5
No Ballāag a Maynamot do Kapachikamalāla
(Prob. 6:20-35)
1 Anak ko, ikāso mo kinasīrib ko.
Adngeyen mo a maganay kapakaāwat ko
2 tan nāw na pakono dyimo no kosto a kapangeddeng,
kan tan nāw mo pakono a ichirin kapakatoneng.
3 Ta no chirin machikamalāla a mabakes, akmay tagapolot no yokan,
as no kapaychirin na, ki malamlamōyot kan lana no olibo.
4 Ki do tawsan na, iya, ki makpad a akmay apdo,
kan managa akmay ispāda a maybīt so tarem.
5 Iyaw kokod na, mosok do kadiman,
as kāda dakwang na, lomongo a taros do tanem.
6 Ikaskāso nabaw rarahan a mangay do byay,
basbāli a dyīdo ayayaman na, kan chapatak naba.
7 Changori, adngeyen mo yaken anak ko,* 5:7Do Hebreo a chirin, ki “siraw anak”.
kan pachisiwalan mwabaw ibahey ko.
8 Mayam ka do ayaman a mateng dya.
Machisngen kaba do pantaw no bahay na,
9 ta āngwan mabo monchiw dāyaw mo, as madyira no matarek,
as kabaro mo pa do kapohes nas byay mo no abos kāsi a tawo,
10 as āngwan patawsen danchin istranghiro kinabaknang mo,
as tabo no nayhohopagan mo, mayadis do bahay no gan-ganaet.
11 Magas-āsog kanchi do tawsan no byay mo
do karonrōnot no intīro a inawan mo.
12 Batahen monchi a kon mo, “Āngo ta disiplīna inipsok ko?
Āngo ta kapaydabdab chinaskeh ko?
13 Inadngey ko sabaw nanawo dan mamaistro ko,
mana intoltoleng ko saw nangnanawowaw dyaken.
14 Changori, do salapen no kakpekpehan no tawotawo,
ari ako na do payis no oltimo a pakarārayawan ko.”
15 Minom kas ranom yapo do bōkod mo a malābi,
kan moyog a ranom yapo do bōkod mo a akbod.
16 Maganayori an tod a maglipyas akbod do kalkalsāda,
kan moyog ranom no oksong mo do plāsa?† 5:15-16 No chakey na batahen, ki “Mapodno ka pakono do kabahay mo, kan iya lang oknoden mo.”
17 Dyira mo pakono lang kabahay mo,
kan dya polos a ipakallong do istranghiro.
18 Iya pakono nakabindisyon ni baket‡ 5:18Do Hebreo a chirin, ki “akbod.” No chakey na batahen, ki iyaw pakayapwan gānas na di baket na. mo pakapnekan mo.
Charagsak mo baket mo a kinabahay mo do kabayobayo nyo.
19 Mapintas kan makalsit a akmas mabinayiyaw a ogsa.
Nāw na pakono imo a apneken do makaāwis a inawan na,§ 5:19Do Hebreo a chirin, ki “soso na saw”.
as kan nāw mo pakono a mahwahok do adaw na.
20 Anak ko, āngo ta magkorsonada ka do machikamalāla a mabakes?
Āngo ta kepkepen mo barōkong no baket no matarek?
21 Ta do salapen ni ĀPO, maboya na tabo kaparin mo.
Chichiban naymo do aran dino a ngayan mo.
22 Siraw marahet a kaparin no marahet a tawo, mangasdok sya,
kan akma say hobid gatos na a mairot a mangireppet sya.
23 Madiman anchi maynamot ta inigpet nabaw inawan na,
as napaychawaw maynamot do taywara a kabon sīrib na.