1 Antiokua mono nontema menima mani'naza kasnampa vahe'ene, rempi huzmi vahera ama'a mani'naze, Banabasiki, Simioni (aganumpa nere hu'za nehaze ne'ki), Lusiusi'a Sairini ne'ki, kumate ugagota kva (Gavana) ne' Heroti knampa, magoka ositeti rasena'a ne' Maeniaki, Soliki hu'za mani'naze.

2 Anamo'za Ramofonte mono hunente'za, ne'za a'o hu'za nunamu nehzageno, Ruotge Avamu'mo'a anage hu'ne, Banabasine Soli kizni huhampri znante'keno, eri'za eriogu hua eri'zana eri'o hu'ne. 3 Ana hute'za ne'zama a'o hu'za mani'neza henka zamazana znagofetu ante'za nunamu hute'za huzamantake'ne vu'na'e.

4 Banabasine Soli kiznia Ruotge Avamu'mo huznantege'ne Sulisia uramike osi voti omerike Saipras ti amunompi me'nea kumate vu'na'e. 5 Zamagrama Saramisi kumate vute'za, agafa hu'za Anumzamofo kea Jiu vahe osi mono nompi (Sinagog) huama hu'naze. Zanaza hanigu Joninena avare'ke umani'naze. (Mago agi'a Jon Maki'e.) 6 Zamagrama maka ti amunompi kumatami agatere'za nevu'za Pafosi uhanati'za zago nereno Jiu vahepi havige kasnampa nera, Bar Jisasi'e nehaza nera mani'negeke ke'na'e. 7 Ana nera, Segias Paulosi knare antahizamo agatere'nea ne' Romu kamanimo huhamprintegeno ana ti amunompi kuma kava hu'nea ne' ene mani'ne, ana kamani kva (gavana) ne'mo Banabasine Soli kizni Anumzamofo ke eme asamiogu zanagi hu'ne. 8 Hu'neanagi amene ne' Elimasi'a zago nereno ha' arezmanteno ana kamani kva ne'mo amentinti osanie hu'ne. (Elimasi'e huno Griki kefi hu'neana, avuatga huno zago nereno vahe zamahe fri nere hu'ne.) 9 Hu'neanagi Solina, mago agi'a Poli'e, Ruotge Avamumo'a agu'afi avinetegeno avua kefatago huno negeno, 10 anage hu'ne, kagripina havige avu'avamo'ene havizahu zamo'a avite'ne, Sata mofavre mani'nenka, fatgo avu'avamofona ha' arenentane, kagra fatgo osu avu'avara netrenka, Anumzamofo fatgo avu'avara osugahampi? 11 Menina ko, Anumzamofo azamo'a ha' reganteankino kavurgamo'a asu hanigenka, osi'a knafina kavua onkegahane! higeno ame huno avumo'a su higeno azante azerino vanohu vaheku hakre'ne. 12 Anante kamani (Gavana) kva ne'mo anazama agrite fore hiaza negeno, amentinti hu'ne. Na'ankure agra tusi'za huno Ramofonkema rempima humia zankura antri hu'ne.

13 Anante Poli'ene agrane vu'naza vahe'mo'za Pafosi kuma atre'za hagerimpi vu'za Pega kumate Pamfalia kaziga ehnati'naze. Hianangi Joni'a anante ome zanatreno ete Jerusale kumate vu'ne. 14 Pega kumara atreke, zanagra Pisidi Antioku ehanatike, mni fruhu knazupa osi mono nompi (sinagog) marerike umani'na'e. 15 Kasegene kasnampa vahe kema hampri vagarete'za osi mono nompi kva vahe'mo'za ke atrezmante'za anage hu'naze, tafuheta mago'a tazeri hanaveti ke eri'nenutma amane hugahaze. 16 Hazageno Poli'a anante otino azanu avame huno anage hu'ne,

