1 Uriyaku gorogoro Sei ma amiye utari naivo vene di varika vene ma tora vene tau vakoi egogo resi nirorotari reyadi Iesu bi umuyeyaganedi. 2 Ye ini vana ukita resi afei bosi Gavana* Bura bedakai ka Pontius nufa. Pilate di vanari aeyadi.

3 Kamini Judas, kaere bi siri reyo amiye, yaku veyo bi Iesu kota resi umuyegedi, ye beika reyo fafau iriyeduka resi mina siriva fore 30 moi dairisi Sei ma amiye utari naivo vene di varika vene ma amiye di tora vene masi✡ Acts 1.18–19 4 niyo, “Na bi vegu no reyaka, adina vegu buni no yokoi de amiye siri reyaka ma umuyegedi!”

Nikabai reyadi, “Una yaku beika regifa? Mina bi yi vanari!”

5 Ye Judas yaku mina fore Sei nivakena yava ideri maku feresi diyo. Mina usi disi iniye ini bauye misi uai reyo.

6 Idu Sei ma amiye utari naivo vene di varika vene yaku mina fore moisi niyadi, “Mina bi siri rena fore, mina resi Sei nivakena yava di foresa bi de aegifa, uni ago gira yaku niyo kana.” 7 Ye egogo resi nirorotari resi okina vene guri aebigika urena rido amiye di kono tu mina fore dudu voi reyadi. 8 Mina resi gua mina kono kefuka bi “Dava di nomu” toga vo nidedi.

9 Mina usi beika Sei di ago niyo amiye Jeremiah yaku niyo bi bae rama aeyo: “Ye siriva fore 30 moiyadi; mina bi Israel vene be yaku ini davana reyadi kana.✡ Zech 11.12–13 10 Ma urena rido amiye di kono kefuka mina fore dudu voi reyadi, Varika amiye di ago gira na rofu niyo kana.”

11 Kamini Iesu bi gavana di nemokori are reyo ma nikaitegasa niyo, “Ya bi Jew vene di kini ba?”

Ma nikabai reyo, “Ya bi mina niyo.” 12 Idu Sei ma amiye utari naivo vene di varika vene ma tora vene nitourage reyadiri, bi ago yokoi be nikabai de reyo.

13 Mina usi Pilate yaku nikaiteyo, “Ya bi gokaisanu ago no tau ya rofu nitourage rededi bi neideisa ba ide?”

14 Idu ago yokoi kava nikabai de reyo, ye gavana bi tururu iniye reyo.

15 Ye Ferei ebu rena irakuna neineiri ini toutou dudu, gavana bi amiye tau rofu ini ura kana dibura amiye yokoi erufuyaine nigamo. 16 Mirona ituari, dibura amiye no yokoi kaere bi amiye tau ina diba ini roka bi Iesu Barabbas.† Iesu Barabbas; bura bedakai Barabbas maka nufa. 17 Ye amiye tau egogo reyadiri, Pilate yaku nikaiteyo, “Goina bi ya rofu erufugida ma digo? Iesu Barabbas ba Iesu kaere bi Keriso vo nidedi?” 18 Adina Pilate bi sena diba niyo bi gonema dudu ini vanari aeyadi.

19 Kamini bi ini kota rena fata ameinu reyori, ini rema yaku ago nifeideyo: “Mina mokena rorobo amiye rofu bi beika yokoi ina rofu ga re. Adina na bi gua yaduka veyakari, nai mokena yaku esika esika na maro ina dada.”

20 Idu Sei ma amiye utari naivo vene di varika vene ma tora vene bi amiye tau gade niguba reyadi Barabbas bi erufuyainedi, idu Iesu bi umuyeyainedi usa niyadi. 21 Ye gavana nikaiteyo, “Mina amiye remanuri, yi ura bi goina ya rofu erufugida ma digo?”

Ma nikabai reyadi, “Barabbas!”

