1 Do dāwri, naypaypāro saw tawotawo do intīrwaya a tana, kan naypāro nayanak a mababakes. 2 Ki myan saw naparswa* 6:2 Do chirin Hebreo, ki “siraw anak no Dyos a mahahakay”. a yapo do hanyit a nakaboya so kapipintas dan nya mababakes a anak no tawo. Dawa, inhap da saw chinakey daw a binaket. 3 Ki binatan ĀPO a kāna, “No ispirito ko a intoroh ko do tawotawo, ki ipalōbos kwaba a omyan dyira a abos pandan, ta tawo sa lang. Makayapo sichangori, mabyay pa saba so masorsorok kan 120 a katawen.” 4 Do dāwri a chimpo kan somarsarono pa, myan saw siganti do tanaya a anak dan mababakes saw a binaket dan naparswaw a yapo do hanyit. As siraw nyaya anak da do kaychowa pa, ki nagdindināmag kan matotored sa a tawo.

5 Naboya ni ĀPO a taywaraw karahet no tabo tawotawo do tanaya, kan aba polos naktokto da a maganay, an dya maynana marahet. 6 Maynamot do dyaya, chinaliday ni ĀPO nakapamarswa nas tawotawo do tanaya, kan oltimo a chinaynyin aktokto na. 7 As dawa, binata ni ĀPO a kāna, “Abohen ko saw nya tawotawo a pinarswa ko do tanaya. Ki tawo aba lang, an dya siraw tabo a kīta no animal, siraw komayakayab do tana, kan siraw manomanok do tohos, ta chinaliday ko nakaparswa ko sira.” 8 Ki do dāwri, do nakaboyaw ni ĀPO si Noyi, ki nahwahok.

9-10 Nyaw pakasaritāan ni Noyi. Tatdo saw pōtot na a mahahakay: sa Sem, Ham, kan si Japet. Do dāwri a chimpo, si Noyi lang malinteg a tawo a abos pakapilāwan, ta pinarin naw chakeyaw ni Āpo Dyos. 11 Ki an maynamot do tawotawo do tanaya, ki oltimo sa so karahet do salapen no Dyos. Do aran dino do tanaya, ki nachikneb do maranggas a kaparin da. 12 On, naboya ni Āpo Dyos karahet dan tawotawo do tanaya, ta malit sa a marahet so dadakay.

13 Sinpangan na, binata ni Āpo Dyos di Noyi a kāna, “Ikeddeng ko na a abohen ko tabo tawotawo kan animal, ta nachikneb danaw tanaya do karanggas no tawotawo. On, abohen ko sa tabo yapo do tanaya. 14 Ki imom Noyi, mamarin kas biray, kan osaren mo saw mahnyi a kayo. Mamarin kas kwarto na sa do irahem, as kolaan mos arkitlan do irahem kan hapot naw. 15 Parinen mo a 133 a kamitro kanaro na, as 22 a kamitro kawbong na, kan 13 a kamitro katohos na. 16 Mamarin kas atep na, kan payan mos 44 a sintimitro do payawan atep kan dyindyin na. As no katohos na, parinen mo a tatdwa kasagonodan, as pangayan mos pantaw na do bakrang naw. 17 Layosen konchiw tanaya tan mabo saw tabo sibibyay a parswa. Madiman sanchiw tabo a myan so anges no byay do hapotayan tana. 18 Ki machitōlag ako dyimo. Anchan tayoka danaw birayaw, somakay kamo kan baket mo kan siraw tatdwaw a pōtot mo kan siraw babbaket da saw. 19-20 Apen mod birayaw asa magparis a mahakay kan mabakes do tabo a kīta no animal, tabo a kīta no manomanok, kan tabo a kīta no komayabkayab do tana tan mabyay sa. 21 Manghap ka pas tabo a kīta no makākan a machita monchi a chabyay nyo kan siraw animal saw,” binata ni ĀPO. 22 Pinarin Noyi a tabo inbilinaw ni Āpo Dyos dya.