103
Egvu, Dévidi deru
1 Tẹ mbẹdua jaa Ojejoje ajaja.
Tẹ iphe bụ iphe nọ mu l'ẹhu;
jaa onye ono, ẹpha iya dụ nsọ ono ajaja.
2 Tẹ mbẹdua jaa Ojejoje ajaja;
k'ọphu ẹ t'ọ dụdu uru,
eeritaje iya l'ẹka m'ọo nanụ, mu a-zaha:
3 Ọogujeru mu nvụ l'ẹjo iphe mu meru l'ọ ha;
l'emeje tẹ mu ka mma l'iphe
bụ iphe eme mu nụ.
4 Ọogbafutaje mu; shi ẹge ono dobe mu ndzụ.
Oogudeje n-yemobu iya;
mẹ obu-imiko iya gbaa mu mgburumgburu.
5 Oogudeje iphe dụ mma
nụ-jia mu ẹpho;
l'emeje tẹ mu laa azụ
lẹ nwẹpa l'ọ bụ ugo.
6 Ojejoje ekpeje eyeru ndu l'aakpa ẹhu;
l'emeje tẹ iphe gbaru ẹphe rube ẹphe.
7 O meru tẹ Mósisu maru iphe
bụ uche-obu yẹbe Ojejoje;
bya emee tẹ ndu Ízurẹlu
maru iphemiphe ọbule, oome.
8 Ojejoje bụ onye aphụje imiko;
bya abụru onye emeje
eze-iphe-ọma.
eze-iphe-ọma.
Ẹhu te eghujedu iya
eghughu ẹgwegwa.
Ooyejeru madzụ obu yeru
iya ẹya k'etsutsu iya.
9 E tọo bajẹdu m̀bà tekenteke;
ọphu ọovujedu ọvuma jeyawaru.
10 Ẹ too mejedu eyeru ayi
l'ẹge ẹjo iphe ayi meru ha;
ọphu ọokfujedu ayi ụgwo
iphe dụ ẹji, ayi emebe;
11 kẹ l'ọ bụ ẹge igwe nọ-bebe
alị oreke-imeli bụ ẹge ọ habe nshinu;
mbụ n-yemobu, o yeru ndu atsụ iya egvu.
12 Yọ bụru ẹge ụzo
ẹnyanwu-ahata teberu ẹnya
l'ụzo ẹnyanwu-arịba;
bụ ẹge ẹke o wofuru emeswe,
ayi mesweru iya je edobe
teberu ẹnya l'ẹke ayi nọ.
13 Ọ bụ ẹge nna aphụjeru ụnwu iya imiko;
bụ ẹge Ojejoje aphụjeru
ndu atsụ iya egvu imiko;
14 kẹ l'ọ bụ iya maru ẹge e gude mee ayi.
Ọonyataje l'ọ bụ ẹja mmanu bẹ ayi bụ.
15 Madzụ bẹ ndzụ iya dụ l'ọ bụ ẹswa.
Ọonoduje evu rikarika
l'ọ bụ okoko, nọ l'ẹgu.
16 Phẹrephere -pheshile iya phu nwanshị;
yo phukashịhu; ẹke o shi nọdu
ta anyatahẹdu iya ọdo.
17 Obenu lẹ ndu atsụ Ojejoje egvu;
bẹ Ojejoje eyejeru obu
tsube l'ede-nwede rua ede-nwede.
Odobe-ẹka-ndoo ya
adụjekwaruphu ndu ọphu
jeye lẹ nwanwanwaranwa;
18 mbụ lẹ ndu ọphu edobeje ọgba-ndzụ iya;
nyata dobe ekemu, ọ tụru doberu ẹphe.
19 Ojejoje mewaru t'aba-eze iya
ngụru angụru l'imigwe.
Abụbu, ọ bụ eze b'ọ bụ rua ẹkemeke.
20 Unubẹ ụnwu ojozi-imigwe
kẹ Ojejoje; unu jaa ya ajaja;
mbụ unubẹ ndu ike dụ;
bya abụru ndu eme okfu iya.
21 Unu jaa Ojejoje ajaja;
unubẹ ụnwu imigwe l'unu ha;
mbụ unubẹ ndu ozi iya,
eme iphe bụ uche obu iya.
22 Unu jaa Ojejoje ajaja;
unubẹ iphe o meru ememe
dobe l'ẹke ọ bụ eze.
Tẹ mbẹdua jakwaa Ojejoje ajaja.