Israel vahe'motmane megi'a vahe'ma Anumzamofonku koroma nehaza'motma antahiho. 17 Ama'i Israeli vahe'mofo Anumzamo'a, tagri tagehe'ina huhampri zamanteno, ru vahe kumapima umani'nageno zamazeri knare zantfa Isipi kumapina nehuno hihamu'areti anampintira zamare megi atre'ne. 18 40ti'a naza kafufi ka'ma mopafi zamareno ome zamantege'za mani'naze. 19 7ni'a ranra kumatamimpi mani'naza Kenani vahe zamahe hana huteno, Anumzamo'a ana mopafi vahe'amo'za manisagu mopa erizamige'za zamagra mopa erise'za mani'naze. 20 Anazama fore'ma hu'neana 450'a zgegfu nazampi fore hu'ne. Anama huteno'a henka kva vahe azeri otigeno kva krizmantege'za mani'za e'za kasnampa ne' Samueli'gnare ehnati'naze. 21 Anante kini ne' tamisane hu'za antahigageno, Anumzamo'a Kisi nemofo Benzameni naga nofipinti ne' Soli zamigeno, 40ti'a zgegfufi kini manino kva huzmante'ne. 22 Anumzamo'a kini Solina azeri netreno, Deviti azeri otigeno kini manino kva huzmante'ne. Agra anage huno Devitinkura hu'ne, Nagra kogeno Jesi nemofo Deviti'a, Nagri'ma nagu'afima navenesia'zana agra nevaririno, maka'zama huo hanuazana hugahie. (Sam-Zga 89:20, 1 Sam 13:14) 23 Ama ana ne'mofo negehompinti, Israeli vahe'mota tahoke'ma heno tazahu nera Jisasina huvempa hu'nea kante anteno tami'ne. 24 Jisasi'ma hakare'a Israeli vahe zamufi eama osu'negeno, Joni'a huama huno mono tina fretma tmagu'a rukrehe hiho huno maka Israeli vahe'mota tasami'ne. 25 Hu'neanagi Joni'ma huhamprinte'nea eri'zama'a eri vga reteno'a, mago'ene anage hu'ne, Iza'e hutma nagrikura nentahize? Nagra ana nera omni'noe. Hu'neanagi antahiho, mago'mo'a namage ne-e. Nagra knarera osu'noankina agia anontema anaki'nea nofira katu ofegahue huno hu'ne.

26 Nafuhetma Abrahamu agigo azankomofo nagare, amama Anumzanku koro nehu'za tamagrane mani'naza megi'a vahe'motma kumipinti tazahu kea tagrite atregeno e'ne. 27 Na'ankure Jerusale mani'naza vahe'mo'zane, kva vahe'zmimo'zanena Agra taza hu'nere hu'za ke'za antahi'za osu'naze. Kasnampa vahe'mo'za Agriku hu'za kre'naza kea maka mni fruhu (sabat) mono knare'ma hampri'za nentahi'za, antahiso'e osu'za ahenaku huhaviza hunte'naza kemo'a, avufa'a fore hu'ne. 28 Ahe fri agafagura ke'za erifore osu'za, zamagra Paerotinte vu'za, antahige'za ahe frio hu'za hu'naze. 29 Agriku'ma hu'zama avon tafepi krente'naza maka nanekea huvgarete'za, keka zafareti erifenka atre'za eri'za vu'za kerifi ome ante'naze. 30 Hu'neanagi Anumzamo'a fri kragefe'nefinti azeri otigeno, 31 Galiliti amage' ante'za Jerusalem mareri'za e'naza vahe'taminte rama'a zupa efore hu'ne. E'ima ke'naza nagamo'za vahepina huama hu'za menina zamasmi'gahaze. 32 Hanki neragehokizmima huvempa huzmante'nea knare musenke tagrama neramasmunana, 33 ama ana huvempa kea, Anumzamo'a tagrite eri knare huranteno Agra'a mofavre'aza huneranteno, Jisasinena azeri oti'ne, ko'ma tare zgame avon tafepi krente'nea kante, Kagra mofavreni'a menina mani'nanke'na, Nagra negafa'na manigahue huno huama hu'ne. (Sam-Zga 2:7)

34 Hu'neanagi e'ima hunte'nere, Anumzamo'a tamage huno Jisasina azeri oti'neakino mago'anena frino onkasritfa hu'ne, Anumzamo'a anage huno hu'ne, Nagra agru huno ruotge hu'nea huvempa asomu ke Devitima ami'noana, menina tamagrira tamigahue, (Aisa 55:3) 35 E'ina hu'negu mago'ene zgame avon tafepina anage huno kre'ne, Kagra atresankeno ruotge hu'nemo'a onkasrigahie. (Sam-Zga 16:10)

