1 Ánutufa qufaqa qinée Pauroosa ásauku mundírana Yísufa niqiqoo fasiqausaikamambi márunausa máridaqa. Qinée qeeqá qíkaqaafasaa Timootisandíri maa-akarána rúmannimaqeeqa. Ínnee Koorinti máqannaa Ánutuna ufara suqímariasa faqa aiqáma Akaia máqa maaqaki Ánutuna ufa írimariasa faqa ínni aiqáma nímandaidaqa.

2 Ánutuna ásauku mundírana maasá karaambáiqa Yísuna faqa narí ákoona Ánutuna faqa miqandá ámiqi ámiqira afaarirana faqa naundurá asooárana faqa ínniki máriani.

3 Ásauku mundírana ínnisaimbaqa karaambáiqa Yísuna akoofa Ánutufa minára maasá aiqámausa dúfi dúfi qímamaqaaqa, ínnisaimbaqara ámuqusimari qíkoofa ínnisaimbaqa qífaueemárifa máridanoo, aiqáma dadaaqírafa mifínnaindari qúmimarifa máridanoo ínnisaimbaqa miná kai dúfi dúfi qímamaqaaqa. 4 Ínnisaimbaqa qeeqá daundura ummaaraki márunnana Ánutufa mi-ummaaránaki dadaaídanoo. Ínnisaimbaqa óosana óosana ummaaraki máriasa Ánutufa ínnisaimbaqara misá dadaaqiaqée qímaseenoo ínnisaimbaqa náaree dadaaqinau. Misá dadaaqídaqa Ánutufa ínnisaimbaqa dadaaqírana qímuna miná kai maasá qumáree quándaki minánnai dadaaqídaqa. 5 Ásauku mundírana moómoo aupúraranaki márufaqa maasá faqa minakí márunanoo aupúrarana maasá faqa náida qíminoo. Miqí kai ínoo ásauku mundírafa narí dadaaqírana faqa firaaqóo maasá náida qímifaqa.

6 Maasá Yísuna ufasáara aupúrarana máraidaqa sía fífaufau máraidau, ínni dadaaqírana faqa innaarúnai asumu márirana máraaqeera aupúrarana máraidaqa. Ásauku mundírafa maasá dadaaqífaqa maasá minásaaqaraana qumáree ínni faqa dadaaqídaqa. Ínnee maasá mároo aupurarana maraséeqa minakí ubíqafiqa máraqa fuaqéera dadaaqídaqa. 7 Ínnee maasá aupúrarana áti mároondee kai íqa maasá Yísufinnaindaraa dadaaqírana ati faqa máreefaranoo. Maasá minára iriséeqa maasá írirafa ínnisaa mundínoo máridanoo sía minnísaananoo maqásaa áqufuanoo.

8 Maasá Asia máqa maaqaki fíqu fíqu ímariafananoo firaa aupurarana qímufaqa minára ínni náaqoo áuqaida qímannimidaqa. Mi-aupuraráfa firaaqóo ummaara qímufaqa maasá dóo maqee kúqirarammidaqee qíafannana. 9 Maasá misára kuqá dárira ufa dóo qíma afeekaikíaafoo qúnaqa sía dária. Mi-qimaarusiráfa sía fífau kambíqeenoo Ánutufa qumeé dadaaqunara miqímmasoofaqa sía qinée qeeqára afeeka fasiqafée qianáura qeeqá íriranara Ánutunasaa kai mundúanifee qímaseenoo qumeé mi-qimaarusiránara kambíqaanifee qufanoo kambíqanau, kúqiranakinaana uqéeree marífa dadaaqufaqa minakíqari máridaqa. 10 Mifá firaa qimeekaranakínaana maasá uqéereeqee qísaifaqa máridaqa kafáa miqí kaimmíannoo. Mifá kafáa maasá minakínaana uqéereeqeenoo quqáqisáifaqa sía rufíaida minára írirafa minásaa rusínoo máridanoo. 11 Miqí marínara ínnee moómoosa maasára innaaru qífanoo Ánutufa maasá ámiqi ámiqima qísainaqa moómoosa miná qáfamasee quándaki Ánutufinnai dúfi dúfi qifáranoo.

