7
Guy:
1 Real beautiful, yoa feets inside yoa slippas!
Jalike yoa faddah one alii.
Yoa nice legs look jalike jewels
Dat somebody fo real kine know how fo make um.
2 Yoa piko stay roun jalike one bowl
Dat get da bestes kine wine in dea.
Yoa private place jalike one wheat pile
Dat get lilies all aroun um.
3 Yoa breases jalike two bebe deers,
Dass jalike twins.
4 Yoa neck jalike one towa, smooth jalike ivory.
Yoa eyes jalike da pools inside Heshbon town,
By da Bat-Rabbim gate.
Yoa nose jalike da Lebanon towa
Dat stay face Damascus town.
5 Yoa head awesome an tall, jalike Mount Carmel.
Real beautiful, yoa long dark hair.
Can make one king yoa prisona wit um.
6 Real beautiful an sweet, you.
You da one I love!
You make me stay real good inside.
7 You stan up real tall an nice,
Jalike one date palm tree.
Yoa breases jalike bunches a da fruits.
8 I tell, “I goin climb da palm tree.
I goin hold on da fruit.”
I like yoa breases be jalike bunches a grapes.
I like yoa breas smell nice jalike apples.
9 An inside yoa mout, az jalike da bestes kine wine.
Wahine:
An I like dat wine go strait to da one I love.
An go ova his lips an teet easy kine.
10 Da one I love, I stay his.
An ony me he like take!
11 Eh! You da one I love!
Go come, us go down da country side!
Us goin sleep wea get henna flowas!
12 Den us goin get up early an go da grape fields
Fo go look if da plants get flowa,
An if da flowas stay bloom,
An if da pomagram tree get flowa,
Den ova dea I goin make love to you.
13 Da mandrake flowas sen out dea sweet smell.
An get ery kine nice kine ting by oua doors,
Ol kine an new kine.
Dat I wen stash um fo you, da one I love!