1 Nadiman si Samwel, as tabo tawotawo a Israel, ki naychichipeh sa kan nagdongdong-aw sa. Intābon da do bahay naw do Rama.

Sinpangan na, minosok si Dabid do Let-ang no Maon. 2 Myan asa a taywara a mabaknang a mahakay do Maon a myan so tana a masngen do idi a Karmel. Myan dyira na a tatdo a rībo a karniro kan asa rībo a kalding, as kan manggogogod siras karniro do Karmel. 3 No ngaran mahakayaw, ki Nabal, kan si Abigail no ngaran baket na. Iyaw baket naya, ki masīrib kan mapintas. Ki iyaw lakay naw, ki maranggas kan masosolihen do tabo kaparin na. Iya, ki yapo do kapotōtan ni Kaleb.

4 Kadama naw ni Dabid a myan do let-ang, nadngey na a manggogogod dana si Nabal siras karniro naw. 5 Dawa, nanoboy so asa poho do bonggoy naw, kan inbilin na dyira a kāna, “Somonget kamo a mangay do Karmel di Nabal, kan mapadyos kamo dya do ngaran ko. 6 Ibahey nyo dya a kon nyo, ‘Myan pakono dyimo kan pamilya mo kaydamnayan no kapangtokto. Maganay pakono do tabo a dyira mo.

7 “ ‘Nadngey kwaw a chimpo dana no kapanggogod siras karniro. Do kayan daw no magpaspastor mo saw a nachiyan dyamen, ki indadanes namen saba, kan abaw nabo dyira do tābo chimpo do kayan da a masngen do Karmel. 8 Iyahes nyo dyirad babbaro saw a magpaspastor mo, kan ibahey danchi dyimo no oyod. Dawa, chāsi mo pa yamen kan babbaro ko saw a mangay kami do arawaya no pista. Torohan nyo pa yamen a magsirsīrbi dyimo kan anak mwaw a si Dabid so aran āngo a maparin a itoroh nyo a makan.’ ”

9 Do nakawara daw no tinoboy saw ni Dabid, inbahey da di Nabal iyaw tabo do ngaran ni Dabid, kan ninanaya dan āngo atbay na.

10 Tinbay ni Nabal saw tinoboyaya ni Dabid a kāna, “Sino nyaya Dabid? Sino nyaya pōtot ni Jesse? Āro danayaw magsirsīrbi a machisyay dyirad āmo da sichangori. 11 Manoroh akori so tināpay kan ranom kan karni a pinarti ko a para dyirad manggogogod ko saya, kan kaitoroh ko sya dyirad mahahakay saya a dyi ko a chapatak nakayakayapwan da?”

12 Tomnadyichokod saw tinoboyaw ni Dabid, kan naybidi sa, kan inbahey da tabo naibaheyaw dyira. 13 Inmandar ni Dabid dyirad bonggoy na saw a kāna, “Kāda asa, manohot so ispāda na!” Dawa, nanohot sa a tabo. Aran si Dabid, ki nanohot so ispāda naw. Malābit apat a gasot a mahahakay, siraw nachisongesonget di Dabid, ki natokos dadwa gasot a magbantay siras warawara da saw.

14 Asa baro dyirad magpaspastor ni Nabal, nangibahey di Abigail a baket na a kāna, “Nanoboyaw si Dabid siras rārayay naw do let-ang so mapadyos do āmo taya, ki nakasokasolyaw a nanginsolto dyira. 15 Aran komwan, siraw mahahakayaw, ki maganay saw dyamen. Indadanes daba yamen, kan abaw nabo dyamen do kayan namen do pagpastwan saw a masngen dyira. 16 Mahep kan māraw, ki akma say ahad a nāw da naypadibon a mangaywan dyamen do kapagpasto namen siras karniro saya. 17 Changori, machita a mapatakan mo maynamot do dyaya kan chiban mo pa an āngo maparin mo, ta ītonchiw didigra do āmo taya kan tabo kapamilyaan na. Oltimwaya marahet a tawo, as abayaw makapachisarīta dya.”

18 Nakalyalisto si Abigail a nangpeh so dadwa gasot a natāpi a tināpay, dadwa a kalālat a sopot a napno so palek, dadima naparti a karniro, mag-asa poho kan dadwa a kasalop a nakirog a byas, asa gasot a kaormaan a napihpih a pasas kan dadwa gasot a kaormaan a napihpih a nakolay a igos, as nakapasakay na sya do asno na saw. 19 Sinpangan na, inbahey na dyirad magsirsīrbi na saw a kāna, “Ngay, manma kamo na, as mononot ako na dyinyo.” Ki inbahebahey naba di lakay na a si Nabal.

20 Kayan naw a magsakay do asno naw a mosok do bakrang no marahem a payahosongan no tokon, nachigeddan a minosok si Dabid kan bonggoy na saw a mahahakay a lomongo dya, as nachibayat si Abigail dyira. 21 Naktokto na pa ni Dabid a kāna, “Aryoriw sīrbi na a binantayan ko tabo dyira no nyaya a tawo do let-ang tan abo nabo a dyira na? Ki binahes naya yaken so marahet do maganay a pinarin ko dya. 22 Dyos pakono danaw taywara a mangdōsa dyaken an manokos ako pa so mabyay a aran asa a mahakay dyirad tabo a dyira na manda anchan mabekas nan delak!”

