1 Tiofolisiga, korapara rama'a vahe'mo'za zmazanu eritru hute'za, Anumzamo tagripi erifore hu'nea zamofo nanekea kre'naze. 2 Ese agafare'ma Ramofo eri'za e'neri'za zamavunuma ke'naza vahe'mo'za, anama ke'nazaza krente'naza hunerasamizageta, ama ana naneke krente'none. 3 Ana hu'negu ese agafare'ma fore'ma hige'za krente'naza zana, rezagane so'e hu'na kogeno knaretfa hunantege'na, anama hu'nea kante ante'na, knare ne'moka Tiofolisiga kre'negamue. 4 E'i anazanku koma antahinana tamage nanekea, nentahinka tamage huogu nehue.

5 Herotima kinima Judia kaziga mani'nea knafina, mago prisi nera Sekaraia'e nehia nera, Abaiza nagapinti ne' mani'ne. Hagi nenaro agi'a Elisabeti'e, Aroni nagapinti efore hu'ne. 6 Ana aravemokea Anumzamofo avurera fatgo hu'ne nemani'ne, maka kasegene tra kea amage nentene, mago havi avu'avara osuke, fatgo huke Ramofontera mani'na'e. 7 Hu'neangi mofavre onte'na'e. Na'ankure Elisabeti'a mofavre onteno naravo mani'gene tvava ozafa re'na'e.

8 Mago zupa Sekaraia ene ra mono nompi Anumzamofonte kre sramnavu prisi eri'za eneri'za nagamo'za, zamagrama eri'zama eneri'za kna ege'za emetru hu'naze. 9 Prisi vahe'mo'za koma zamuzmapina kre sramna vunaku taisi zokago razageno, iza agimo'ma e'amama himofo huntageno ra mono nompi ufreno Ramofonte kre sramna nevia kante, Sekaraina ana hu'za huntageno kre sramna mananentake'za hu'naku ufre'ne. 10 Hagi rama'a vahemo'za fegi'a ra mono no agu'afi manine'za, ana gnamofo agu'afina (hour) nunamu nehazageno agu'afina mananentake'zana kre sramna vu erizana eri'naze. 11 Magora Ramofo ankeromo kre sramnavu tra'mofona tmaga kaziga efore huno oti'ne. 12 Ana'ma higeno'a Sekaraiama ankeroma negeno'a, antri nehuno koro hu'ne. 13 Hianagi ankeromo'a anage huno hu'ne, Sekaraiaga korora osuo, na'ankure nunamunka'a Anumzamo'a antahi'neankino, neganaro Elisabeti'a mago ne'mofavre kasentegahie. Agi'a Joni'e hunka antemigahane.

14 Ana mofavre ksentenkeno krimpa so'e nehina muse hugahane. Hanki rama'a vahe'mo'za ana mofavrema ksente kema nentahiza anazanke hu'za muse hugahaze. 15 Na'ankure Ramofo avurera ra vahe trohuno manigahie. Agra waini tine, hanave tinena onetfa hugahie. Na'ankure nerera rimpafi maninenigeno'a Ruotge Avamumo'a agu'afi fre avitegahie. 16 Ana mofavremo'a hakare Israeli vahe'mokizmi zamazeri rukrahe hinke'za, Ramofo Anumza zimire egahaze. 17 Ana nehuno agra Ramofona ugota huno nevuno, Ilaija'ma eri'neankna hanavene avamu'ene enerino, afahemokizmia zmagu'a zmagu'a zmazeri rukrehe hina mofavrezmire ne-enageno keontahi vahe'mokizamia zmazeri rukrehe hinke'za kentahi vahe manisaza zamo'a, Ramo'ma esiazamofo ka retro huntegahie. (Mal 4:5-6)

18 Hanki Sekaraia anage huno ankeromofo asami'ne, nankna hanige'na nagra kena antahina hugahue? Nagra ozafa rogeno, a'nimo'a anahukna huno tvavate'ne higeno, 19 ankeromo'a anage huno asami'ne, nagra ankero ne' Gabrieline, Anumzamofo tva'aonte nemanuankino, Anumzamo hunanteno knare musenke erinka ome asamio huno hunantege'na, eme negasamue. (Dan 8:16) 20 Hanki kagra knare ke negasamugenka kamentinti osanku, kagerura orunka mni'nenankeno ana kna forehina kea hugahane. 21 Hagi megi'a ra mono nompi Sekaraia avega maninaza vahe'mo'za, agafa hu'za zmagesa hakare nehu'za, na'a higeno agru huno Ruotage hu'nea nompina zazakna nemanie hu'za hu'naze. 22 Hianagi agrama megia ne-eno'a kea eme huozami avame name hige'za, zamagrama zmagesama antahizana, mago'aza agru huno routge nompina efore higeno ke'ne hu'za hu'naze. 23 Ra mono nompima kre sramnavu eriza kna'amo vgaregeno, atreno noma'arega vu'ne.

