino. Hagi mopafina vahe'moza zmarimpa frune maniho, Anumzamo'a rimpa fru huzmante!

15 Anage hute'za ankero vahe'mo'za zamatre'za monafi ete marerizage'za, sipsipi afu kva vahe'mo'za zamagragu anage hu'za, erinketa Ramo menina Betrehe kumate hentofazana forehie huno tasamiazana ome kesune, 16 nehu'za ame hu'za oti'za vu'za ome kazana Maria'ene Josefekea, mofavre'zinia bulimakamofo ne'za zuompafi antemase nege'za ome ke fore hu'naze.

17 Sipsipi kva vahemo'za ome ke fore nehu'za, ankero vahe'mo'zama ana mofavregu hu'naza kea, nererane nefanena znasami'naze. 18 Hagi ana kema maka vahe'mo'za antahi'namo'za, antri nehu'za antahintahi hakare hu'naze. 19 Hianagi Maria ana nanekema haza kea nentahino, agu'afi ana maka kea nenteno ana kea agera okani'ne. 20 Hagi sipsipi kva vahe'mo'za rukrahe hu'za nevu'za, ankero vahe'mo'za hu'naza kemofo nena'a maka fore hige'za, nege'za nentahiza hu'naza zanku, Anumzamofo muse hunente'za, Agi'a erisaga hume vu'naze. 21 8 knazupa avufa tga nehu'za, agi'a Jisasi'e hu'za antemi'naze. Ana agi'a ankeromo nerera rimpafima fore osu'negeno Jisasi'e hunka agi'a antegahane hu'nea kante ante'za agi'a ante ami'naze.

22 Hagi zmazeri agruhu knama vagaregeno, Mose kasegemo'ma hu'nea kante ante'ne Josefe ene Mariakea Jisasina avare'ne Jerusale kumate ra mono nompi vu'na'e. 23 Ramofo kasegefi krente'neana, Maka ese ne'mofavrema kasentesiana ramofo ami'nigeno, ruotge mofavre manigahie hu'ne. (Ekso-Uti 13:2) 24 Ramofo kasegefi huno, kre srmanama huntesazana, Tare maho namanuro, tare kasefa namanu kre sramana vugahaze hu'nea kante ante'ne ome ana hu'na'e. (Lev-Pri 12:8)

25 Hagi mago nera Jerusale kumate mani'nea ne' agi'a Simioni'e. Ana nera fatgo nekino, kazigazi huno Anumzamofo amage nevuno, Israeli vahe'mokizmi zamahoke ahesnia vahe fore hanigu avega anteno mani'negeno, Ruotge Avamumo'a agripina avite'ne. 26 Ruotge Avamumo korapa averi huno, ofri mani'nenka, Ra Anumzamo taza hania ne' Kraisina huntena fore hinkenka ketenka frigahne, huno asami'negeno antahino mani'ne. 27 Ana higeno Simionina Ruotage Avamumo azeri otigeno, ra mono nompi marerino umani'negeno, Jisasi nerera ene nefakea avare'ne kasegemoma hu'neaza huke e'na'e. 28 Simioni ana mofavre nevareno, Anumzamofo ra agi erisaga nehuno amanage huno hu'ne.

29 Ramoka kazokzo eri'za vaheka'amona, huvempa kema hunante'nanazana hago fore hige'na koe. Hagi natrege'na kema hunana kante ante'na narimpa frune fri'neno. 30 Na'ankure tahokeno taza hanimofona, nagra navunu koe, 31 Kagra korapa retro hunte'namo maka vahe zamufi efore hie. 32 Agra masagino maka megi'a vahetera remsa hunezmantena, Israeli vahe kamofona ra agi amigahie. 33 Ana mofavremofo nerera ene nefakea ana kema huntea kegu tusiza hu'ne, antri nehune znagesa antahi'na'e. 34 Ana huteno, Simioni'a asomu ke hunezmanteno, anage huno Mariana asami'ne, antahi so'e huo. Ama mofavre kamo'a rama'a Israeli vahe'mofo zmazeri traka nehuno, mago'a nagara zmazeri onetino, mago avame'zakna huno mani'nena, rama'a vahe'mo'za zamefi humigahaze. 35 Ana hina tamage maka vahe'mofo oku'a antahintahimofona eri ama nehina, kagri'enena asne kazimo tumoka'a reaza hugahie.

