1 Nagrani'a Poli'na, Kraisi anterami avu'avazampinti'ene fru avu'avazanteti tamantahinegoe. Nagra tamagranema mani'nena fru avu'ava huramante'noanagi, afete'ma mani'nena hanave naneke huneramantoe. 2 Nagrama tamagritega vanu'na hankve kea osnuegu nentahue. Hianagi nagra esu'na tagriku'ma vahe'mofo antahintireti havi eri'za e'nerize nehaza vahe'mofona hanavege eme huzmantegahue. 3 Tamage mopafi vahe mani'nonanagi, mopafi vahe'mo'za hzaza huta hara nosune. 4 Ha'ma huzantamima azeri'nonana, ama mopafi ha'zana omne'ne. Anumzamofo hankve ha'za me'neankino, Sata vihua ahe'nafru hugahie. 5 Tagra hakare'a havi antahintahine havigemo'enema renkani renentegeno vahe'mo Anumzamofona antahi ama nosia antahintahizmia, zmazeri rukrehe hanunke'za Kraisi amagera antegahaze. 6 Tamagrama amage'ma ante ftagoma hanageta, veganokno nehu'za, ke rutrage'namokizmia, ana nona'a knaza zamigahune.

7 Tamagra mago'amota amega avufgage negeta agu'afina nonkaze. Hagi Kraisi vahe mani'noe huno hanave antahintahi nentahinimo'a, atregeno agra'a agu'afi refko huno negeno, nagra Kraisi vahe mani'noe huno nentahina, tagra'enena Kraisi vahe mni'none hugahune. 8 Na'ankure Ramo'ma kva vahe manigahaze huno tazeri otigeta mni'neta tavufga rama nehunana, tamagri tamazeri so'e hunaku anara nehunanki, tamazeri haviza hunakura anara nosunankita, tagra tagazegura osugahune. 9 Hanki tmazeri koro hunaku ama avontamina krenoramue. 10 Na'ankure mago'amo'za amanage nehaze, Poli'a avontafepina hankave ke kreneramino, tavure'ma ne-eno'a, akoheno kea nehige'za, amnege nehie hu'za nehaze. 11 Hanki anagema nehnana vahe'moka antahio. Avontafe'tamimpima hanave kema krerami'nonankna huta tagrama esuta, hanavege eme hugahune. 12 Na'ankure mago'amo'za knare vahe mani'none nehaza vahera nezmageta, tagratia zamagritera refko huta nonkone. Hianagi zmagra'a mani'naza avamente refko hu'za nege'za, tagra knare vahe mni'none hu'za refko hu'za negaza vahe'mo'za, negi vahe mani'naze.

13 Hianagi tagra mni'nona avamena agatereta tavufa ra osugahune, hianagi Anumzamo'ma e'inahu huta erizana erita kegva huzmanteho huno hurante'nesia avamente mni'neta, kegva hurmantegahune. 14 Na'ankure tagrama ese knazupa Kraisi Knare MusenKe, erita tamagrama mani'narega Anumzamo'ma eriho hu'nea avamente Korintima mni'naza nagamotare uhanitinona zamofonkura, agatereta tavufga erisaga nosune. 15 Magore huta rumo'za eri'za eri'nazazante tavufga ra osu'none. Hianagi tagripima fore hanigeta kesune huta antahi neramunana, tamagri tamentintimo nehagenkeno, erizama tamagripima erisunazamo'a ra huno hageno vanie huta nehune. 16 Ana hu'negu, mago'mo'e huno Knare MusenKe huama osu'naza afete kumatamimpina, tagra ome huama huta vugahune. Na'ankure koma erizama rumo'za e'rinesaza kumatamimpina ome e'nerisunkeno tagenoka osnazegu nehune. 17 Hianagi avontafepina anage hu'ne, iza'o avufga rama hu'nakuma hanimo'a, Ramofoma keno antahino hu'neazanku avufga ra hino. (Jer 9:24) 18 Na'ankure agra'agu knare hu'noe huno nehimo'ompage, Anumzamo'ma hu izo hu'nesimoke agra'agura musena hugahie.