1 Kamini meda 6 koina niyori Iesu yaku Peter, James ma ini dubuini John afesi omuna tora yokoiri inaike maka boyadi.✡ 2 Pet 1.17–18 2 Mironari ina vene di nemokori ini roaita idana niyo. Ini seira bi meda kana kikiyo, ma ini varuka bi vabara kana feyo kamanika iniye niyo. 3 Ma Moses ma Elijah ina rofu ogau nisi Iesu sa sina nigamadi. 4 Ye Peter yaku niyo, “Varika amiye, bi buni una bi minari! Ye ya ura regiya vonisi, bi minari karaga regode akugida* akugida; bura bedakai akugifa nufa.—yokoi bi yi, yokoi bi Moses di, ma yokoi bi Elijah di.”

5 Mina nigamori, seuya vabara kama resi ina vene bou riyo ma ago goroka mina seuya gutuna desi niyo, “Mina bi nai uka maida Mida, kaere ina rofu ada tora reida—ina bi neidefa!”✡ Gen 22.2; Deut 18.15; Ps 2.7; Is 42.1; Mt 3.17; 12.18; Mk 1.11; Lk 3.22

6 Ini usi dina vene mina neideyadiri, ori resi ini seira kono rofu aesi raudai reyadi. 7 Ma desi avaka moisi niyo, “Ori ga resi dadifo!” 8 Ma dadisi ne odoro reyadiri, amiye yokoi de veyadi idu Iesu maka.

9 Ye omuna degamadiri, Iesu yaku ago gira magamo, “Mina yaduka kana veyadi bi amiye ga nifa, bogo Amiye di mida bi muyenari gutuna dadi rae rego mamo.”

10 Kamini ini usi dina vene yaku nikaiteyadi, “Ye beika resi ago gira oteimana vene yaku nidedi Elijah siko deyaine?”✡ Mal 4.5

11 Ye nikabai reyo, “Rama Elijah siko desi beika tau dudusa moi dogo rei mona rego. 12 Idu ya nida, Elijah bi sena deyo, idu vei mama de resi ini beika mokeyadi kana ina rofu reyadi. Ye Amiye di mida ka ini vanari esika moigo.”✡ Mt 11.14

13 Mina resi usi dina vene vei mama reyadi ina bi John Baptist nigika niyo.

14 Kamini amiye tau gade rofu baeyadiri, amiye yokoi baesi Iesu di budari ini efuka imisi 15 niyo, “Varika amiye, nai mida rofu iriyeduka re, adina bi ada gauka amiye ma esika esika tora gade moido. Adina uru tau gade ita mokari ma koruri keto redo. 16 Ye yi usi dina vene rofu afei baeyaka, idu moi buni rina anua reyadi.”

17 Ma nikabai reyo, “Ya gua mokena vari gira de aena ma mokena no vene, gokaisanu ari doba yasa amegida? Meda gokaisanu yasa moimai regida? Na rofu afei baefo!” 18 Ye vima no besenai ago maro ma yakuyo ma mina meda nemokori maka mina mida moi buni riyo.

19 Mina usi ini usi dina vene sui dudu Iesu rofu baesi nikaiteyadi, “Beika resi bi meki rena anua reyafa?”

20 Ye nikabai reyo, “Yi mokena vari gira aena bi keika† keika; bura bedakai koina nufa. dada. Adina rama ya nida, yi mokena vari gira aena bi mastadi di yoya kana vonisi, bi yomina omuna rofu nigedi, ‘Ya kaya mironari etagae ri,’ vo nigediri, mina omuna minari gutuna rekirei bogo. Ye beika yokoi ya rofu bi anua regedi!”‡ Bura bedakai ka nanaka 21 nufa: 21 Idu mina kana bi usa usa nina ma iruku oyo rena maka meki regi anua regika; yokoi be bi de (Mk 9.29 baku re).✡ Mt 21.21; Mk 11.23; 1 Cor 13.2

22 Galilee ri egogo reyadiri,§ egogo reyadiri; bura bedakai amegamadiri nufa. Iesu yaku ina vene rofu niyo, “Amiye di mida bi amiye di vanari siri regika kaira niyo ma 23 umuyegedi ma meda regodenuri dadi rae rego.”

Ye ini usi dina vene iriyeduka yaku no niyadi.

24 Iesu ini usi dina venesa Capernaum ri okiyadiri, bi Sei nivakena yava di takesi butu rena vene Peter rofu baesi nikaiteyadi, “Yi oteimana amiye bi Sei nivakena yava di takesi mado ba ide?”✡ Ex 30.13; 38.26

25 Ina yaku niyo, “Yo.”

Peter yava ideri baeyori, Iesu ina siko ago niyo, “Simon beika mokeisa? Kono di kini bi ini davana ma takesi bi kaere rofu butu rededi—iniye di ini amiye rofu ba amiye bedakai rofu?”

26 Ma nikabai reyo, “Amiye bedakai rofu.”

Ye ina rofu niyo, “Makai bi ini amiye rofu bi de moigedi. 27 Makai bi buni de mina vene di uka bi moi kenoka renadi, ye moka daidai torari nesi yi kimai makugiya. Ouresi oyena moigiya mina moisi ini vena moi rafo resi siriva fore baku regiya. Mina moisi nai ma yi kana bi mina fore ina vene magiya.”