23
Ayubu anauza Mlungu akuphi?
1 Phahi Ayubu wajibu achiamba,
2 “Hata vivi rero ncherelalamika kpwa sonono,
dzagbwe naula, ela anaenderera kunitiya adabu.
3 Ningemanya Mlungu aphahikanapho,
ningephiya pho asagalapho!
4 Ningephirika lau rangu mbereze
na kumuambira manji ga kudzihehera.
5 Ningemanya go ndigokujibuni,
na ningeelewa go ndigogomba.
6 Dze, angehumira uwezowe mkpwulu kulumbana nami?
Hata! Iye angeniphundza vinono.
7 Phapho mutu asiye na ila angelumbana naye,
nami ningephahikana sina kosa, na ningeikpwa huru ta kare na kare.
8 Lola, náphiya mlairo wa dzuwa, na kala kako,
nchiuya mtswerero wa dzuwa, simuonere.
9 Namuendza ariphokala kazini ko vurini, ela siyamuona,
nagaluka mwakani, ela simuonere.
10 Ela iye anamanya yo njira niigbwirayo,
ndiphokala akanipima, nindatuluka dza zahabu swafi.
11 Chigulu changu chikalunga nyagoze,
nikalunga njiraze na sidzangbweaphuka.
12 Sidzangbwericha kugbwira malagizo ga madomoge,
nikatundza maneno ga kanwaye kuriko chakurya.
13 Ela kabadilika ngʼo, ni ani awezaye kushindana naye?
Iye nkuhenda cho alondacho.
14 Mana andakamilisha go arigonipangira,
chisha achere na manji dza gago mwakpwe achilini.
15 Kpwa hivyo naogopha niimapho mbereze;
niazapho gosi gaga, nkumuogopha.
16 Mlungu akahenda moyo wangu ufwe purungire,
na ye Mwenye Nguvu Zosi akaniogofyera,
17 ela sinyamala kpwa sababu ya ro jiza,
na chilungulungu cha jiza chichobwiningiza uso wangu.