22 Ma nikaiteyo, “Mina dada bi beika Iesu, Keriso vo nidedi, ina rofu regida?”

Ina tau vakoi yaku niyadi, “Ina bi satauro ikoko reyaine!”

23 Idu nikaiteyo, “Beika resi, ina bi beika vegu no be reyo?”

Idu besa imuna niyadi, “Ina bi satauro ikoko reyaine!”

24 Kamini veyo beika yokoi de rego ma siboroka regi kora reyadiri, koru moisi amiye tau di nemokori ini vana koitesi niyo, “Mina amiye‡ Bura bedakai ka rorobo nufa. di muyena bi nai vanari de; mina bi yi vanari amedo!”✡ Deut 21.6–9

25 Ye amiye tau yaku nikabai reyadi, “Ini dava rausi rego bi una ma uni mida mida ni-ikigedi!”

26 Mina usi ina vene rofu Barabbas erufuyo; idu ago gira maro ma Iesu buburu vai reyadi ma satauro ikoko reyaganedi iya rededi vene di vanari aeyo.

27 Mina usi gavana di iya rededi vene gavana di ourefeidena yava tora ideri afei bosi iya rededi vene tau vakoi raka niegogo reyadi. 28 Resi ini varuka kutusi bou varuka kaka doba aku masi 29 yabo imiye maena moi mekuna resi kini kana ada bou ini adari aesi kodu moisi ini vana rama rofu aeyadi; resi ini budari efuka meimisi nikurugasa niyadi, “Jew vene di kini o!” 30 Resi ina fafau ayaka su resi kodu moisi ini adari ugamadi. 31 Kamini nikuruyadi koina niyori, bi varuka kaka doba kutusi iniye di varuka aku masi satauro ikoko regi afei boyadi.

32 Ye yakugasa bi Cyrene gagani amiye yokoi roka Simon baku resi bi ini satauro uakaiyaine niyadi. 33 Gagani roka Golgotha (ini adina bi “Ada girika di sana”) okisi 34 waini ma koru rusa iriyainedi maradi ma iri veyo, idu irina ura de reyo.✡ Ps 69.21

35 Ma§ Ma; bura bedakai Ma Sei di ago niyo amiye di ago moi rama aeyaine nufa. kamini satauro ikoko resi laki dudu isira reyadi ini varuka ini yokoi yokoi moisi✡ Ps 22.18 36 ameinu resi nari regamadi. 37 Ini ada odoro bi ini no nikake regi bi yomakai bura reyadi: “Mina bi Iesu, Jew vene di kini.” 38 Mina usi duma duma amiye remanu inasa satauro ikoko reyadi, yokoi bi ini vana rama rofu ma yokoi bi ini vana enana rofu.

39 Ye amiye kaere ini budari digamadi, bi nifafana regasa ini ada buro regasa✡ Ps 22.7; 109.25 40 nigamadi, “Ya yaku Sei nivakena yava ukero vau resi meda regodenuri dudusa akugiya vo niyo, ya kaya moi vegu ri! Ya Sei di mida vonisi, bi satauro gutuna soka rei de!”✡ Mt 26.61; Jn 2.19

41 Mina ida yokoi makari Sei ma amiye utari naivo vene di varika vene ma ago gira oteimana venesa ma tora vene ka nikurugasa nigamadi: 42 “Amiye be bi moi vegu riyo, idu iniye bi makai regi anua rego! Ina bi Israel di kini;** Bura bedakai ka vonisi nufa. satauro gutuna soka rei dego mamo ina rofu mokena vari gira aegifa! 43 Sei rofu mokena vari gira aedo; ferefo kumo Sei ina ura redo vonisi, bi gua moi vegu rigo. Adina ina yaku niyo, ‘Na bi Sei di mida!’ ”✡ Ps 22.8