23 Do nakaboya naw ni Abigail di Dabid, nakalyalisto a gominchin do asno naw kan nagrōkob do tana do salapenaw ni Dabid. 24 Nagrōkob do kokod naw ni Dabid, kan binata na a kāna, “Mo āpo ko, yaken dana lang angayan pamagatos. Palobōsan mo pakono a maychirin pachirawatan mwaya dyimo, as kan adngeyen mo pa an āngo ibahey ko dyimo. 25 Dyi mo pakono a ikaskāso nawri a marahet a tawo a si Nabal. Iyaw chakey na batahen no ngaran naya, ki abos arang, kan oyod a abos arang. Ki yaken a pachirawatan mo, ki naboya ko sabaw tinoboy mo saw mo āpo ko.

26 “Changori, mo āpo ko, akmas kasigorādo no kasibibyay ni ĀPO kan kasigorādo no kasibibyay mo, si ĀPO iyaw mangpenpen dyimo a mangdiman kan mangbahes do bōkod mo a tanoro. Sira pakono kabōsor mo kan siraw mangīsad a mamarin so marahet dyimo a āpo ko, ki mayparin pakono sa akma si Nabal. 27 Changori, rawaten mo pakono nyaya a sāgot a inyangay no pachirawatan mwaya dyimo a āpo ko. Maitoroh pakono dyirad babbaro a monot dyimo. 28 Pakawanen mo pakono yaken a pachirawatan mo do nakagatosan ko. Si ĀPO, ki sigorādo a patneken nanchiw pagāryan mo a āpo ko kan siraw kapotōtan mo a magnanayon. Ta imo, ki machilablāban ka dyirad gobat ni ĀPO. Abo pakono marahet a kaparin a myan dyimo ranan mo a sibibyay.* 25:28 Mana, “Abo pakono mamarin so marahet dyimo do ranan kasibibyay mo”. 29 Aran myan manglakat dyimo a makey a mangdiman, no kabyay mo a āpo ko, ki abaw pakaan-anwan na do kapangaywan ni ĀPO a Dyos mo a akmas nakapamongos na dyimo a maganay do irahem no mapateg a sopot na. Ki iyaw no byay dan kabōsor mo sa, ki paksyaten na sanchi a akmay naipalsiit. 30 Anchan ipatongpal ni ĀPO dyimo a āpo ko sigon do tabo maganay a inkari na a maynamot dyimo kan payparinen naymo a pangōlo no Israel, 31 abanchiw paynamotan no kapagbabāwi mana kapaybiybinākel do kapangdiman a abos gapo mana kapangbahes no āpo ko do bokbōkod na. As do kaparin anchi ni ĀPO so maganay dyimo, kanakmen mo pa yaken a pachirawatan mo.”

32 Inbahey ni Dabid di Abigail a kāna, “Madaydāyaw si ĀPO a Dyos no Israel a nanoboy dyimo sichangori a machibayat dyaken. 33 Mabindisyonan ka pakono do kaganay no kapangtokto mo kan do kapenpen mo dyaken a mangdiman changori a araw, as kan do kapangbahes ko do bōkod ko a tanoro. 34 Ta akmas kasigorādo no kasibibyay ni ĀPO a Dyos no Israel a nangiliklik dyaken a mapaynyin dyimo, an dyi ka nakalyalisto a nachibayat dyaken, abanchiw asa dyirad adīpen a mahahakay ni Nabal iyaw no mabyay anchan mabekas.”

35 Do dāwri, rinawat ni Dabid do tanoro ni Abigail iyaw inyangay naw dya, kan binata na a kāna, “Somabat ka na a sitatalna. Nadngey ko naw inbahey mwaya, kan ipalōbos ko naw inakdaw mwaya.”

36 Do nakasabataw ni Abigail di Nabal, naboya na a magpasken si Nabal do bahay na a akmay pasken no āri. Nabōk dana a taywara. Dawa, abaw inbahebahey ni Abigail dya maynamot do nakangay naw di Dabid a manda do kamabekas. 37 Do kamabekas, do kapakaosaw danaw ni Nabal, inbahey a tabo ni baket naw naparinaw. Ki naataki do pōso si Nabal kan komnolahet dana akmay bato. 38 Napahabas malābit asa poho a karaw, diniman ni ĀPO si Nabal.

39 Do nakadngeyaw sya ni Dabid a nadiman si Nabal, binata na a kāna, “Madaydāyaw si ĀPO a nangbahes so kairoromen kwaya a yapo di Nabal, kan nangiliklik so pachirawatan na a mamarin so marahet. Pinabidi ni ĀPO di Nabal iyaw marahet a pinarin na do bōkod na a inawan.”

Sinpangan na, nanoboy si Dabid so mangay di Abigail tan yahes na mayparin a baket na.

40 Do nakawara dan tinoboyaw ni Dabid di Abigail do Karmel, binata da dya a kon da, “Si Dabid, ki tinoboy na yamen a manghap dyimo a mayparin a baket na.”

41 Nagrōkob si Abigail do tana, kan binata na a kāna, “Cha dyaw pachirawatan nyo. Sisasagāna a magsīrbi kan manglablab so kokod da no magsirsīrbi di āpo ko.” 42 Nakalyalisto si Abigail a nagsakay do asno. Myan nachirayay dya a dadima mababakes a magsīrbi dya. Nachangay sa dyirad tinoboy saw ni Dabid, as kan nayparin si Abigail a baket na. 43 Kinabahay pa ni Dabid si Ahinoam a taga Jesreel, kan sira dadwa, ki nayparin sa a baket na. 44 Ki intoroh ni Saulo balāsang naw a si Mikal, iyaw binaket naw ni Dabid di Palti† 25:44 Mana “Patiel”. 2 Sam. 3:13-16 a pōtot ni Lais a taga Gallim.