1 Bibahendeore nawingi Bi hene. Bi ibu Ngode Datagaliwabela hene. Bi ibu Ngode Datagaliwabeore hene.✡ Min 8.22, 8.30, Yo 17.5, Pb 2.6, Kl 1.17, 1 Yo 1.1-2, Mo 1.2, 19.13 2 Bibahendeore nawingi Bi ibu Ngode Datagaliwabela hene.✡ Pig 1.1 3 Ngode Datagaliwabe ibugua Bila haru howa bibahendeore wabiai hene. Ngode Datagaliwabehanda Bila haru ndo ibuni hangu howa mbirale mbira wa nabi hene.✡ Yo 1.10, 1 Ko 8.6, Eb 3.9, Kl 1.16-17, Hi 1.2 4 Bi ibuha holene wini. Holene ogonime wali agalinaga wá holene tene wini.✡ Yo 5.26, 8.12, 9.5, 1 Yo 5.11 5 Wá holene ogonime arumaha mo wá halu kagoni. Aruma holeneme wá holene ogoni mo yi habe nahe ka.✡ Yo 3.19

6 Agali mbira Ngode Datagaliwabehanda ibilayago ibu mini Yone hene.✡ Md 3.1, Mg 1.4, Lg 1.13-17, 1.76, 3.1-2, Yo 1.33 7 Wali agali bibahendeme Ngode Datagaliwabehondo mini mbiraore wilonaga Yone ibugua wá holene walia helo Ngode Datagaliwabehanda ibu ibilene.✡ Ab 19.4 8 Ibu wá holene ndo hene. Ibugua wá holene walia hole ibini.✡ Yo 1.20 9 Wá holene heneneore ogoni dindiha daluwa ibugua wali agali bibahendeni wá haame heleda.✡ Ais 49.6, Yo 1.4, 8.12, 1 Yo 2.8

10 Bi ibu wali agali heba hene. Ngode Datagaliwabehanda Bi ibula haru howa bibahende wabinigo wali agali bibahendeme ibu manda nabi hene.✡ Yo 1.3, 17.25, Hi 1.2, 11.3 11 Ibuni dindini ibiyagola ibunaga damene hearume ibu hame nale howa turu nahe hene.✡ Lg 19.14, Ab 3.26, 13.46 12 Wali agali maru hearume ibuhondo turu halu mini mbiraore wiyagola ibugua tihondo, Ngode Datagaliwabenaga waneigini tí halimu, lene.✡ Lm 8.15, Ga 3.26, 2 Pi 1.4, 1 Yo 3.1 13 Ti wali agalime waneigini taba hanagadagua taba honowa Ngode Datagaliwabenaga waneigini hene ndo. Ngode Datagaliwabe ibunime ti mo ibunaga waneigini hene.✡ Yo 3.3-6, Ya 1.18, 1 Pi 1.23

14 Bi ibu agali heneneore hole dalini. Agali hole daluwa ibugua ina heba hene. Ina heba hayagola howa iname ibu mini daliga wá holene taraore heneyane hondowa handawa biaabo harima. Aba Ngode Datagaliwabe Igini mbiraore ibu dege howa ibuhondo mini daliga wá holene taraore miniyago handarima. Biamogo bia holenebi henene lolenebi ibuha to̱laihe hene.✡ Ais 60.1-2, Md 1.16, 1.20, Lg 9.32, Yo 2.11, Lm 1.3-4, Ga 4.4, Pb 2.7, Kl 1.19, 1 Ti 3.16, Hi 2.11-16

15 Yonehanda ibu walia halu bi dalimu lowa lamialu lalu, I̱na tí langialu howa agali mbira i̱ nahewaha henego maha ibulebirago ogoni ibu daligaore ka larugo o íbu kagoni, lene.✡ Md 3.11, Lg 3.16, Yo 1.27-32, 8.58, Kl 1.17

16 Ibuha bayale bulene to̱laihe howa ina bibahendehondo biamogo bia holene ngia tago halu ngiaabo halu ka.✡ Yo 3.34, Eb 1.6-8, Kl 1.19, 2.9-10 17 Ngode Datagaliwabehanda ibunaga mana Mosesehondo lamiyagola Mosese ibugua inahondo Mana lo wia hene. Biamogo bia holenebi henene lolenebi Moseseha ndo Yasu Kerisoha ngago ibugua inahondo ngule dalini.✡ Har 34.28, Man 4.44, Yo 8.32, Lm 3.24, 6.14, 10.4 18 Wali agali bibahendeme Ngode Datagaliwabe de nahendene ka. Ngode Datagaliwabe Igini mbiraore ibu Ngode Datagaliwabe dege howa ibu Abala howa ibugua inahondo Ngode Datagaliwabe walia hene.✡ Har 33.20, Md 11.27, Lg 10.22, Yo 6.46, 1 Ti 1.17, 6.16, 1 Yo 4.9, 4.12, 4.20

