1 Nachisisirin si ĀPO di Joswe a kāna, 2 “Ibahey mo dyirad Israelita saw a pidyen da saw idiidi a pagkamītan a akmas inbilin kwaw di Moyses a tongpalen nyo. 3 Tan komwan, aran sino a makadiman so tawo a dyi na ingagāra, maparin a mayyayo a machikāmit do asa dyirad dya saya idiidi do mamahesaw.

4 “An magtālaw makadimanaw do asaya idi, machita a maytēnek do asdepanaw do rowangan no idyaw, kan ilawlawag naw no naparinaw do salapen dan panglakayen do dawri a idi. Do dāwri, palobōsan danchi a somdep, kan torohan danchi so pagyanan na a machiyan dyira. 5 An manglakat iyaw mamahesaw sya, basta dyi da iparawat no panglakayen saw, ta ingagāra nabaw kan abaw sīgod a kaisoli na so kaaroba naw. 6 Iyaw makadimanaw, ki machita a nāw na do idyaw a mandan naosisa do salapen dan konsihal. As kan machita nāw na omyan do dawri a idi a mandanchan madiman katotohosanaw a pādi a madama a magsīrbi.* 20:6Iyaw kadiman no pādi, ki ipaboya naw kaponas no gatos no makadimanaw. Do dāwrinchi, makasabat dana do mismo na bahay kan mismo na idi a nagtālawan na.”

7 Dawa, pinatarek da do laōden no Oksong Jordan siraw nya a idiidi a pagkamītan: Kedes do Galilya do katokotokonan no Naptali, Sikem do kotokotokonan no Epraim, kan Kiryat-arba mana Hebron do kotokotokonan no Joda. 8 Do dayāen no Oksong Jordan a dayāen no Jeriko, pinatarek daw idi a Beser do let-ang do tanap do tana no trībo no Ruben, Ramot do Gilead do tana no trībo no Gad, kan Golan do Basan do tana no trībo no Manasses. 9 Siraw nya a napatarek a idiidi a pagkamītan, ki para dyirad tabo Israelita kan dyirad gan-ganaet saw a omyan dyira. Aran sino a makadiman so tawo a dya ingagāra, ki maparin naw mayyayo a machikāmit do asa dyirad dya saya a idiidi. Tan komwan, makalāsat a madiman do mamahesaw dya sakbay a maytēnek do salapen dan konsihal saw a mangosisa sya.