Bibeli Luayãtaalá Isaia 17

Yã́ pↄ́ a Damasi le

1 Yã́ pↄ́ Dii ò Damasi musun kɛ: Gwa! Damasi aↄ dɛ wɛ̃́lɛ ũ lↄo,

aↄ dↄdↄaa lán zɛ̀tɛ̃ kwɛawaɛ.

2 Aloee wɛ̃́lɛↄ gↄ̃ bɛzia ũ,

aↄ dɛ pↄ́ↄ kákĩi ũ.

Gbɛ̃e aↄ ku we

kɛ́ a vĩa gbasa pↄ́piↄ kũo.

3 Ɛflaiũ buiↄ wɛ̃́lɛ bĩ́ideↄ aↄ ku lↄo,

Damasi kpala aↄ ku lↄo.

Sili gbɛ̃́ kĩninaↄ gↄ̃ lala'onaↄ ũ lán Isailiↄwaɛ.

Dii Zĩgↄ̃de mɛ́ ò.

4 Zĩ́ bee Yakↄbu buiↄ gawi kↄ a ɛ́,

an namablea a midɛ.

5 An bùsu a gↄ̃ lán bua pↄ́ wà a pↄ́ kɛ̀kɛ wà ↄmàlɛuwaɛ,

lán Lefai guzulɛ pↄ́ wà a pↄ́ kↄ̃nwɛ̀wa.

6 Kási a kↄ̃napi a gi gↄ̃ yↄↄ

lán ku pↄ́ wa kɛ̀ a nɛ́ mɛ̀n pla ge àaↄ̃ gì gↄ̃̀ a musu

mɛ́ a nɛ́ mɛ̀n síiↄ̃ ge sↄo gì gↄ̃̀ a gↄ̃n nɛdewawaɛ.

Dii Isailiↄ Lua mɛ́ ò.

7 Gↄↄ bee gbɛ̃nazĩnaↄ wɛ́ aↄ pɛ ń Kɛnawa,

aa wɛsi Isailiↄ Lua Kuaadoadelɛ.

8 An wɛ́ aↄ ku sa'okĩi pↄ́ aa bò ńzĩaɛↄwa lↄo,

aa wɛdↄ lí pↄ́ aa pɛ̀lɛ tã́a ũↄzi lↄo ge ń tulaletikatɛakĩiↄ.

9 Gↄↄ bee an wɛ̃́lɛ bĩ́ideↄ a gↄ̃ bɛzia ũ,

aa gↄ̃ daaĩa lán Amↄleↄ ń Iviↄ wɛ̃́lɛↄwa

gↄↄ pↄ́ aa ń tó Isailiↄnɛ.

10 Asa Lua á Suabana yã́ sã̀águɛ,

Lua á gbãa á ulɛkĩi yã́ i dↄáguo.

Ayãmɛto a dↄ̀ↄsagbɛ pɛ̀lɛ,

a buade pɛ̀ lá buipãleↄ ì kɛwa.

11 Zĩ́ pↄ́ á bà a kaa lìai,

a gu dↄ̀ á tò à bↄlↄbↄ̀.

Kási á pↄe e weo,

sema gyã ń yã'ↄ̃ma láasaio.

12 Ó'o! Buiↄ zↄa dↄ dasidasi

lán ísia kↄ̃fĩwa.

Ó'o! Gbɛ̃nazĩnaↄ kĩ́i dↄ

lán izↄ̃ↄsukaawa.

13 Tó buiↄ kĩ́ipi dↄ

lán izↄ̃ↄsukaawa màa,

Dii a ń lele, aai bàalɛ ta zã̀zã

lán ése ṹa pↄ́ ĩ́ana sɛ̀lɛ sĩ̀sĩ musuwa,

lán ĩ́ampuuvu pↄ́ zàa'ĩana gɛ̃̀ò zɛ́awa.

14 Tó oosi kɛ̀, sↄ̃kɛ̃ngu a mɛ á kɛ́!

E gu àↄ gɛ́ dↄi yã́ a láa.

Gbɛ̃́ pↄ́ aaì wá pↄ́ↄ sɛ́lɛↄ baan we,

gbɛ̃́ pↄ́ aaì wá pↄ́ↄ naaaↄ zian we.