24 Mago'a gna evigeno, nenaro Elisabeti amu'ene huno mni frakino mani'negeno, 5fu'a ika enevigeno, amanage huno hu'ne. 25 Amazana Ramo asunku hunenanteno vahe'mo'zama mofavre onte a're hu'za nehu'za nagazema eri nenamizana eri atre'nante.

26 Elisabeti 6si'a ika amu'ene huno mani'negeno, mago ankeromofo agi'a Gebrieli'e nehimofo Anumzamo huntegeno, Galili kaziga osi kuma Nazaretie nehaza kumate uhanatino, 27 Maria'a vene omase'nea mofara, Josefe Deviti negeho a' erigahie huza huhampriante'naza mofate uhanati'ne. 28 Ana ankeromo Mariante ehanatino anage hu'ne, knare kne Mariaga, Anumzamo'ma avesigantenemoka, Ramo'a kagrane mni'ne. 29 Hianagi ana mofamo'a, ana musenkema nentahino'a, antahintahi hakare nehuno, ama kea nankna agu'agesa me'nea musenke nehie huno hu'ne. 30 Ana higeno ankeromo'a ana mofamofonku anage hu'ne, korora osuo Mariaga, na'ankure Anumzamo'a kagrira antahi muse hunegante. 31 Hanki kma antahio, kagra kamu'ene hunka ne'mofavre ksentenka agi'a, Jisasi'e hunka antegahane. 32 Ana mofavremo ra vahe fore nehinke'za vahemo'za, Marerisa Anumzamofo Mofavre nehnageno, negeho Deviti kini trara, Anumzamo'a eri aminigeno kva hugahie. 33 Agra, Jekopu nagate kegva huzmantevava nehinkeno, kini erizama'amo ene Agrama kegva hania kumamo'a mevava hugahie. 34 Maria'a anage huno ankeromofo asami'ne, inankna huno fore huku higenka nehane, nagra venena omasenoanki? 35 Ankeromo'a kenona'a anage huno asami'ne, Ruotge Avamumo kagrite ne-enkenka, Marerisa Anumzamofo hihamu'amo refitegantegahie. E'ina hu'negu ksentesana Mofavremo'a ruotge hanigeno, Anumzamofo mofavre hu'za hugahaze. 36 Hanki ko, negamomo Elizabeti'a anahukna huno tavava'tefinka amu'ene hu'ne. Naravo a' manino mofavre onte are hu'nazanagi, menina amu'ene higeno' 6si'a ika agatere'ne. 37 Na'ankure Anumzamofontera mago'zamo'e huno amuho osugahie. 38 Higeno Mari'a anage hu'ne, izo nagra Ramofo kazokzo eriza are, atregeno kema hana kante efore hino, higeno ankeromo atreno vu'ne.

39 Ana knafina Maria agona kumatega ame huno otino Judia kaziga rankumate uhanatino, 40 Sekaraia nompi umarerino, knare kne huno Elisabetina humuse huntene. 41 Mariama knare kne huntea kema, Elisabetima netahigeno'a, rimpafi mani'nea mofavremo muse nehuno, haru huno marerigeno Ruotage Avamumo'a Elisabetina agu'afi frevite'ne. 42 Ana higeno ana amo'a ranke huno, maka a'nemofo asomura agatereno kagrira rama'a asomu Anumzamo'a huneganteno, karimpafima mani'nea mofavrea asomu huntene! 43 Nagra iza'na mani'nogeno Ranimofo nerera'a, eno eme nage. 44 Hanki antahio, kagra humuse hunka, anama knare kne hunka nehankena nentahugeno'a, narimpafi mani'nea mofavremo'a haru huno marenerino muse hu'ne. 45 Hagi Ramo'ma hu'nea kemofo kamentinti hanku, asomu hunegantena, anama hu'nea kemo'a, kagripi avufa'a efore hugahie.

