1 Nenfugata, Anumzamo asunku'zama'areti, Masedonia mono vahera zamaza hu'nea zamofo agenke tagra tmasaminaku nehune. 2 Zamagripina tusi'a knaza fore nehige'za, zmarevatga zampi ufrenazanagi, zmarimpa kna nosu'za, ra muse nehu'za, fenozami omneneanagi, zamagu'areti fenona zami'naze. 3 Na'ankure nagra eriama hu'na tamasmiza hue, zamagrama amiga'a avamentera agatere'za, zamagra'a zmavesite rama'a nezamize. 4 E'ina nehu'za, Anumzamofo naga'ma Jerusale mni'naza naga'ma, zamazahu muse'zama zamagranema zamizankura, tusiza hu'za tantahigevava hu'naze. 5 Hagi e'inahu hugahaze huta tagesa antahi ozamunanagi, pusazana zamagrazmi Ramofo amite'za, Anumzamofo avesite tagrira tami'naze. 6 E'i ana hu'negu zgo eritruhu eri'za tagripima erigafa hu'nemo, Taitusi'a tamagrane umani'neno tamazahina, ana erizana eri vgaregahaze. 7 Hianagi tamagra hakare zampina knare hu'naze, tamentinti zampima, kegaga huzampima, mika Anumzamofo erizankura kazigazi nehuta, tagrikura tamavesi nerantaze. Ana hukana huta amizampina vugota hutma muse'zampinti zamiho. 8 Nagra ama kema nehuana, amiho hu'na huhankvetina hunormantoe. Hianagi rumo'za kazigazi hu'za nezamizankna huta zmavesinezmenteta, zamigahazafi hu'na reramahena kenaku nehue. 9 Na'ankure Rantimofo Jisasi Kraisi asunku'zana tamagra antahi'naze. Fenone nemo'agi, tamagriku huno amunte omne nekna hu'ne, e'i anama hu'neana Jisasi amunte omnezama'afinti feno vahe tamazeri feno vahe fore hanigure. 10 Zago eritruhu erizamofonku nagrani'a antahiantahi hu'ama huzahue. Koma evia kafure zgo eritru huno ami eri'zana tamagra'a erigafa huneta, ana erizankukera osunazanki, tamagu'areti ene huta ami'naze. 11 Menina ana erizana eri vagaresageno, tamagu'areti tamavenesigeta zgo ami eriza eri vagaregahune huta hu'nazazamo'a, zgo ante'naza avamente magozahu hugahie. 12 Na'ankure mago'mo'ma feno amizamofo avesizama me'nenkeno'a, onte'nesia avamentera omigahianki, nazano ante'nea avamente aminigeno'a, Anumzamo'a muse hugahie. (Mak 12:41-44) 13 Tagri tavesimo'a ruga'amokizmi nezamisageza fru hu'za manisnageta, tamagra atupa huta manisnaze nosunanagi, mni'naza avamente manisnazegu nehune. 14 Menina tamagripi rama'a me'negu, atupa hu'za mani'naza vahe zamaza hanageno, henka'a tamagrama atupa hanageno'a tamaza hugahaze. E'i ana hanuta magoke avamente manigahaze. 15 Anumzamofo avontafepi anage huno krente'ne, Rama'a neza eritru hu'namo'za agatere'za rama'a nontaze, hagi osia'a nezama eri tru hunamoza atupara osu'naze. (Diu-Kas 16:18)

16 Tamagriku kazigazi hu'na antahi neramuankna antahintahi, Taitus ami'nea Anumzamofo muse hunentoe. 17 Na'ankure Taitusi'a tagrama hu'na nanekereke ovianki, tamagenakura agra'a avesi'rmantenegu, kazigazi huno tamagritega e'ne. 18 Mago nerafu, Jisasi knare muse ke huama nehige'za maka mono vahe'mo'za agenke'a antahinaza nera, tagra huntonkeno Taitusi ene vu'na'e. 19 Ana nera mono vahe'moza Jerusalema zgoma omezminaku'ma hanunana, tagrane vugahie hu'za huhamprintenea ne'mo, tagranena vugahie. Anumzamofo ra agi aminaku anara nehuta, tamage huta zamaza hu'zana eriama hugahune. 20 Hanki mago'mo'e huno antahi haviza huorantenogu, rama'a vahe'mota magoka ana musezama tami'neazana kva huta erita neone. 21 Anumzamofo avurekera fatgo huta omanisunanki, vahemofo avure enena fatgo huta manisunazanku tavenesie. 22 Ete mago nerafuna hakare zupa reheta konana, mikazampina fatgo huno nemnino, Korinti vahe'motagu antahineramino tmaza hunaku nehia nera, Taitusi zane vugahaze. 23 Hanki Taitusi'a tmaza hu'naku nagrane eriza e'neria nere. Hagi agrane tare vna'a nerafukiznia mono nagapinti huznente'naze. Kraisi agi erisaga nehza vahe nevaze. 24 E'ina hu'negu zamesi'nezmanteta zmazeri so'e nehinke'za, Anumzamofo nagamo'za nege'za, Poli'ma Korinti vahe'mokizmi zamavu'zmavaku'ma nehiana tamage hu'ne hu'za hugahaze.