19 Yu agali Yarusalemeni hearume loma binigo mo miaga agalirubi Libai agalirubihondo lalu, Yone karia puwa ibuhondo í̠ ai kebe lalimu, lene.✡ Yo 5.33

Ani layadagua tigua ibuhondo hale hayagola 20 Yonehanda mbira do nahe tiga tigaore latagi halu lalu, Mbirali Dabo Helenego ibulebira lowinigo i̱ ndo ko, lene.✡ Lg 3.15-16, Yo 3.28, Ab 13.25

21 Tigua ibuhondo lalu, Anidago í̠ aibe. Í̠ Elaya kebe, lene.✡ Man 18.15-18, Mal 4.5, Md 11.14, 17.10-13, Yo 6.14, 7.40

Ibugua ladai bialu lalu, I̱ Elaya ndo ko, lene.

Tigua lalu, Ngode Datagaliwabe Mana Latagi Haga Mbirali ibulebira lowinigo ibu í̠ kebe, lene.

Ibugua ladai bialu, I̱ ogoni ndo ko, lene.

22 Ani layagola tigua ibuhondo lalu, Í̠ ogo ko, lalu langi. Ina dai buwa ina pudaba layaruhondo ibu agali ogo hea lalu lamuluma̱ya, lene. Í̠nime í̠ni agi lalu larilibe, lene. 23 Ani layagola Yonehanda Ngode Datagaliwabe mana latagi haga Aisaiahanda mbiwia ho winigo lalu,✡ Ais 40.3, Md 3.3, Mg 1.3, Lg 3.4

24 Ani layagola agali maru Perisi agalime pu laya handala ibiyaru tigua 25 ibuhondo lalu, Mbirali Dabo Helenego ibulebira lowini biagobi Elayabi Ngode Datagaliwabe Mana Latagi haga biagobi i̱ ndo ko larigodago í̠na baboraya biriligo irane agibe, lene.✡ Md 21.25, Yo 1.33

26 Yonehanda ladai bialu lalu, I̱na ibame baboraya biruli. Mbirali tí manda nabi kamigo ibu tí kamigoha ka. 27 Ibu maha ibalu ibu ala mo bamba holebirago i̱ ko kogonigo i̱na ibunaga ge su pu hadolenebi nakarulapeore kogoni, lene.✡ Yo 1.15, 1.30, Ab 13.25, 19.4

28 Tigua bi ogoni Iba Yodana ange ederayagi Bedani dindini Yonehanda baboraya bia halu henegoria lalu hene.✡ Md 3.6, Yo 10.40

29 Egerebalene Yasu ibalu hearia Yonehanda hondowa lalu, Ngode Datagaliwabenaga Nogo Sibi Igini o ibiragoni de handadaba. Ibugua wali agali bibahendeme ko biyago mo yai holebira, lene.✡ Har 12.3, Ais 53.6-7, 53.11, Yo 1.36, Ab 8.32, 1 Ko 15.3, 1 Pi 1.19 30 Agali mbira i̱ nahewaha henego ibu daligaore kago maha ibulebira larugo o ibirago, lene.✡ Yo 1.15, 1.27 31 Ibu agali ai ibulebirabe i̱bi manda nabi howa dege tí Isaraele wali agalime ibu ka manda bilimulo i̱na tí ibame baboraya bule ibiru, lene.

32 Yonehanda ibu walia halu lalu, Ngode Datagaliwabe Dinini ega malibu alego hariha howa dalialu Yasuni birayago de handaru.✡ Md 3.16, Mg 1.10, Lg 3.22 33 Ani birayagoni hondowabi i̱na ibu manda nabi dege hewaria Ngode Datagaliwabehanda, Í̠na ibame baboraya bule pu, layago ibugua i̱hondo lalu, I̱ Dinini daluwa agali mbiralini birarago hondolebere. Agali ogoni ibugua Dinini ogonime baboraya bia holebira, laya.✡ Md 3.11, Lg 3.2-3, Ab 1.5, 2.4, 19.6 34 Ani bulebira layadagua heneneore biyago i̱na deme handarugo ibu Ngode Datagaliwabe Iginiore ka lalu tí langerogoni, Yonehanda lene.✡ Md 3.17, 17.5, 27.54

35 Egerebalene Yonebi ibunaga talima piaga kiralibi ti hearia 36 Yasu piyaria Yonehanda de hendene. De hondowa lalu, Ngode Datagaliwabenaga Nogo Sibi Igini o poragoni de handadaba, lene.✡ Yo 1.29

37 Ani layago hale howa ibunaga talima piaga kira biago labome Yasu piyadagua talima pene. 38 Yasu ibu beregedalu de handa dai bialu hearia libu ibu talima ibiyago hondowa libuhondo lalu, Libu agi mo eberabibe, lene.

