1 Hanki nenfugatane nasarehegata Anumzamofo knare musenke ko tmasamugeta eri'neta, oti hanavetita anankere tamentinti hu'naza naneke hurmagesa hunaku nehue. 2 Ama'i ana knare musenkereti tmahokeno tamagu'vazineanki, tamagra ma amama huama nehua kema azeri akonama osnageno'a, tamentintimo'a amne'zankna hugahie.

3 Na'ankure miko'zama agatere'neazana nagra ko erite'na, neramasmue. E'i anazana Anumzamofo avontafepi kre'nea kante Kraisi tagri kumiku huno efri'ne. 4 Anumzamofo avontafepi krente'nea kante ante'za asentetageno maniteno tgufa knare oti'ne. 5 Pitante (Sifas) ufore huteno, ete 12fu'a amage'ma nentaza disaipol nagate ufore hu'ne. 6 Ana huteno 500ti'a agatere'a amage'ante disaipol naga mni'nazafi ufore hige'za ana miko'mo'za ke'naze. Anampintira rama'amo'za menina ofri manizageno, hagi mago'amo'za fri'naze. 7 Hanki anante Jemisinte ufore huteno, ete maka aposol nagate efore nehuno, 8 hagi henka'arfana, kasentega kna me'negeno ame huno kasenante'nea ne', e'i nagrite efore hu'ne. 9 Na'ankure Anumzamofo aposol nagapina nagra henka vahere, nagrikura tamagra Anumzamofo eri'za vahere hutma huga vahera omni'noe. Na'ankure Anumzamofo mono nagamokizmi ha' rezmante'noe. 10 Hu'neanagi Anumzamofo asunku'zanteti nagra amanahu kna hu'na mni'noe. Hagi nagri'ma asunku'ma hunante'neazamo'a amne zankanara osu'ne. Ete ana miko eri'za nagara zmagatere'na eri'zana mago'ane eri'noana nagra'niompage, Anumzamofo asunkuzamo'a nagrane me'nege'na eri'noe. 11 Hanki nagra huama hanuo, zamagra eri'za naga'mo'za huama hnazo, tagra ana nanekege huama nehunketa tamagra tamentintia hu'naze.

12 Hagi Kraisi'a fripinti oti'ne hu'za huama hu'nazana, inanka huta mago'amota amu'nontmifintira, vahe'mo'za fripintira o'notize huta nehze? 13 Hu'neanagi friteno oti'zama omneneresina, Kraisi enena ora otisine. 14 Anumzamo'a Kraisina fripinti azeri ora oti'neresina, mono nanekema huama hu'nazamo'a amne'zankna higeno, tamagri tamentintimo'enena amne'zankna hisine. 15 Mago ene Anumzamofona havige eri'za vahere huno tazeri fore hisine. Na'ankure Jisasina fri'nefinti Anumzamo azerioti'ne huta tagrama hanuna zamo'a, Anumzamofona ha'rentegahie. Jisasi'a ora'otineresina, fri'namo'za ora'otizaresine. 16 Na'ankure fri'nea vahera azeri oranotiasina, Kraisinena azeri ora otisine. 17 Hanki Kraisima azeri oraotineasina tamagri tamentintimo'a amnezanka higeta, tamagra kumipi manizasine. 18 Hagi Kraisinku zamentinti nehu'za fri'naza vahe'mo'za fanene hazasine. 19 Kraisimpi menima tasimu erita mni'nona nomnizampike taza hugahie huta tamentinti hanunana, vahe'mo'za zmasunku hunezmantaza vahera zmagatereta, tusi'a zmasunku hurantesaza vahe manigahune.

20 Hu'neanagi Kraisina fripinti Anumzamo azeri oti'neazamo'a, fri'naza vahe'mokizmia ese ne'za hozafinti eriankna hu'ne. 21 Na'ankure magoke ne'pinti fri'zana egeno, anahukna huno friteno oti'zana magoke nepinti e'ne. 22 Anahukna hu'za Adamu fri'neaza hu'za maka naga'amo'za frisnageno, anahukna hu'za Kraisi'ma kasefa huno asimu'ma eri'neaza hu'za, naga'amo'za zmasimura erigahaze. 23 Hu'neanagi mago magomofona fripinti'ma azeri oti'siana kankamuma'a metere hu'ne. Esera Kraisi oti'neankino anantera, Agrama ete esnia knafina, Kraisi naga'moza otigahaze. 24 Anantera mika'zama vgare knamo esigeno, Jisasi'a maka hanave kumatamine vahe'ene, ugagota kva vahe ene mika ama mopafi hanavema zmahe fanane hute'nuno'a, Kraisi'a hanave'a Nefa Anumzamofo azampi antegahie. 25 Na'ankure miko'zamo'a Kraisi kvafi me'nenigeno, mika ha' vahe'amokizmia zmazeri fenkamitegahie. 26 Henka rfama, azeri fanene haniana fri'zamo ha'ma reneranteazana, ahe fanane hugahie. 27  Na'ankure avontafepi amanage hu'ne, mika'za kegvahu hanavea Anumzamo'a Kraisi ami'ne. (Sam-Zga 8:6) Hu'neanagi ana hanavea Anumzamo'a Kraisi ami'neankino, Anumzamo'a Kraisi agorga omanine. 28 Mika'zana Kraisi'a agatereteno, Agri'ma hankavema ami'nemofo, Nefa Anumzamofo agorga maninkeno, Anumzamo hakare zampine, mika kaziga manigahie.

29 Fripinti'ma azeri oti'zama omne'neresina, na'a hugahaze fri vahe zmaza hukure hu'za mono ti nefraza vahe'moza? Ana fri vahe'mo'zama o'otisageno'a, hagi na'ante fri vahera zmaza hukure hu'za mono tina nefraze?