46 Maria amanage hu'ne, nagu'amo'a Ramofo ragi amigeno, 47 nagri avamunimo'a naguvazi Anumzamofo agafa huno muse huntene. 48 Na'ankure Agra anteramina kazokzo eriza vahe'ama mni'noana navu'navara nage'ne. Menima agafa huno vaniana maka vahe'mo'za Anumzamo'a asomu hunte'ne hu'za hugahaze. 49 Na'ankure Hihamu'ane Anumzamo'a raza hunante'ne, Agri agi'a ruotage hu'nemo'e. 50 Henkama efore'ma huterema hanaza nagapinti'ma, iza'zo Agriku koro hanamokizmia asuragizmanteno zamaza hugahie. 51 Ramo'a hanavenentake avu'avaza azanura eri fore'ma nehuno, antahintahizmifima zmagima eri'za mareneri'za vahera zmahe panani hu'ne. 52 Agra hanave kini vahera, kini tratetira zmazuhu fenkama netreno, hanave'a omane vahera ana kini trate zamavre antene. 53 Zmagaku haza vahera, knare'zanu erivite'nezmanteno, fenomo avitenea vahera, zmaza zamavapa huzmantege'za nevaze. 54 Agra eri'za vahe'a Israeli vahe zmaza nehuno, asunku huzmantegahue huno huvempa hu'nea kegura agera nokanie. 55 Tahi'mofo koma mevava huvempa ke Abrahanku asamino, agehemo fore hunante fore hunante knane knane hu'noma esia vahe zamaza huku hunte'ne. 56 Maria anage huno Elisabeti asamiteno, 3'a ika agranena maniteno noma'arega vu'ne.

57 Hagi Elisabeti mofavre kasentesia kna egeno, ne' mofavre ksente'ne. 58 Ana a'mofo nagamo'zane, agri kumapi nagamo'za Ramofo asuntagizamo'ma Elisabetinte'ma eama hu'nea kema nentahiza rama'a musenkase hu'naze. 59 Eit knazupa Mosese kasegemo'ma hu'nea kante ante'za avufa tga huku e'za, nefa agire Sekaraia'e huta agi'a asamresune hu'za hu'naze. 60 Hianagi nerera'a kenona huno, ama mofavre'mofo agi'a Joni'e huta antegahune higeno, 61 zamagra anage hu'naze. Tamagri nagapina mago'mofo agi'a Joni'e agine vahera omani'ne. 62 Hu'za nehu'za, nefana zmazanu avame'name hu'za iza'e hunka agi'a antegahane hu'za antahigageno, 63 avontafe eritma eho huno azanu avame'name hige'za eriza eme amizageno, agi'a Joni'e huno kre zamige'za nege'za antri hute'za, hakare zamagesa nentahizageno, 64 ame huno Sekaraia agimo'a aka higeno, agefunamo agafa huno eri'za erigeno, Anumzamofo agi erisaga hu'ne. 65 Hagi ana higeno, anama megaginea kumate maka vahe'mokizimi tusi zamagogo nefege'za, maka Judia agona kumatega ana agenkea hugantugma hu'naze. 66 Maka ana naneke antahimo'za zmagu'afi netre'za, anage hu'naze. Henka ama ana mofavremo'a nankna vahe manigahie? Na'ankure Anumzamofo hanavemo'a agrane me'ne.

67 Hagi nefa, Sekeraiana Ruotge Avamumo agu'afi frevitegeno, amanage huno kasnampa kea hu'ne,

68 Israeli vahe'mofo Rana, ra agi amisune. Agra'a vahe'a zmaza huno zmagu'vazinaku e'ne. 69 Tagri Anumzamo'a, Agri eri'za vahe'a Deviti nagapinti hankave'nentake ne' kefozampinti tahokeno taza hania ne' neramie. 70 Korapara Ramo'a ruotage kasnampa vahe'mofo zmagipi huvazino kea hu'ne. 71 Menina ha' vahetimofo azampinti taza nehuno, maka antahi haviza hurantesaza vahepintira taza hugahie. 72 Amazama hiana tagehe'i asunku hunezmanteno, korapa huhagerafino huvempa huno zamasmi'nea hanave kasegegu, agesa nentahino eriama nehie. 73 Huvempa huhagerafi kema neregeho Abrahanku huntene. 74 Ha' vahe'mofo zmazampintira tagu'vazinketa, koro osu manineta erizama'a erintegahune. 75 Mani ruotge nehuta, fatgo avu'ava huta, Agri avurera hakare gna manivava hugahu'ne. 76 Hagi kagra ama mofavre'moka, Marerisa Anumzamofo kasnampa vahere hugahaze. Na'ankure kagra Ramofona vugotenka Agri kana retro huntegahane. 77 Kagra, Agri vahera Anumzamo'ma zmaguma vazino kumizimi eri apasezmante'nia kea zmasami'sanke'za, zmasunku hanageno zamagu'vazigahie. Agra monafi msa huntenigeno eme remsha hugahie. 78 Na'ankure Anumzamo avesi ranteno fru avu'avama huranteazamo'a, nanterama zagemo monafinti hanatino remsa hiankna huno remsa hurantegahie. 79 Zamagrama hanimpi manine'za frizamofo turinapi mni'namokizmia masa nezamino, tagrira tazeri fatgo huno rimpa fru kante tavereno vugahie. 80 Jonima ra huno avamupima hanaveti'teno, ka'ma mopafi vuno umani'negeno, kna'a egeno Israeli vahepina eama hu'ne.