Ani layagola libugua ibuhondo, Labai, í̠ ani harilibe, lene. Labai inanaga bi lalu, Lawai haga.

39 Ani layagola Yasuhanda lalu, De hondole maibidaba, lene. Alendoreha ani lene. Ani layagola libu Yasu heba puwa ibu harayago de handalu Yasu heba ho hai hene.

40 Agali kira Yonenaga bi hale halu Yasu talima piyago agali mendego mini Anduru ibu Saimono Pida hamene hene.✡ Md 4.18-20 41 Anduru ibugua abaleore ibu hamene Saimono hondo pene. Puwa ibuhondo lalu, Mbirali Dabo Helenego ibulebira lowinigo biago handa walia hariba, lene. Mbirali Dabo Helenego mini mende Keriso.✡ 1 Sml 2.10, Iba 2.2, Yo 4.25 42 Ani lowa ibu hamene Saimono Yasu hearia haru ibini. Ibiyagola Yasuhanda ibu de handalu lalu, Í̠ Yone igini Saimono kegoni. Í̠ mini Sibasa holebere, lene. Sibasa bi mende lalu Pida. Pida inanaga bi lalu, Ege To̱le̱.✡ Md 16.18, Mg 3.16

43 Egerebalene Yasu ibu Galili dindi pole manda bini. Pilibi hearia hondowa ibuhondo lalu, I̱ talima íbu, lene.✡ Md 8.22, Mg 2.14 44 Pilibi ibunaga dindi Bedesaida wini. Anduru Pida libubi dindi ogoniali dege hene. 45 Pilibi ibugua Nadanele handa walia howa ibuhondo lalu, Mosese heneyangi ibugua Mana lowinigo gilibu ngarumebi Ngode Datagaliwabe mana latagi haga bamba henerumebi mbirali ibulebira lalu mbiwia ho wini gilibu wiagoni ibu hearia iname handa walia harima. Ibu Nasareteali Yosebe igini Yasuya, lene.✡ Pig 3.15, 49.10, Man 18.18, Ais 7.14, 9.6, Yar 23.5, Ese 34.23, Seg 6.12, Md 2.23

46 Ani layagola Nadanelehanda ibuhondo lalu, Nasareteni howa mbirali bayale mbira ibabehebe, lene.✡ Yo 7.41, 7.52

Ani layagola Pilibihanda ibuhondo lalu, De hondole mbaibu, lene.

47 Yasuhanda Nadanele ibalu hearia de hondowa lalu, Isaraeleali tigabi ibunaga bu miniha mo hondo holene mbira nawi o ibiragoni de handadaba, lene.✡ Iba 32.2, Yo 8.39, Lm 2.28, 9.6

48 Ani layagola Nadanele ibugua Yasuhondo lalu, Í̠na i̱ agua manda biribe, lene.

Ani layagola Yasuhanda ibuhondo ladai bialu lalu, Pilibihanda í̠hondo bi layago naleaha í̠ poge heago teneha beregoni handaru, lene.

49 Ani layagola Nadanelehanda ibuhondo lalu, Lawai haga í̠ Ngode Datagaliwabe Iginiore Isaraele wali agalinaga Handame Haga Kini kegoni, lene.✡ Md 14.33, 16.16, 27.42, Mg 3.11, Yo 12.13

50 Ani layagola Yasuhanda ibuhondo lalu, Í̠ poge heago teneha beregoni handaru larugo hale howa i̱hondo mini mbiraore wiribe. Hongo emene ogonigo mani hongo timbuniore de hondolebere, lene. 51 Ani lowa ibugua tihondo lalu, Heneneore larogo. Maha dahuliya andaga panga dugua ho ngagola Agali Hole Ibiyago kagoria Ngode Datagaliwabenaga dahuliyalirume iri dali bialu karia de hondoleberami, lene.✡ Pig 28.12, Md 4.11, Lg 2.9, 2.13