1 Binata ni ĀPO di Noyi a kāna, “Somdep kamo na a asa kapamilyaan do birayaya, ta naboya ko a imo lang malinteg do tanaya sichangori a chimpo. 2 Mangyonot kas taypipito a mahahakay kan mababakes do kāda kīta no animal a naibidang a madalos a maparin a idāton, ki asa lang a kaparis iyonot mo a mahakay kan mabakes do kāda kīta no animal a dya naibidang a madalos. 3 Komwan pa a mangyonot kas taypipito a mahahakay kan mababakes do kāda kīta no manomanok. Parinen mo nyaya tan mabyay sanchiw tabo kīta no animal kan manomanok, as maymanganak sanchi do hapotayan tana. 4 Ta do chapapito naw anchi a karaw a yapo sichangori, chimoyen konchiw tanaya do apat a poho a karaw kan apat a poho a kahep tan madiman sa tabo nabyay a pinarswa ko.” 5 Tinongpal ni Noyi iyaw tabo inbilinaw no ĀPO dya.

6 Nagtawen si Noyi so anem a gasot do kasiknan layos do tanaya. 7 Do dāwri, somindep si Noyi kan baket na, siraw pōtot naw kan siraw babbaket da saw, tan maidichan sad layos. 8-9 Tabo kīta no animal a madalos kan dya madalos, kan tabo kīta no manomanok kan komayakayab do tana, ki nangay sa di Noyi, as tayisa sa kaparis somindep do birayaw a akmas inbilinaw ni Āpo Dyos di Noyi. 10 Oyod, do katayoka no papito a karaw, somniknan danaw layos do tanaya.

11 Do chanem naranaw a gasot a katawen no kabyay ni Noyi, do chadadwa naw a bohan, do chaasa poho na kan papito a karaw, naychihat sa napaboswang tabo a akbod a rarakoh do tāw kan do irahem no tana. On, akmay napakaro ombalataw so ranom do hanyit, ta nachimoy so mawyas, 12 as nāw na mayit chimoy do apat a poho a karaw kan mahep. 13 Do dāwri a araw, do kasiknan danaw no chimoy, somnakay sa Noyi kan baket na, siraw tatdwaw a pōtot na a sa Sem, Ham, kan si Japet, kan siraw babbaket da saw do birayaw. 14 Nailogan sa tabo a kīta no animal a maywam kan bolaw a sigon do kīta da, tabo a kīta no komayakayab do tana sigon do kīta da, kan tabo a kīta no manomanok a sigon do kīta da. 15 Tayisa a kaparis do kāda kīta no sibibyay a parswa a myan so anges no byay, somindep do birayaw a nachirayay di Noyi. 16 Komwan pinarin da akmas inbilin ni Āpo Dyos di Noyi. Somindep dana sa a parisparis a malloko kan mabinayi do kāda kīta. As katayoka na, inanban ĀPO iyaw pantawaw no biray.

17 Do dāwri, tinongtong naw malayos so apat a poho a karaw, kan nayparahem ranom a nandad nakaihataw no birayaw. 18 On, naypayparahem ranomaw do tanaya, as kan nachilyod danaw birayaw do hapotaw no ranom. 19 Nāw na tinongtong no ranomaw naypayparahem mandan natonep dana saw katotohosan saw a tokotokon. 20 Naypayparahem pa a nandad nakarapit nas papito a kamitros so katwatohos kan tōtok daw no katotohosan saw a tokotokon. 21 Nahmes sa tabo nabyay a parswa do hapotayan tana, siraw manomanok, animal a maywam kan bolaw, siraw komayakayab do tana, kan tabo a tawotawo. 22 On, nadiman a tabo myan so anges no byay do hapotayan tana. 23 Inabo ni ĀPO tabo sibibyay do hapotayan tana: tawotawo, animal, siraw komayakayab do tana, kan siraw manomanok. Ki sa Noyi dana lang nabyay kan siraw rārayay naw do birayaw.* 7:23 Mt. 24:37-39; 1 Ped. 3:20; 2 Ped. 2:5 24 Nāw na pa natonep no tanaya do irahem no 150 a karaw.