24
1 Kpwa utu wani ye Mwenye Nguvu Zosi kapanga wakati wa kuamula?
Na mbona nyo ammanyao taaona zo siku ambazo Mlungu andaahendera haki?
2 Atu nkusengeza miphaka,
na kurisa mifugo achiyoyiiya.
3 Nkufuta anachiya punda aho
na kuhala ngʼombe ya gungu ikale mzamana.
4 Nkusukuma anachiya ili aatuluze mo njirani
nao nkulazimisha achiya a yo tsi, adzifwitse.
5 Lola, dza maforo ko jangbwani
nyo achiya nkutuluka kpwendaendza chakurya,
nkuphaha chakurya cha ana aho kula jangbwani.
6 Nkutsembwesa mtsere mindani mwa atu anjina,
na zabibu kahi za minda ya atu ayi.
7 Aho nkulala usiku wosi chitsaha, bila nguwo,
chisha taana nguwo za kudzibwiningiza asipigbwe ni mnyevu.
8 Nkulwama na mvula za myangoni,
na kugadzamira myamba ili aphahe chivurivuri cha kuowa mvula.
9 (Kuna atu ambao anahala kpwa nguvu anachiya asiokala na ise zao kula nyahoni mwa nine zao,
na kuhala mzamana ana atsanga a achiya.)
10 Nyo achiya nkunyendeka chitsaha, bila nguwo,
na kuvuna nganu ya atu kuno anahirika.
11 Nkuminya zaituni za atu ayi aatengezere mafuha,
na kuminya zabibu kuno anafwa chiru.
12 Kuula kpwa atu afwao kunasikirika mo mudzini,
na nyo achiolumizwa anaririra kuterywa
ela Mlungu kaphundza mavoyo gao bii.
13 Kuna aremao mwanga,
asiomanya njiraze,
wala kuzigbwira.
14 Muolagadzi nkulamuka chimirimiri,
ili aweze kuolaga achiya na agayi,
na usiku akakala dza muivi.
15 Dzitso ra mzindzi nkugodzera jiza rihande,
nkudzigaluza uso na kuamba,
‘Takuna mutu ndiyeniona.’
16 Usiku aivi nkuvundza na kuinjira nyumbani
nako kuchicha nkudzifungira akalala,
taamanya mwanga bii.
17 Mana chilungulungu cha jiza kpwao ni ligundzu,
mana taaogopha mambo ga kutisha gahendekago jizani.
18 Munaamba, ‘Anaangamika dza povu rinavyophirikpwa ni madzi,
nyo mtalo wao wa yo tsi ukalaniwa,
hata taphana aphiyaye kpwendahenda kazi kpwenye minda yao ya mizabibu.
19 Dza ukame na dzuwa riyayushavyo barafu,
ndivyo ko kuzimu kuahalavyo nyo ahendao dambi.
20 Andayalwa ni nine zao enye
mabulu gandaaona kukala mtswano,
kpwa hivyo uyi undavundzwa dza muhi.
21 Atu ayi nkuonera achetu tasa,
na taamuhendera manono mchetu gungu.
22 Ela Mlungu nkuausa enye nguvu kpwa uwezowe,
dzagbwe nkuunuka, ela taana uhakika wa kpwenderera kukala moyo.
23 Iye nkuahenda anaomuadamira akale salama,
ela matsoge ganalola njira zao.
24 Ayi nkuongokerwa kpwa muda tu, chisha badaye nkuyaya,
nkunyala na kuangamika dza kodza,
vitswa vyao nkukatwa dza masuche ga nganu.’
25 Ichikala si hivyo ni ani ndiyeniamba nina handzo,
na kuonyesa kukala nigombago si ga kpweli?”