36 Hagi anampina anahu kna huno kasnampa ara agi'a Ana'e, Fanuel mofakino, Asa nagapintire. Ana a'mo ve erino neve'ene 7ni'a kafuzage maninegeno, neve frigetegeno, tavava teno mani'ne. 37 Ana a'mo kentoza huno maninegeno kafuzage'amo'a 84'a hu'negeno mono nona notreno, monora Anumzamofona hunenteno, neza a'o huno nunamuna kenage'ene feru enena nehuno manine. 38 Anama nehigeno anante ana 'a eno, Anumzamofo susu hunenteno, Jerusale vahe'mota taza hunka tavaresanegu kavega antenona ne' fore hane, huno ana mofavregu hune.

39 Hagi Josefe ene Mariakea Ramofo kasegemo'ma hu'neazana ana mika huteke, ete Galili mopare vu'za, Nazarete kumazinire umani'naze.

40 Ana hu'ne umaninakeno, Mofavre'zinimo nena huno hanave netino, knare antahintahifi avitegeno, Anumzamofo asunkuzamo'a Agrane me'ne.

41 Maka kafuma ne-egeno'a Jisasi nerera ene nefakea, Anumzamo Israeli vahe kinafinti ozmaheno zmagaterenea kna (Pasova) fore'ma nehigekea, Jerusalemi vutere hu'na'e. 42 Hagi Jisasi'a 12fu'a kafuzage higeno, koma neha'aza hu'ne ra knamofo neza nenaza kna fore higeno avare'ne marerine vu'na'e. 43 Hianagi ne'za neknamo vagamaregeno, nontegama vunaku neazageno, Jisasi'a Jerusale kumate mani'negene, nerera ene nefakea onke atreke e'na'e. 44 Hianagi znagrama znagesa antahi'ana, magoka e'nona vahe'ene ne-e hu'ne nentahine nevakeno kinagase'ne. Kinaga onke'ne rone'zinine, mago'a vahe zamantahigeana, a'o tagranena nome hu'naze. 45 Hakreke erifore osuke, ete rukrehe huke Jerusale ome hakenaku vu'na'e. 46 Tri'a zagegnama enevigene, ra mono nompi kasegemofo rempi huzami vahe'mofo amunompi manineno, kema hazana nentahino zmantahige kea nehigeno, ome kene eri fore hu'na'e. 47 Hagi Jisasi'ma antahino keno nehuno, kenonazamima hiazankura, maka'mo'za ana kema nentahiza, zamagra antri hu'za hakare antahintahi hu'naze. 48 Hagi nererake nefake nege'ne, antri nehune, nerera'a anage huno hu'ne. Mofavre timoka na'a higenka amanahu kavukvara hunerantane? Ko negafa'ene, nagreranena amuhohuta kagrikura nehako'e. 49 Hianagi Jisasi'a kenona huno, nahigeta Nagrikura nehaka'e? Nafa'nimofo nompi manigahuanki tanagra ontahina'o? 50 Hianagi Anagema hia kemofo agafa'a nerera ene nefakea antahi amara osu'na'e. 51 Anante Jisasi'a nerera'ene nefa'ene Nasareti uramino umanineno, nererane nefane kea amage ante'ne. Hianagi nerera'a makazama hiazana agu'afi erintegeno me'ne. 52 Jisasi'a knare antahintahizane hanavene nena nehigeno, Anumzamo'a avesinentegeno, vahe'mo'zanena avesinte'naze.