4
Change How You Tink
1 Dis, da message from Da One In Charge:
“You Israel peopo,
If you guys come back,
Den come back by me!
“You guys gotta throw way yoa pilau idol kine gods,
Fo me no see um no moa.
An you guys gotta no go all ova da place no moa,
From one bulaia kine god to anodda.
2 Wen you guys make one strong promise,
You gotta tell, ‘I shua Da One In Charge stay alive,
Same ting I stay shua I goin do dis.’
You gotta tell da trut fo real kine,
An judge da right way,
Keep all da rules,
An do wass right.
If you guys do all dat,
Den, wen diffren peopos tink bout me, Da One In Charge,
Dey goin tell, ‘Da One In Charge do good kine stuff fo us guys!’
An dey goin talk big bout me cuz dey know me, Da One In Charge.”
3 ✡ 4:3: Hos 10:12Dis wat Da One In Charge tell da Judah guys an da Jerusalem guys,
“Go come clean inside fo you be my guys!
Jalike you make ready yoa new fields dat nobody eva plow.
No throw da seed wea get plant wit thorns awready.
4 Cut skin yoa boys fo show dat dey da peopo a Da One In Charge.
Make same kine inside you,
Fo show dat inside, you da peopo a Da One In Charge, fo real kine!
Cuz if you guys not pono inside,
Den I talking to you guys from Judah,
An you peopo dat live inside Jerusalem town:
I tell, I no like show how mad I stay agains you guys,
An burn you up jalike wit fire!
But if you guys stay do real bad kine stuff still yet,
Den no goin get nobody dea fo pio dat fire!”
Real Bad Kine Stuff Goin Come
From Da North Side
From Da North Side
5 Da One In Charge tell: “Tell da Judah peopo!
An make da Jerusalem peopo hear dis!
‘Make noise wit da sheep horn trumpet all ova da land!’
Yell real loud an tell,
‘Erybody come togedda!
Us guys gotta reach da big towns dat get strong wall!’
6 Put up da flag fo tell oua guys run Zion side!
Run dea fo stay outa trouble now!
No jus stan dea!
Cuz I da one goin bring big trouble from da north side.
Dey goin wipe out you guys.
7 “Get one guy,
Jalike he one lion dat come outa da place he hide.
His army guys goin wipe out plenny peopos.
Dey wen go way from dea place
Fo come wase yoa land
An make erybody come bum out.
Yoa towns goin come all bus up
Cuz no mo nobody goin stay ova dea.
8 So, you guys betta put on burmbag kine clotheses,
Fo show you guys stay sad inside an crying,
Cuz Da One In Charge stay real huhu wit us guys.
An he still yet stay huhu!”
9 Dis wat Da One In Charge tell too: “Dat time, da king an da leada guys goin lose fight. Da pries guys goin come all bum out. Da guys dat talk fo God goin come futless.”
10 Wen I hear dat, I tell, “Eh! You dat stay in charge a me! Bummahs! Fo shua, you wen bulai dese peopo an da Jerusalem peopo good, wen you tell, ‘Eryting goin go good fo you guys!’ same time da odda army guys pull knife fo cut oua throat!”
11 Dat time dese peopo an da Jerusalem peopo goin hear, “Da army stay come! Dey jalike one hot dry wind come down from da high rocky places inside da boonies, an blow on top my peopo dat I love. But dis wind, not da kine wind dat ony blow da junks outa da wheat an barley, o dat clean stuff. 12 Dis wind mo strong den dat. Da wind come cuz I make um! An now, I da Judge, an I tell how I goin punish dem!
13 “Look! Da army guys, come jalike da clouds.
Dea war wagons come jalike one strong wind!
Dea horses run mo fas den da eagles fly.
Bummahs! Us guys goin come wipe out awready!
14 Eh you Jerusalem peopo, throw out da bad kine stuff from inside you,
Fo Da One In Charge get you guys outa trouble!
How long you guys goin make plan
Fo do wrong kine tings?!
15 Get messenja guys dat tell
Bout da bad kine stuff dat goin happen.
Da firs ones goin come from Dan town north side
Den oddas goin come from da hills wea da Efraim ohana guys live.
Dey tell:
16 ‘Tell da diffren peopos fo watch out!
Make shua da Jerusalem peopo hear dis too:
“Army guys stay come from one far place.
Dey goin camp all aroun da towns an watch!
Den wen time fo attack da Judah peopo,
Dey goin make big noise agains da Judah towns.
17 Da army guys goin make circle aroun da Judah towns,
Jalike wen da farma guys guard dea field.
Cuz da Judah peopo wen go agains me.” ’ ”
Az da message from Da One In Charge.
18 “Da way you guys live
An da kine tings you guys do
Make all dese tings happen to you.
Dis how I goin punish you guys:
Goin be real sore,
Jalike one sword dat stab yoa heart!”
Jeremiah Suffa Cuz God Punish His Peopo
19 Den Jeremiah tell, “Bummahs! I suffa plenny!
I plenny sore cuz I hurt inside.
My heart stay poun hard inside,
I gotta tell someting!
Cuz I hear da soun from da trumpets fo start fo fight!
I hear da army guys yell!
20 Get one big boom, den anodda!
All da land come bus up.
Fas dey wipe out my tents,
Mo fas den I can handle!
21 How long I gotta look da war flag
An hear da soun from da trumpets fo start fo fight?!”
22 Da One In Charge tell, “My peopo, dey do bad kine stuff an no bodda dem.
Dey donno who me.
Dey jalike kids dat no tink.
Dey no undastan notting.
But dey real smart fo do bad kine stuff,
Dey donno how fo do good kine stuff!”
23 Jeremiah tell, “I look da earth, jalike az one dream.
No mo shape. No mo notting dea!
I look da sky.
No mo light up dea!
24 I look da mountains.
Dey stay shake jalike get earthquake!
I look da hills.
Dey stay move dis side an dat side!
25 I look, an you know wat?!
I no see no mo peopo dea!
All da birds inside da sky wen fly away.
26 I look, an da land dat wen get plenny fruits,
Now ony get boonies dea.
All da towns stay bus up,
Cuz Da One In Charge stay real huhu.”
27 Dis wat Da One In Charge tell:
“All da land goin come bus up fo nobody live dea.
But I no goin wipe all dem out.
28 Az why da peopo all ova da world goin stay sad inside,
An da sky up dea goin come dark.
Cuz I awready wen tell wat I make one plan fo do,
An I no goin change my mind an do someting diffren.”
29 All da peopo inside da towns goin run
Wen dey hear da army guys stay coming on top da horses,
An da guys dat shoot wit bow an arrow.
Some guys hide inside da bushes.
Some guys climb up fo hide inside da rocks.
Da peopo dig out from ery town,
No mo nobody live dea no moa.
30 “All a you Jerusalem peopo,
How come you make jalike one jam up wahine,
No matta you goin get wipe out quick?!
How come you put on fancy kine red dress?
How come you put on gold jewelry?
How come you paint yoa eyes fo make um look big?
You dress up fo notting!
Da guys befo time dat get da hots fo you,
Dey tink you no good now. Dey like kill you.
31 “I hear somebody yell jalike one wahine dat stay hurt plenny!
She moan jalike she stay born her firs bebe.
Az da Jerusalem peopo yelling!
Jalike dey stay try fo breave but no can.
Jalike dey put out dea hands an tell,
‘Bummahs! Help me! I goin pass out!
Da guys dat like kill me stay hea!’ ”