102
Ekfukfu, onye eje iphe-ẹhuka ekfu anụ Nchileke
Okfu, o kfuru teke ike agvụ iya agvụgvu; gụru aphụ, nọ iya l'obu nụ Ojejoje
1 Nụnua ekfukfu, mu ekfu
anụ ngu nggụbe Ojejoje;
tẹ mkpu, mu echi runua ngu nchị.
2 Ba aghakwaru mu azụ
teke mu nọ l'iphe-ẹhuka-a.
Ngabekwa nchị;
za mu oku ẹgwegwa
teke mu kuru ngu;
3 kẹle ndzụ mu ephukahuwa
l'ọ bụ ẹnwuru-ọku.
Ẹhu mu l'ọ ha enwukota
mu phuraphura l'ọ bụ icheku-ọku.
4 E mewaru mu;
mu akpọo nkụ l'ọ bu ẹswa.
O mewaru; ẹkpiri nri echihu mu.
5 Oke ude, mu anọduje
atsụ mewaru; mu agvụ.
Ọ bụwa ọkpu wụshiru.
6 Mu dụ l'ọ bụ udele l'echi-ẹgu;
mbụ l'ọ bụ mgbashị,
beru l'ẹke ẹgbara kfụru.
7 Mu -zẹru; mụru ẹnya;
bẹ mu adụje l'ọ bụ nwẹnu,
beru nkịnyi iya l'eli okpotsu-ụlo.
8 Ndu ọhogu mu anọduje aja
mu ewena mkpụrumkpuru.
Mu bụwa iphe ndu mu dụ
ashị gude akọ ọnu.
9 Ọ bụ ntụ bẹ mu erije;
yọ buru mu nri.
Mu ewojeru ẹnya-mini
gwakọbe l'iphe mu angụ angụngu.
10 Iphe kparu iya nụ abụru
l'ẹhu gbanwuhuru ngu ọku;
kẹ l'i paliru mu imeli imeli; buhaa mu ẹka.
11 Ndzụ mu dụwa l'ọ bụ
nwa onyonyo urẹnyashi.
Mu nwụkotawaru kpaa l'ọ bụ ẹswa.
12 Obenu lẹ nggụbe Ojejoje
a-nọ l'aba-eze ngu gbururu jeye lẹ gbururu;
ọphu 'o nwedu l'a azaha
ngu azaha tsube l'ọgbo sweru l'ọgbo.
13 Ii-gbeshikwa-a phụaru Záyọnu imiko;
kẹ l'o ruwaru teke ọo-tụba ngu l'obu;
mbụ l'oge teke ono, a fọtaru
afọta dobe ono ruwaru;
14 kẹle mkpuma iya dụ
ndu ejeru ngu ozi mkpa.
Ọobuje; o -kpo udzu tụu;
imiko iya adụ ẹphe nshinu.
15 Iphe bụ mbakeshi a-nọdu
atsụ nggụbe Ojejoje egvu.
Iphe bụ ndu eze, nọkota lẹ
mgboko l'ẹphe ha a-nọdu
akwabẹ ọdu-biribiri ngu ugvu;
16 kẹle Ojejoje e-gude ẹka iya
kpụkwazi Záyọnu;
gude ọdu-biribiri iya lụfuta.
17 Ọo-nụ ekfukfu, ndu ẹ ta
dụdu ẹge ọ haru ẹphe ekfu anụ iya;
ọphu oolephudu arọro,
ẹphe arọ iya l'ẹnya.
18 T'e dee ọwaa l'ẹkwo doberu
ọgbo ọphu abya nụ;
k'ọphu ndu ọphu, ẹ te
egbe atsụtadua ime ẹphe
e-tu Ojejoje ẹpha.
e-tu Ojejoje ẹpha.
19 Lẹ Ojejoje shikwa l'eze-ụlo
iya l'ephekerephe;
o shi l'imigwe gbua igo lẹ mgboko;
20 tẹ ya nụa ude, ndu mkpọro atsụ;
shi ẹge ono tụfu ndu
e kperu nkfugbu.
e kperu nkfugbu.
21 Ọo ya bụ t'a raa kẹ
Ojejoje arara lẹ Záyọnu;
jaa ya ajaja lẹ Jerúsalemu
22 teke iphe bụ mbakeshi;
mẹ alị-eze ndiphe l'ọ ha
e-dzukobe t'ẹphe baaru Ojejoje ẹja.
23 Nchileke nafụwaru mu ike l'okorọbya;
ọ nafụwaru mu ndzụ l'ike.
24 Tọ dụ iya bụ; mu asụ:
Nggụbe Nchileke mu;
be ewofushinu nụ mu;
l'ẹ b'ọ dụ ẹge mu nọ-bewaru;
lẹ nggụbedua a-nọkwa
tsube l'ọgbo sweru ọgbo.
25 Lẹ mbụlembu kpọ bụ
nggụbedua tụru ntọ-l'alị mgboko l'ọ ha.
Yọ bụkwaru ngu phụ;
bẹ gude ẹka ngu mee igwe.
26 Iphe ono l'ọ ha e-mekochaa laa l'iyi.
Obenu lẹ nggụbedua l'a-dụ ẹge ị dụ.
L'ẹphe ha e-mekochaa
kashịhu l'ọ bụ uwe.
Yọ bụru ẹge-a aagbanweje uwe-wa;
bẹ ii-mekochaa gbanwee ẹphe;
nk'ẹphe agvụ.
27 Obenu lẹ nggụbedua
bụlephu onye ị bụ b'ị bụ;
nọduwa ẹge ịi-nọ jeye lẹ tutu yoyo.
28 Ụnwegirima, ndu ejeru
ngu ozi l'e-buru l'ẹke ịino;
awa ẹphe ngụru angụru l'ifu ngu.