104
Hay Kantah Mikantah nan Nunlumun Amin* Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit unu hiyay angunuh an mahapit hinan angunuh an nalammung an hapit (verse 35).
1 Madayaw'a Apo Dios!
He"an Dios'u ya nidugah di abalinam,
at He"ay mipabagbagtu.
2 Ya nahophopan di odolmuh patal an ay inlubungmu,
ya ay tulday ad daya an unmu bene'lag.
3 Ya hidid daya an alpuwan di udan di nangiyammam hi nunhituwam,
ya nan bunut di paddungnay puntakayam,
ya mitnud'ah nan tuyup.
5 Ya nihamad di nangipabunam hitun luta,
at adi ma'el'ewol,
6 ya pinhungmuh danum an ay linubungam,
at ta"on nan aduntuduntug ya nun'ahe'nobda.
7 Mu unat goh himmingal'a an umat hi idul di nanapitmuh nan danum ya inunudda,
at limmayawda
8 an immayuhdah nan aduntuduntug ta numpapanguhdah nan nundotal,
ya na'amungdah din pento'muh ihinanda.
9 Ya inyamman di igad ta way atondan adi bumahhel,
at adida mahkay he'nobon tun luta.
10 Mu inyammam hi obob nan aduntuduntug,
at immayuh nan danum ta immuydah nan ginnaw an numpumbattanan nan buludna
11 ta way inumon nan numbino'ob'on an a'animal hinan inalahan,
ya ta"on nan agguy na'inam an dongki.
12 Ya nan hamuti an numpunhituh nan hapang di ayiw an himmangaw hinan pingit di ginnaw ya ahikakantada.
13 Impa'alim goh di udan ta danumana nan aduntuduntug,
at nawagahan tun luta.
14 At numpangahangawday numbino'ob'on an holo' an onon di baka,
ya impatubuna nan intanom nan tatagu,
ya impabungana ta way pangngalandah ononda
15 an umat hinan greyp an miyammah bayah an mangipa'amlong hinan tatagu,
ya nan lanan di olibon ipa'anlana nan tagu,
ya nan ma'an ta way i'ilog di odol.
16 Ya ta"on nan nun'itanom an ayiw an ma'alih cedar ad Lebanon
ya nadanumanda goh hinan udan,
17 at hidiy pumbuyaan nan ahamuhamuti,
ya ta"on nan kannaway ya iyammaday buyadah nan bolbol.
18 Ya nan na'inam an gandeng ya hidih nan ata'nang an duntug di ihinanda,
ya nan linagab di punhituwan nan kunihu.
19 Ya limmum goh nan bulan ta panginnilaan hi agtudan di himbulan,
ya nan algaw ya inilanay alimuhana.
20 Ya limmum di helong ta ma'alih mahdom,
at wa ay ta hemmelong ya bimmuhu'dan amin nan a'animal hi inalahan ta manganapdah ononda
21 an umat hinan layon an gun humeeheel an manganap hi onona an nan limmum an Dios.
22 Ya wa ay ta na'uy an mawa'ah ya numpumbangngadda an ayda mun'olo' hinan lingab,
23 mu nan tatagu ya hiyah ne pangete"andan muntamu ta engganah un mahdom.
24 Uya'ana, O Dios, an do'ol ahan di limmum hitun luta!
Ya manu ay limmum dane ti dumalat nan nidugah an abalinam,
at ten nunhinapdah tun luta!
25 Ya umat goh hinan baybay an pa'addamuna
ya pa"ongol an wah didan amin di do'ol hi numbino'ob'on an ekan an munhituh di an o"ongol,
ya i"itang di udum.
26 Ya hidi goh di owon di pupul hinan pumbaatana,
ya hidi goh di punhalhallugan nan ongol ya atata'ot an dinosaur an ma'alih Leviathan.§ Hete ya dinosaur an himmalug hinan baybay (bahaom nan Job 41:1-34 ta innilaom di udumnan aatna).
27 Ya an amin nan limmum ya He"ay pangedenlandah mangidat hi tanudda,
28 at nan idatmun dida ya hiyay ononda,
ya mundenoldah nan tanudda ti He"ay nangidadaan.
29 Mu wa ay ta inganuymu dida ya umod'o'od'odda,
ya wa ay ta bangngadom nan lennawada at matoyda,
ya mumbangngaddah nan lutan nalpuwanda.
30 Ya malmuday taguh tun luta ti idatam didah lennawada,
at umannung an waday hukat di tagu.
31 At maphod ni' hi un minaynayun di a'al'alyam, O Apu,
ya munlenot'ah nan limmum!
32 He"a ya unmu amangon tun luta at umalyog,
ya unmu dapoon nan aduntuduntug ya umahu'!
33 At hiyaat un ad ugwan an atagu' ya ikankantaa' nan Apu',
ya ulgu'ulgudo' nan a'al'alyana an Dios hi engganah ataya'.
34 Ya ipa'am'amlong ni' nan pundayaw'u Hiya ti Hiyay nalpuwan di amlong'u,
35 ya maphod ni' hi unna pumpogpog nan nun'abaholan an tataguh tun luta,
ya mun'a'ubahda goh an amin di nun'appuhiy pangatna.
At hiyanan ha"in ya ulgu'ulgudo' nan a'al'alyan nan Apu' eten atagu'.
Madayaw nan Apu' an Dios!* Hete ya hapit di Hudyu an hallelujah.
*^ Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit unu hiyay angunuh an mahapit hinan angunuh an nalammung an hapit (verse 35).
†104:4 Unu anghel.
‡104:4 Heb. 1:7.
§104:26 Hete ya dinosaur an himmalug hinan baybay (bahaom nan Job 41:1-34 ta innilaom di udumnan aatna).
*104:35 Hete ya hapit di Hudyu an hallelujah.