6
No Kadwan Saw a Pamagbaga
1 Anak ko, an sinigorādo mo a magbāyad kas ōtang no karoba mo,
an nachiabrasa ka na a nachion a magbāyad so ōtang no istranghiro,
2 an nasdok ka a maynamot do inchirin mo,
as nawtapan ka a yapo do inbahey mo,
3 komwan parinen mo tan maisalākan inawan mom anak ko,
ta myan ka do panakabalin no karoba mo:
May ka sipapakombaba,
as machikakaāsi ka do karoba mo a wayawayaan naymo.
4 Palobōsan mwabaw makaycheh.
Penpenen mo mayreket.
5 Ilapsot mo inawan mo akmay ogsa do tanoro no manganop sya,
mana akmay manomanok do asdok no mangtiliw sya.
6 Machinanawo ka pa dyirad bohawo saya,* 6:6Prob. 30:25 imo a masadot.
On, iktokto mo dadakay da, kan maypasīrib ka.
7 Abaw komander da.
Abaw manyidechideb mana torayen da.
8 Aran komwan, mangpeh sa do rayon,
kan mangapya sa so kanen da an chimpo no āpit.
9 Maypāngo pas kahay mo a maypoktad, imo a sadot?
Anchan āngo kapaybangon mo?
10 Tod ka lang a makaycheh so dēkey,
magsadalikepkep a maynahah so dēkey,
11 kan adasen naymo no kapobri a akmay tolisan,
as kan adasen imo no kapagkōrang, akmay manakanakaw a siaarmas.
12 No abos sīrbi kan marahet a tawo,
ki midibidi a mangalallīlaw,
13 magkoskosilap so mata, mangisinsinyas so kokod na,
kan manongtongdo.
14 Yapo do kadyīdo na, mangipangta so marahet,
kan nāw na paklaklalen kapaysisyay no tawotawo.
15 Dawa, maychihat anchi a myan didigra a mangay dya,
as do apagripat anchi, palālo karārayaw na a aba polos rimīdyo.
16 Ariw anem a bānag a ipsok ni ĀPO.
Bāli, papito a bānag ibidang na a makabābaba:
17 mata a mapangas so kapanyideb,
rida a maybayataw,† 6:17 Tit. 1:2
kakamay a mangdiman so abos gatos,
18 aktokto a magpangta so marahet,
kokod a maychinalo a komwan do karahet,
19 iyaw palso a sistīgo a maynana bayataw so ibahey,
as kan iyaw mangpaklaklal so kapaysisyay dan kakakteh na saw.
No Ballāag a Maynamot do Kapachikamalāla
20 Anak ko, tongpalen mo saw bilinaya ni āmang mo,
kan karwan mwabaw innanawo ni ānang mo.
21 Pirmi a ipapōso mo saw chirin da,
kan isāryo mo sa a akmay alāhas do lagaw mo.‡ 6:21 Prob. 3:3
22 Do kayam mo, palongohen danchimo do kosto a rarahan.
Anchan makaycheh ka na, onongan danchimo,
as kan anchan mayokay ka na, bagbagaan daymo.
23 Ta siraw nya saya bilbilin, akmay soho,
kan siraw nanawo, akma say sēdang.
As siraw kapaydabdab a kapangdisiplīna,
nanawhen daymo do kabibyay mo.
24 Idichan daymo do machikamalāla a mabakes§ 6:24 Do Hebreo a chirin, ki “marahet a mabakes”.
kan do malalamōyot saw a chirin no baket a dya mapodno.
25 Magderrep kaba do kapintas na,
mana palobōsan mwaba mangoskosīlap a mangotap dyimo.
26 Ta no mabaybayādan a mabakes, pagpobryen naymo,* 6:26Mana “Iyaw tangdan no mabaybayādan a mabakes, ki panghap nas tināpay na lang.” No chakey na batahen, ki “masonong”.
ki no machikamalāla a mabakes, abohen nanchiw mapateg a byay mo.
27 Maparinoriw asa tawo a mapangay so apoy do barōkong na
a dya masosohan laylay na?
28 Makayamoriw asa tawo do inmaya a
dya masosohan rapan kokod na?
29 Komwan kadilikādo no kapachoknod do baket no matarek.
Abaw mahabas a mangsalid sya a dyinchi a madōsa.
30 Makahanyihanyi abaw manakanakaw an manakaw lang
a mangabsoy so bodek na do kapteng na.
31 Ki an matiliwan, machita pabidyen nas maypapito tinakaw naw,
aran ilāko na tabo myan do bahay na.
32 Ki iyaw tawo a machikamalāla, ki kōrang so sīrib,
ta tod na rārayawen mismo na inawan.
33 Makabkabil kan masnesnekan nanchi,
as kan polos a dyinchi a maponas asnek na.
34 Ta kapangīmon, pakayapwan taywara a kasoli no asa mahakay,
kan abanchiw kāsi na an mamahes.
35 Mangrawat abanchi so aran āngo a tādi no kasoli na.
Chaskeh na paw pasoksok a aran maypāngo paw kāro na.