1 Do nakatayoka naw no nakapanglakat da Saulo dyirad Pilisteowaw, naibahey dya a nangay si Dabid do let-angaw no En-gedi. 2 Dawa, nangpeh si Saulo so tatdo a rībo a napidi na a soldādo a yapo do tabo Israel, kan yangay da a chichwasen si Dabid kan bonggoy na saw a mahahakay do masngenaw do yanan a mayngaran so Kabatwan Dan Bolaw Saw a Kalding.

3 Do nakapakarapit daw do yanan dan koral no karniro do payis no rarahan, myan aschip a masngen daw. Somindep si Saulo a naytoratod a makatachi.* 24:3 Do Hebreo a chirin, ki “taloban naw kokod na.” Ta do kapaytoratod no mahakayaw a makatachi, ki taloban no kagay naw kokod na. Ki sa Dabid kan bonggoy na saw a mahahakay, ki myan sa maychadisdisna a tomayo do kasosokelanaw a partis no aschipaw. 4 Binata dan rārayayaw ni Dabid dya a kon da, “Changori danaw arawaw a inbahey ni ĀPO dyimo a kāna, ‘Iparawat konchi iyaw kabōsor mo do tanoro mo, kan parinen monchi an āngo maganayaw do kapakaboya mo.’ ” Do dāwri, nakanapyek a naypasngen si Dabid a nangrītas so dēkey do sōli naw no sayran no kagay ni Saulo.

5 Nahay abas dēkey, naybiybinākel si Dabid do nakapangrītas naw so dēkey do sōli naw no kagay ni Saulo. 6 Binata na dyirad rārayay naw a kāna, “Si ĀPO pakono mangbayo dyaken a mamarin so nyaya do āpohen ko, ta iyaw pinidi ni ĀPO. On, baywan pakono yaken ni ĀPO a mamarin so nya, ta iya oyod napidi ni ĀPO.” 7 Dawa, do dyaya inchirin ni Dabid, ki pinaydabdab na sa, kan pinalobōsan na saba a mangdarop si Saulo. As si Saulo, ki naytēnek kan komnaro dana do aschipaw, as nayam dana.

8 Sinpangan na, minohtot si Dabid a yapo do aschipaw, kan inngēngey na di Saulo a kāna, “Mo āpo ko a āri!” Minidit si Saulo, ki nagrōkob do tana si Dabid a magdāyaw dya. 9 Binata na di Saulo a kāna, “Āngo ta inadngey mo saw tawotawo saw a mangibahey a chakey koymo a paynyinan? 10 Changori a araw, naboya mo a mismo an maypāngo nakaiparawat ni ĀPO dyimo do tanoro ko do aschipaya. No kadwan, inpapāti da dyaken a dimanen ko naymo, ki binaywan ko a maparin dyimo. Binata ko dyira a kon ko, ‘Paynyinan kwabaw āpo ko. Ta iya, ki pinidi ni ĀPO.’ 11 Mo āmang, chiban mo paw kaktebaya no kagay mo do tanoro kwaya! Rinītas ko sōli naw no kagay mo, ki diniman kwaba imo. Nyaw mangipaboya kan mangipaneknek a abaw pinarin ko a madi dyimo mana nagribīldi dyimo. Naygatos akwaba dyimo, ki nāw mo a lakalakatan yaken a dimanen. 12 Si ĀPO pakono danaw mangokom do payawan ta. Si ĀPO pakono danaw mangbahes siras madi a pinarin mo. Ki an dyaken, kontraen kwaba imo. 13 Akmas adanaw a panyinyirin a kāna, ‘Yapo dyirad marahet a tawo, mohtot karahet.’ Ki an yaken, kontraen kwaba imo.

14 “Sino paro paspaspangen no āri no Israel? Sino paro lakalakatan mwaya? Nadimanori a chito mana tīmel paro? 15 Si ĀPO pakono iyaw mangokom do payawan ta kan manoroh so dōsa an sino naygaygatos. On, chiban na pakono kan ipaneknek na pa a malinteg ako, kan iya danaw mangisalākan dyaken do toray mo!”

16 Katayoka ni Dabid a naychirin sira syay, binata ni Saulo dya a kāna, “Bosis moriw nawri mo Dabid a anak ko?” kan tomnanyis so malyak. 17 Binata na di Dabid a kāna, “Malinlinteg ka kan yaken. Namariparinan mo yaken so maganay, ki karahet iyaw pinamahes ko dyimo. 18 Kaibabahey mo lang changori so maganay a pinarin mo dyaken. Si ĀPO, inparawat na yaken do tanoro mo, ki diniman mwaba yaken. 19 An madongso no tawo kabōsor na, pakakarohen nawri a dya maan-ano? Si ĀPO pakono danaw manggon-gona dyimo so kaganay no pinarin mo dyaken sicharaw. 20 Chapatak ko a imo, ki sigorādonchi a mayparin a āri. As iyaw no pagāryan no Israel, ki mapatēnek anchi do kapagāri mo. 21 Changori, isapata mo pa dyaken do ngaran ni ĀPO a anchan maparin nyaya, ki dimanen mo sabaw kapotōtan ko† 24:21 Komwan pinarin dan kadwan saw a āri. Ok. 9:5; 1 Āri 15:29; 16:11; 2 Āri 10:1-17; 11:1 mana opasen mo ngaran ko do partīdos ni āmang ko!”

22 Do dāwri, nagsapata si Dabid di Saulo. As sa Saulo, ki somnabat dana sa. Ki sa Dabid kan bonggoy na saw a mahahakay, naybidi dana sa do pagkamītan da saw a gwardyado.