Bibeli Luayãtaalá Isaia 18

Yã́ pↄ́ a Etiopiↄ le

1 Ó'o! Etiopi bùsu swade fìonde gbɛ̃́ↄ!

2 Aaì zĩnaↄ gbaɛ ísiaa,

aaìↄ bɛ ía ń kɛfu gó'ilɛnaↄ.

Zĩna kàsakasaↄ,

à gɛ́ bui gbã̀a mɛ̀ yↄ̀lↄ pↄ́ wì vĩakɛnɛ́ gupiiuↄ kĩ́i,

bui pãsĩ pↄ́ aaì ↄ̃zↄ̃ ń ibɛɛↄwa mɛ́ swaↄ ń bùsu zↄ̃̀ɛzↄ̃ɛↄ.

3 Á dṹnia gbɛ̃́pii,

á gbɛ̃́ pↄ́ á kú tↄↄlɛↄ,

tó wà gilili pɛ̀lɛ gbɛ̀sĩsĩ musu, á e,

tó wà kuupɛ̀, á ma.

4 Dii òmɛɛ à mɛ̀

áↄ gugwa za a kúkĩi kílikili,

lá ĩatɛ̃ ìↄ pipi tↄↄlɛwawa,

lá lou ìↄ ku masai pↄkɛkɛgↄↄwa.

5 E wàↄ gɛ́ pↄkɛkɛi,

e vɛ̃ɛvu àↄ gɛ́ láai a nɛsoenaↄ kã́kã,

a a gↄ̃naↄ zↄ̃zↄ̃ ń fɛ̃nkĩnio,

a a ↄ pↄ́ a tàↄ ɛ́'ɛ kↄ́lɛ.

6 Wa ń tó gbɛ̀sĩsĩ bãↄ ń wàiↄ blɛ ũ,

gbɛ̀sĩsĩ bãↄ saɛ bleńnↄ,

wàiↄ i buziɛbleńnↄ.

7 Gↄↄ bee bui gbã̀a mɛ̀ yↄ̀lↄ pↄ́ wì vĩakɛnɛ́ gupiiuↄ,

bui pãsĩ pↄ́ aaì ↄ̃zↄ̃ ń ibɛɛↄwa mɛ́ swaↄ ń bùsu zↄ̃̀ɛzↄ̃ɛↄ

aa mↄ Dii Zĩgↄ̃de gba pↄ́ Siↄna gbɛ̀sĩsĩ musu,

gu pↄ́ aà tↄ́ kuwàpiu.