36 Deviti'a, agrama manino e'nea knafina Anumzamo'ma erigahane huno hunte'nea eri'zana eri vagareteno, frige'za negehoma asentenafi ome asentageno avufamo'a kasri'ne. 37 Hu'neanagi Jisasina fri'nefinti Anumzamo azeri otigeno onkasri'ne. 38 E'ina hu'negu nenafutma antahita keta hiho, ama ana ne'pinti kumi tamia eri atresia ke huama hu'na neramasmune. 39 Ama ana nete'ma zamentinti hanu'za fatgo vahe manigahaze. Mosese kasegemo'a tamazeri fatgo osugahie. 40 Ana hu'negu tamagra kava hu'nenkeno, kasnampa vahe'mo'za hu'naza nanekemo'a tmagritera fore osino. 41  Kiza zokago kema nehaza vahe'tmina, keho! Tamano nevazinketma antri hutma fritma haviza hugahaze! Nagra knare eri'za enerugetma tamentinti'a nosaze. Vahe'mo'ma tamasmi'nigeta tamentintia osugahaze, huno kre'ne. (Hava 1:5)

42 Anage huteke Poli'ene Banabasike atineramikeno, vahe'mo'za ama ana nanekea ru mni fruhu kna (sabat) zupa knare eme tasmigaha'o, hu'za zanasmi'naze. 43 Mono'ma osi mono nompi (sinagog) huvgarete'za, vu'za e'za nehageno, rama'a Jiu vahe'mo'zane, Anumzanku koro nehaza megi'a vahe'mo'za, Poline Banabasi kizani zanavriri'za nevzage'ne, zamazeri hanaveti ke hu'ne, Anumzamofo asunku'zampina hanavetita maniho hu'ne ana vahera zamasmi'na'e.

44 Hanki anante Mni fruhu kna (Sabat) zupa, ran kumapi mani'naza vahe'mo'za kuma azute'za Ramofo ke antahinaku emeritru hu'naze. 45 Mika vahe eritru nehzage'za Jiu mono vahe'mo'za nezmage'za kanive reneznantegeno Poli hiankegura mago zamarimpa huoznante'za, ana vahe'mo'za ha' reznante'naze. 46 Poli'ene Banabasi'kea hanavetike koro osu anage hu'na'e, Esera Juda vahe'motma Anumzamofo nanekea tmasmi'nonanagi, tamagra tmefi ana kea hunemitma fatgoma hutma mani'netma manivava asimu erizankura tame'nosigu, megi'a vahete tagra rukarehe nehu'e. 47 Ramo'a amanage huno hanavege hurante'ne, Nagra huhampri kantoankinka, kagra megi'a vahera tvi zami mani'nenka, kumipinti zamazahu kea erinka mopa atupare uhanatigahane huno tasami'ne. (Aisa 42:6, 49:6)

48 Megi'a vahe'mo'za ana naneke nentahiza muse nehu'za, Ramofo kegu tusi'za hu'za musenkase nehazageno, mani'vava zamasimu erigahaze huno huhampri zamante'nea vahe'mo'za zamentinti hu'naze. 49 Ana hazageno Ramofo kemo ana mopa kaziga haezganino vuno eno hu'ne. 50 Hu'neanagi Jiu vahe'mo'za, Anumzamofonku koro nehu'za zamagi me'nea a'nene, zamagi me'nea vene'nene zamarimpare ke hu'za zamazeri otige'za, Poline Banabasi kiznia, ana mopa kazigatira zamahe anati tre'naze. 51 Zanahe anatizageke, zanagiareti kugusopa rupopo hutra'azamo'a, huzmerino e'izama hazazamo'a knare osiaza hazankino knazamo'a tmagripi megahie nehuke, Ikoniamu atreke vu'na'e. 52 Hu'neanagi Antioku kumate'ma zamentinti nehu'za Ramofo amage nentaza nagapina muse'zamo'ene Ruotge Avamu'mo'a avite'ne.