6
Young Jerusalem Wahines:
1 You da mos beautiful one from all da wahines!
Wea da one dat love you go?
Wat way he wen turn,
Fo us go look fo him wit you?
Wahine:
2 Da one dat love me come down by me awready,
Cuz me, I jalike his garden
Wea da balsam perfume bushes grow.
He go thru da gardens fo eat,
An fo pick da lily flowas.
3 Da one dat love me, I stay his, an he mines.
He find his food wea da lilies grow.
Guy:
4 Honey Girl, you beautiful jalike Tirzah town!
You good looking jalike Jerusalem town.
You awesome wen I see you,
Jalike one army wit dea flags.
5 No look me in da eyes.
Cuz dey make me come weak!
Yoa hair jalike plenny young goats
Dat stay jump coming down from Mount Gilead.
6 Yoa teets jalike plenny wahine kine sheeps
Dat come up from da stream
Afta you wash um.
Dey match match jalike dey one twin.
No mo teet missing!
7 Yoa cheeks behind yoa veil
Look jalike da two halfs a one pomagram.
8 Maybe da king get sixty queens,
An eighty odda kine wifes,
An plenny young wahines!
9 But dis one, my dove, my perfeck one.
No mo nobody stay jalike her!
She da ony girl from her muddah,
She da one her muddah love da mos.
Da young wahines see her,
An tell dat she stay good inside.
Da queens an da odda kine wifes talk good bout her.
Frenz:
10 Dey tell: “Who dis wahine dat look jalike da morning light?
She beautiful jalike da moon,
Bright jalike da sun,
Awesome jalike one army wit dea flags!”
Wahine:
11 I go down by wea da nut trees grow,
Fo look da new tree shoots inside da gulch,
An fo see if da grape plants get bud,
An see if da pomagram trees get flowa.
12 Befo I know wat happen to me,
I feel jalike I stay riding
In one war wagon, da kine my peopo use.
Frenz:
13 Come back. Come back, you wahine from Shulam
Fo us guys eye you up!
Wahine:
How come you like eye me up, da Shulam wahine,
Wen I stay dance in da middo a two lines a dancers?