1  Nagra tamagerafa hu'na neramasmue, iza'o sipisipi keginamofo kafanteti agu'afi uofreno, ruganteti tka'uresimo'a, kumzafa ne'kino, vahe'za avazu hugahie. 2  Hianagi iza'o kahantegati ufresimo'a sipisipi kva fatgo mani'ne. 3  Kafante kva ne'mo agrira kafana anagintegeno, sipisipimo'za agri ageru nentahize. Ana afu kva ne'mo Agri'a sipisipimokizmi zamagi neheno, zamavreno vugota nehie. 4  Agrama afu'zga'ama zamavre atru huteno, vugoteno nevige'za, amage' avriri'za nevze. Na'ankure zamagra agerura antahi ani' nehu'za amage vu'naze. 5  Onke'nesaza nera, tamage hu'za zamagra amagera ovugahaze. Hagi atre'za fregahaze, na'ankure zamagra ontahi'nesaza agerutera kore hugahaze. 6 Jisasi'a fronka kefinti zamasmi'neanagi, zamagra nankna kema Agrama zamasmiana, ana kemofo agafa'a zmagra antahi ama osu'naze.

7 Ana hzageno Jisasi'a mago'ene zamasmino, Tmagerfa hu'na tmagrikura nehue, Sipisipimokizmi kafana Nagra'ni'a mani'noe. 8  Ko'ma egote'za e'naza vahe'mo'za, kumza vahekiza, vahe'za avazu hugahaze. Hianagi sipisipimo'za zamagerura ontahigahaze. 9  Nagra'ni'a kafana mani'noe, iza'o Nagri'teti efresimo'a knare huno mani'neno, efreno atiramino nehuno knare tra'zankura hakregahie. 10  Hanki kumzafa vahe'ma esuno'a, kumzafa seno, ahe nefrino, eri haviza hunaku egahie. Nagrama e'noana zamagra zamasimu e'neri'za, ana asimu eri avitetfa hanazegu e'noe. 11  Nagra'ni'a knare sipisipi kva ne' mani'noe, Knare sipisipi kva vahe'mo'a Agra'a sipisipireku huno asimura atregahie. 12  Zgo erinakuma avrema antesigeno erizama erisia ne'mo'a, sipisipi kva omnino sipisipi nefa'a omni'neankino, kesigeno afi krama esigeno'a, sipisipia atreno fresigeno, afi' kramo (wulf) zamagene reno zamahe panani hugahie. 13  Na'ankure agrira zgo erizante avrente'nazankino sipisipigura agesa ontahino, agra zamatreno fregahie. 14  Nagra'ni'a knare sipisipi kva mani'noe, Nagra sipisipi nagani'a ke'na antahi'na huge'za, zamagra Nagrira nage'za nantahi'za hu'naze. 15  Ana hu'negu Nenfa'a, Nagrira nageno nantahino nehige'na, Nagranena Nenfana age'na antahi'na hu'noe, Nagra nasimura sipisipimokizmire atregahue. 16  Ruga'a sipisipini'a ama kegina agu'afina omni'naze, Nagra anahu kna hu'na zamaresuge'za, nagerura nentahi'za, zamagra magoke afu kevu hu'za mani'nageno, magoke afu kva vahe manigahie. 17  Ama'na agafare Nenfa'a avesi'nenante, na'ankure Nagra nasimura atretena, hagi ete nasimura erigahue. 18  Mago'mo'a nasimura Nagripintira eriotre'gahie, hianagi Nagra'ni'a navesite antregahue. Nagrira hanaveni'a me'neankina antete'na, Nagripi hanavea me'neankina ete nasimura erigahue. Ama'na kea Nenfa nasamino huo hu'neankina hugahue.

19 Na'ankure anagema hiazanku, Jiu vahe'mo'za zamagra'zmi mago'ene tarefi refko hu'naze. 20 Rama'amo'za hu'za, kefo hankro'mo agu'a fre'negeno negi neneanki, nahigetma naneke'a nentahi'ze? 21 Mago'amo'za anage hu'naze, hankro'mo agu'afi fre'nea vahe nanekea omne'ne. Hankromo'a avu asuhu vahera erihari hanigeno kegahifi, onkegahie?