30 Hagi nahigeta tagranena hazenke zampina hakaregna nemnune? 31 Tmage hu'na, nenfugata nensarogta neramasmue. Ranti Krais Jisasimpi mani'nena tamagriku muse nehuazamo'a, mika zupa fri'za hutere nehue. 32 Efesasi kumapima afi' zgane ha'ma hu'noana, tamagrama antahizana nagra na'a eri'noe? Hanki fri vahe'mo'za o'otizaresina, menina ne'zane tine negahune, na'ankure okina frigahune. 33 Hanki negi vahera omniho. Havi zamavuzmava nehaza vahe'mo'zane utagroteta mnisazana tmazeri havige vahe asegahaze. 34 Tamagra knare antahintahi enerita kumira osiho. Na'ankure mago'amotma Anumzamofona keta antahita osu'nazagu, ama kema nehuana tamagaze hinogu nehue.

35 Hu'neanagi mago'mo'a anage hugahie. Inankna huno fri vahera zamazeri otigahie? Inanknahu zamufgane otigahaze? 36 Kagra Neginenane! Avimazama mopafi ase'nankeno'a fritenoke rutaha huno nehage. 37 Avimzama nesanana rutareno ko hage'nea zana nonkrine. Hianagi witi avimazapi ru avimazana amne ase'nankeno henka hageno ruzahura nehie. 38 Hu'neanagi Anumzamo Agra'a avesite mika avimzamofona, mago mago avimzamofona agri'a avufga'a amite amite hu'ne. 39 Maka zgamofona mago'zahu avufga omne'ne. Vahe'mota mago'zahu tvufgane manunkeno, zgagafamo'za ruzahu zmavufga erizageno, nmamo'za ruzahu zmufga erizageno, noza'mo'za ru zmufga eri'naze. 40 Anahukna huno monare avufga megeno, mopare avufga me'ne. Hu'neanagi monare avasese zana mago megeno, mopare avasese zana ete me'ne. 41 Hanki zgemofona mago avasaseza megeno, ikamofona ru avasaseza megeno, hanafitamimofona ru avasase zana me'ne. Na'ankure mago mago hanafi'mo'a, agra'a avasasezane me'ne.

42 E'inahu kna huno fri vahe'mokizmi zmazeri otisia zupa, kahefa zamufga fore hugahie. Kerifi asentesia avufga fanane hugahie. Hanki fripinti ete otisania avufga, fanane osu mevava hugahie. 43 Hanki kasrino knare osu'nenia avufga asentegahie. Hianagi azeri otisia avufga, knare huno masa'ane avufgare azeri otigahie. Hanave'a omne avufga asentegahianagi, hanave nentake avufga azeri otigahie. 44 Asentesnia avufga mopafi avufga asentegahie. Azeri otisnia avufga, monare avufga azeri otigahie. Ana hu'negu mopare avufga me'nesigeno'a, anazanke huno monare avufgane megahie. 45 Anumzamofo avontafepi anage huno krente'ne, Ese nera Adamu tro higeno, asimura erino mani'ne. (Jen-Agf 2:7) Hagi henka fore hu'nea Ada'a zamasimu zami Avamu efore hu'ne. 46 Hu'neanagi esera monare avufga fore osu'ne. Hagi esera mopare avufga fore hutegeno, henka monare avufga fore nehie.

47 Kota nera mopafinti kugupa erino tro higeno asimura erino mni'ne. Hianagi henka nera Kraisi monafinkati e'ne. 48 Anahukna huno mopare nera manigeno, mopafi vahe'enena mani'naze. Hagi anahukna huno monare nera manigeno, monare vahe'enena mani'naze. 49 Menina mopare tro hu'nea ne'kna huno tro hurante'neankita, anahukna huta henka'a monafinkati ne' kna hugahune. 50 Nenafugta nensarogta amanage hu'na neramasamue, ama tavufgarera Anumzamofo Kumara erisanti oharegahune. Anahu kna huno fnanene hu'zamo'a manevava zana erisanti oharegahie.

51 Oku naneke tmasami'za huanki antahiho, mika'mota ofrigahunanagi tagra ruzahe hugahune. 52 Mago knama esigeno'a, tvurga keramage nehuna kna huno, vgare ufenkrafa hanigeno'a, ana fri'naza vahe'mo'za o'netisageta mika kasefa huta mni'nomota tavufamo'a ruzahe hanigeta onkasari hanave tavufa erigahune. 53 Na'ankure kasri avufgamo'a onksari avufga eri hankrenkeno, fri avufgamo'a ofri avufga eri hankregahie. 54 Hu'neanagi ana kasri avufgamo onkasri tvufga erisigeno'a, fri avufgamo'a ofri avufga erina, avontafepi amanage huno kre'nea kemo e'ama hugahie: fri'zana Anumzamo ahe fanane hugahie! (Aisa 25:8)

55  Fri'zamoka ina hanaveka'a me'ne? Fri'zamoka atama neminazanka'a ina me'ne? (Hos 13:14) 56 Kumi'mo fri'zamofo atazana eri fore nehigeno, kumi'mo'a hanave'a kasegefinti e'nerie. 57 Hu'neanagi Anumzamofo muse huntesune, Rantimofo Jisasi Kraisimpi taza higeta hara agatenerone.

58 E'ina hu'negu tusiza hu'na navesi nermantoa nenfugata nensarogta, oti hanavetita kaza osu maniho. Hakare zupa Ramofo eri'zama eri'zankuke nentahita mniho. Hagi antahio, Ramofo eri'zama tamamu'nama nehagegetma e'neriza zamo'a amnezanknara osugahie.