44 Ma duma duma amiye kaere bi inasa satauro ikoko reyadi ka nifafana reyadi.

45 Meda nemoko tobo niyori, gagani tora noibanu bi mukuna yaku fono reyo boyo meda nemoko regodenu koina niyo. 46 Ma meda nemoko regode kanari Iesu bi ababa nigasa raka ni tora reyo, “Eli, Eli, lema sabachthani?” Mina di adina bi, “Nai Sei o, beika resi na ferei tavoi reyo?”✡ Ps 22.1

47 Kamini amiye be kaere bi ina atafu are regamadi mina neidesi niyadi, “Ina bi Elijah raka nido!” 48 Kamini amiye yokoi evade raga resi sipanisi moisi waini ru dudu moi vata baesi koduri aesi ina rofu iriyainedi maro.✡ Ps 69.21

49 Idu be vene yaku niyadi, “Kode, venadi kumo Elijah desi moi vegu rigo ba ide!”

50 Ma goroka tora dudu raka nisi ini vima maro.

51 Kamini Sei nivakena yava ideri biri rina varuka doba bi odoro gutuna doka rofu uesi rei nesi sireta remanu niyo ma kono yagayaga resi rabema okuyadi,✡ Ex 26.31–33 52 guri sana okuyadi ma Sei di vene tau sena muyeyadi mina dudusa dadi rae reyadi. 53 Ma Iesu di dadi rae rena usi, mina dadi rae reyadi vene mina guri feresi taoni kikifari boyadi ma amiye tau yaku veyadi.

54 Ma iya rededi vene di ourefeidena amiye tora ma kaere amiye inasa Iesu nari regamadi, bi kono yagayaga reyo ma beika tau vata niyadi mina vesi ori tora resi niyadi, “Rama mina bi Sei di mida!”

55 Ma rema tau mironari ka gaima gutuna are resi vegamadi, kaere bi Galilee gutuna Iesu usi baegasa moi aedegamadi.✡ Lk 8.2–3 56 Ini fogori bi Mary Magdalene, Mary, James ma Joseph†† Joseph; bura bedakai Joses nufa. di nono, ma Zebedee di mida mida di nono.

57 Uriyenau niyori, Arimathea gugura tau amiye yokoi ini roka bi Joseph okiyo; ina ka bi Iesu di usi dina amiye yokoi. 58 Pilate rofu bosi Iesu di roaita moigika usa niyo, ye maraganedi ago maro. 59 Kamini Joseph ini roaita moisi varuka buni ruaka dudu kumu risi 60 iniye di guri ruaka fore ideri goeyadi bi ini roaita mina ideri aeyo. Kamini fore tora moi kurevai resi guri di ida vena biri risi ferei diyo. 61 Ma Mary Magdalene ma Mary yokoi bi guri berou eta rofu amegamadi.

62 Dogo dogo rena meda‡‡ dogo dogo rena meda: Mina bi Jew vene ini Sabati meda di dogo dogo. usi ariri Sei ma amiye utari naivo vene di varika vene ma Pharisee vene egogo resi Pilate rofu bosi 63 niyadi, “Varika amiye, mokesifa mina ofa ofa amiye ini veguri amegasa niyo, ‘Meda regode koina nigori, na bi dudusa dadi rae regida,’ vo niyo.✡ Mt 16.21; 17.23; 20.19; Mk 8.31; 9.31; 10.33–34; Lk 9.22; 18.31–33 64 Mina resi ago gira ma kumo mina guri bi nari rei mona regedi bogo meda regodenu moigo,§§ Bura bedakai ka urusari nufa. ini usi dina vene yaku bosi ini roaita duma rei moi disi ‘Iesu bi muyena gutuna dadi rae reyo,’ mina amiye rofu nigedi baebu. Mina metonari ofa ofa sina bi ouresi kana de, idu no iniye iniye.”

65 Ye Pilate yaku ina vene rofu niyo, “Yi nari rena vene moi bogedi guriri yi diba dudu nari rei mona refa.”

66 Ye bosi guri di biri riyo fore dudu mina biri ri mona reyadi nari reyainedi amiye aeyadi.