22 Anante mono noma renagi'za Anumzamofo ami'naza ne'zane kna Jerusale kumate fore hu'ne. 23 Zasi ko atu knafi, Ra mono kumapi Jisasi'a, Solomon agire asamare'naza no kinte'nafi vano hu'ne. 24 Jiu kva vahe'mo'za Jisasina eme regagi'za, anage hu'za asmi'naze, nama'a kna kagra tazeri antesanketa kvega antegahune? Kagra Kraisiga mani'nenunka huama hunka amne tasmio. 25 Jisasi'a kenona zamire anage huno zamasmi'ne, Nagra ko tamasmi'nogetma, tamagra tamentinti nosaze, mika eri'zama Nenfa agifima enerua eri'zamo, Nagri nazeri ama nehie. 26  Hianagi tamagra tamentintia nosaze, na'ankure Nagri sipisipia tamagra omni'naze. 27  Nagri sipisipimo'za nagerura nentahize, hige'na Nagra zamantahi'noge'za, Nagrira namage neaze, 28  Nagra, mani'vava zamasimura nezmue. Hagi zamagra fanene osugahaze. Mago ne'mo'a nazampintira ohanaregahie. 29  Nenfa'ma ana vahe nami'nemo, maka zampina ra hu'neankino, mago'moe huno Nenfa azampintira ohanaregahie. 30  Nenfa'ene, Nagranena magoke mani'no'e.

31 Huno nehige'za Jiu kva vahe'mo'za ahe frinaku ru'ene havekno eri'naze. 32 Jisasi amanage huno zamasmi'ne, Nenfantegati knare eri'zana hakare'a hurmeri'noanki, ama anampintira ina erizanteku hutma have knonura naheku nehaze? 33 Jiu kva vahe'mo'za ke nona'a anage hu'naze, knare eri'zama eri'nana zantera tagra have knonura onkahe'gosune, hianagi Anumzana huhaviza nehunka, kagra amne vahe'moka, Anumza mani'noema hanazanku kaheku nehune. 34 Jisasi'a kenona'a zamasmi'ne, tamagri kasegefina na'ane huno korapara krente'ne, Anumzamo'a huno, tamagra tmia anumza mani'naze hu'ne? (Sam-Zga 82:35) 35  E'ina higu Anumzamofo nanekemo'a zamagrite e'nea nagaku huno, anumza tmine hanuno'a, (Anumzamofo avontafepi krente'naza kemo'a fuotgigahie). 36  Nenfa'a nazeri ruotge huteno, hunantege'na ama mopafi e'nogu, tamagra Anumzamofo huhaviza hunentane huta Nagrikura nehaze, na'ankure Nagra hu'na Anumzamofo mofavre huazankuro? 37  Nagrama Nenfa eri'zama e'norisuana, tamagra Nagritera tamentintia osiho. 38  Hianagi Nagra eri'zama'a e'nerugetagi, tamagra tamentintia Nagrikura nosaze, eri'zama eruazante negetma tamentinti hiho, e'inama hanuta keta antahita hanazana, Nagra Nenfampi manugeno, Nenfa'a Nagripi mani'ne hugahaze. 39 Mago'ene azerinaku nehzageno, zamatreno rufanene hu'ne.

40 Jisasi'a eteno Jodani ti takaheno Joni mono ti ese'ma frezmante'nea kaziga vuno, anantega umani'ne. 41 Hakare vahe'mo'za mani'nerega uhnati'za amanage hu'naze, Joni'a mago avame'za osu'ne, ana hu'neanagi Joni'ma ama ne'ku'ma maka kema hu'neana tamage hu'ne. 42 Ana hige'za, anante rama'a vahe'mo'za Jisasinte zamentinti hu'naze.