12 Óo Koorinti máqannaasa maasá maqúsa maqusa nídaqa ínni faqa máriafananoo qiní dáakirafa írirafa maaqímandee qímaqimidanoo. Maasá ínni faqa máriafananoo sía faiqí írirafa maasá uqaqífiqanau. Ánutufa dadaaqufaqa nárikinaana akooqóo ánoona ufa faqa nóori runúsee áuqarafa faqa, Ánutuna áfaarira ámiqi ámiqira afeeka faqa mifáuqa kai rakísiqimaqee márifaqa ínni faqa máridaqa minára maasá irisée nasurídaqa. 13 Maasá ínnee ásaana rímariana faqa írimariana faqa amana kái ákara rúmannimaqaidaqa. 14 Maqee ínnee akaqáinaina ínnee sía ámiqimmasee írimariafanoo. Mi-ainaináusara ámiqimasee íriaqeera dídidanoo. Ínnee mi-ainaináusara ámiqimasee iriséeqa, karaambáiqa Yísufa qúmuaninna faasaannasaa maasá ínniara nasurífandinnandee kai íqa ínnee maasára nasurífaranoo.

15 Qinée minára iriséeqa kúqaa kambíqannoommifoo qímasee qaara kari ínni maqúsai óonuree qaara kari idaaqámánnisararee qímasee sía fíqa. 16 Qinée maíndari Maseedoonia máqa maaqai fídaqa ínnee iannái fí nínda fee fíraree qíqa kafáa mindári ánidaqa ái níndafararee qímaseeqa sía fíqa sía níndafeeqa. Yudeea máqa maaqai óoru fídaqa ínni dadaaqírana máraanauree qímaseeqa ínnee iannái sía fíqa. 17 Qinée fírara qúnnanara ínnee qiníara fúrufarirafee fee qídee, ínnee qiníara narí áidiramau kai fídanoofee fee qídee qinée ínnee iannai fírara qúnnanara ínnee qiníara qaaraikí márifee fee qídee. 18 Ánutuna áfusaa márida ínnee iannai fírara sía qaara irirafa qiníki máridanoo.

19 Ásauku mundírafa Yísufa Ánutuna ámaakuara Sirasifa faqa Timootifa faqa qinée Pauroosa faqa qímannimimarúnnana sía mifá qaara irirana faqáafa máridanoo, mifá Yísufa maqásaa fasiqa maasára sía qaara ufa qímarifa eedóo kai qímarifa máridanoo. 20 Mifá kai Ánutuna moómoo ufa maasára qíma afeekaikámasee mapukírafa máridanoo. Minára faiqí ánaasee Ánutunara amooqída innaaru qídaqa ásauku mundírana Yísunannai maasá Yísuna ufa írimariasa aiqámausa eedóo qímasee ínni dadaaqídaqa. 21-22 Ánutufa narí uqanna ínni saimbaqa ásauku mundíranaki márinara dadaaqifaqa ínnisaimbaqa minára kúqaa ánoonee qídaqa. Mifá ínnisaimbaqa narí saikaki mara quqáraree qímaseenoo narí ásauku ínnisaimbaqasaa mundúseenoo utáaqamaseenoo naríndi fee qímaseenoo narí náaquqara andeeqara maraquna maasá qímuqusa óoki quqáseenoo kásooqaqee innaarúnai nímira ainaina áti kai maqee uqannífiqaidanoo kásooqaqee innaarúnai ánoona firaaná nímiannoo.

23 Qinée Ánutuna áfusaa máridaqa mifá qiní qímuqusaki írimarifa márifaqa sía únna qímasee maaqí qímasee qímannimianaura. Qinée Asia máqa maaqai óonuree anirée másee ínni Koorinti máqannaasaki sía fíqa. Nisaurírana nímianoo qímasee qeeqá kai sía fíqa. 24 Maasá sía ínniara miqímmasee maaqímmasee qiaqée qídaqa dóo ínnee mapukúsee Yísuna saqárikiranaki máriafanoo, ínnee sía nisaurírana máraaqeera asasíranaki máriaqeera dadaaqídaqa.