1 Antioku mani'nakeno fore hu'neankna kna'za fore hu'ne, Poli'ene Banabasikea Ikonia kumate vuke, Jiu vahe osi mono nompi (sinagog) hampo'natike hakare vahe'mo antahi ama hu'are, mono kea huama nehake'za, rama'amo'za Jiu vahe'ene Griki vahe kevumo'za zamentinti hu'naze. 2 Hu'neanagi Jiu vahe'mo'za zamentinti ana kegura nosuza, megi'a vahe antahintahi eri savri hazage'za, ana netrena ha' rezanante'naze. 3 Ana hazageno mago'a knafina anantega mani'neke, mono kea hanavetike Ramofonkura nehune, asunku'zamofo kea nehakeno, avame'zane kaguvazanena zanagri znazampi eri fore hu'ne. 4 Hu'neanagi ana ran kumapi mani'naza vahe krerafamo'za amu'nompinti refako hu'za, mago'amo'za Jiu vahetega vazage'za, mago'amo'za aposol vahetega vu'za hagerafi'naze. 5 Megi'a vahe'ene Jiu vahe'mo'zane kva vahe zamine, zamazeri haviza huta have knonu tare netrena zanahefrigahune hu'za nehazageke, 6 Poli'ene Banabasikea ananke nentahi'ne, freke Likonia rankumamofo osi kumatrena Listrane Debine ana kaziga asoparega meno vu'nea mopare umani'na'e. 7 Anantega umani'neke mago'ene Knare Muse Kea huama hu'ne zamasmi'na'e.

8 Listra kumatera mago agia havizahu ne' ksente'nea ne' mani'ne, ksente'neregatira kana vano nosia nere. 9 Ana ne'mo Poli'ma huama hiankea mani'neno antahine. Poli'a ana ne'ma avufi kefatgo huno negeno'a, amentinti nehiankino knare huntegahie nehuno, 10 ran ke huno asami'ne, kagareti oti fatgo huo huno higeno, ana ne'mo, haru huno marerino tamino nehuno otino vu'ne. 11 Poli'ma hiazama ana vahe tamimo'za nege'za, Lakonia kefinti ranke hu'za anumzantamimo vahe fore huno tagrite ne-e hu'za hu'naze! 12 Zamagra Banabasinku Ziusi (havi anumzane) nehu'za, Polinku Hemesi'e (havi anumzane) hu'za kahefa zanagi ante'naze. Na'ankure Poli'a ke ne'ku hu'naze. 13 Ziusi havige anumzamofo mono nona, ran kumamofona megi'a, tva'onte me'nea nomofo kva ne'mo'a mago'a, bulimakaona nevareno mago'a avasase'zantamine erino ran kumamofo kahante vige'za, agrane ana mika vahe'mo'za kre sramna huznantenaku hu'naze. 14 Hu'neanagi aposol Poli'ene Banabasikea ananke nentahike kukena zani'a tagato tagatu nehu'ne, zanagare'ne ana vahetamimofo amunompi ufre'ne kezatike anage hu'na'e. 15 Ama vahe'motma, na'a amazana nehaze? tagra vahetafa mani'neta tamagri kna hu'no'e! Tagra knare musenke huama huta neramasmu'e, ana hanunketa tmazama osuno havi zampintira atretma, Agra monane mopane, hagerine maka'zama tro huno asimu anteno mani'nea Anumzante monora huntegahaze. 16 Korapa knafima mani'naza vahera, Anumzamo zamatrege'za maka mopafi vahe'mo'za zamagra zamesia kante vu'za e'za hu'naze. 17 Hu'neanagi Agrama knare'zama hu'neana fraoki'neanki, monafinti kora atregeno runo ne'za raga rentegeno eri knare hunermanteno tmesia ne'zana neramino musezana tamagu'afina ante'ne. 18 Anahu kea hu'neanagi kresramna vuznantenaku hu'nazana vahe'ma i'o huzmantenaku hu'noana, tusi'a amuho hurante'ne.

19 Hu'neanagi Jiu vahe'mo'za Antioku kumateti'ene Ikonia kumateti e'za, havige nehie hu'za zamagrarega eme zamavrente'za, Polina have knonu ahe'za avazu hu'za rankumapinti ati rami'za megi'a frie hu'za zamagesa nentahiza ome atre'naze. 20 Hu'neanagi Anumzamofo amage nentaza disaipol naga'mo'za, regorave nehazageno anampinti otino ran kumapinka eteno ufarene. Maseke nanterana Banabasi'ene atre'ne Debi vu'na'e.

21 Ana ran kumate'ma knare muse ke (gutnius) huama hakeno rama'a vahe'mo'za, amage ante disaipol naga fore hazageno, zanagra Listra kumate'ene Ikoniane Antioku kumate vu'na'e. 22 Zanagra Jisasi amage' nentaza disaipol naga zamagu'a zamazeri hanaveti ke hunezmasmike, hanavetita tamentintifina maniho, Anumzamofo kumapima vunakuma hanuta, rama'a knazampi ufreteta henka vugahune hu'na'e. 23 Ana nehuke, mono kva vahe (elda) mago'a mono nonte zamazeri onetike ne'zana a'o huneke nunamu nehune, zanamentintima neha'a Ramofo azampi zamante'na'e.

24 Ananteti Pisidi'a distrikifi ufareke agatera'azamoke, Pamfilia provinsifi ehanati'na'e. 25 Zanagra Pega kumate mono naneke ome huteke, Ataria kumate urami'na'e. 26 Anantetira atre'ne ventifi marerike ete Antioku kumate vu'na'e, korapara ana kumateti Anumzamofo asunkuzampi huzamantake'ne vunate ete ehanatina'e. 27 Zanagrama ehanatike mono vahezga eme zamazeri atru huteke, makazama Anumzamo'ma zanagripima hu'neazana nezamasmi'ne, megi'a vahete kama eri hagro hige'za zamentinti hu'naza ke zamasmi'na'e. 28 Ana kumate Anumzamofo amage' nentaza disaipol naga'ene zazakna mani'na'e.