10
1 Befo time da Israel peopo
Was jalike one grape plant dat grow an spread all ova.
Da fruits, same ting.
But wen dey come even mo right,
Dey wen build mo plenny altars fo odda gods.
Wen da land make even mo fruit,
Dey make da kapu stones fo da idol kine gods mo fancy.
2 Inside, dey like bulai peopo,
An now gotta punish dem
Cuz dey get da blame.
Me, Da One In Charge, goin bus up dea altars,
An wipe out dea kapu stones.
3 Den da peopo goin tell,
“Us Israel peopo no mo king,
Cuz us no mo respeck fo Da One In Charge!
But even if we get one king,
He no can do notting fo us guys!”
4 Dey make plenny fake promise
Dat no mean notting!
Dey make plenny deal,
But dey no do wat dey wen promise fo do.
Az why dey stay take each odda in front da judge.
Dey jalike da poison weeds
Dat grow inside one field dat somebody wen plow.
5 Da peopo dat live Samaria town stay bodda inside,
Cuz maybe someting bad goin happen
To da young cow idol kine gods in Bet-Aven town.
Da Samaria peopo goin come sked,
An dea pries guys fo da idol kine gods,
Dey all goin stay sad bout da calf statue too.
Befo time dey wen stay good inside,
Cuz da idol stay awesome.
But now odda peopo wen take da awesome idol one far place.
6 Dey goin take da idol Assyria side
Fo make one present fo da importan king ova dea.
Da Efraim peopo goin lose face.
An all da odda Israel peopo goin come shame too
Cuz dey wen trus da idol dey wen make from wood.
7 Da Samaria peopo an dea king goin come wipe out,
Jalike one small stick dat da watta carry away.
8 ✡ 10:8: Luke 23:30; JShow 6:16Da sacrifice places on top da hills nea Bet-Aven—
Dat mean “house wea peopo do wass wrong”—
Dey goin come wipe out.
Az wea da Israel peopo stay do da real bad kine stuff.
Thorns an da kine weed dat make yoa skin itchy
Goin grow ova dea an cova dea altars.
Den da peopo goin tell da mountains,
“Proteck us!” An tell da hills,
“Fall down on top us!”
9 ✡ 10:9: Local 19:1-30Da One In Charge tell,
“From da time wen yoa ancesta guys
Wen do bad kine stuff Gibeah side,
You guys still stay do bad kine stuff jalike dem!
Had one war Gibeah side fo attack
Da bad guys dat wen live Gibeah town!
10 So now, wen I ready, I goin punish da Israel peopo.
Odda nations goin come togedda agains dem,
Fo make dem come prisonas,
Cuz dey get da blame fo two bad tings dey wen do.
11 Da Israel peopo ack
Jalike one young girl cow dat somebody wen train
Fo step da wheat an barley fo da wind take out da junks.
But I goin do mo den dat.
I goin put one heavy yoke on top dat cow good looking neck,
Fo make da Israel peopo pull da plow.
Da Judah peopo gotta make da groun ready,
But firs, da Israel peopo gotta broke up da hard dirt.
12 ✡ 10:12: Jer 4:3Do da right tings! Dass da kine seed you guys gotta plant fo ony you!
An you stay tight wit me! Dass jalike da kine fruit you guys gotta pick!
Broke up da hard dirt inside you dat you neva plow yet!
Cuz stay time now fo come tight wit me, Da One In Charge,
Till I come teach you guys how fo do wass right,
Jalike da rain make da groun come sof fo good stuff grow.
13 But da stuff you guys wen plant—
You wen teach peopo how fo do wass wrong!
Az why you Israel guys wen harves all kine stuff dass not right!
An cuz a dat, you guys ony lissen da ones dat bulai you.
Cuz you guys trus da way dat you live,
An all da strong fighta guys you guys get.
14 Yoa peopo goin hear da loud noise from da war,
An yoa towns wit strong wall goin come wipe out.
Jalike wen Shalman wen wipe out Bet-Arbel, da time dey wen fight,
Wen dey throw da muddahs an dea kids down on top da groun fo kill um.
15 Same ting goin happen to you Bethel peopo,
Cuz you guys stay do real bad kine stuff!
An da day wen Da One In Charge goin fight
Wen start fo get light,
Da Israel king goin mahke!”