1 Qeeqá írirana maaqí qímasee íriqa. Sía qinée nisaurírana nímiqa misíannai kaifáa fúannee qíqa. 2 Qinée nisaurírana nímiananoo yáfee quandáfi asasírana qiní qímiannoo fee sía moó fannoo asasírana qímiannoo qiqá ufasáara nóori runímariasa kai máridaqa aiqáma nóori runúsee márifoora.

3 Minára qinée mi-pasána akará rúmannimaqeeqa. Qinée qiní asasamáqisáinausinnai óonureeqa nóori runírana nímianoo qímasee pása kai ákara rúmannimaqasaanaqa ínnee ínneeqa áaqara óosana andeeqásaifaqa qinée óoruraanaqa ínnee asasíranaki márifanoo ínnee qiní qifaaqa faqa asasifaranoo. 4 Qiní qímuqusa firaaqóo uqanna ínniara qímuqusifaqa ikíraqaidaqa ákara rúmannimaqeeqa, sía ínni nifaaqa rumbáanifeera ákara rúmannimaqeeqa qeeqá firaaqóo ínniara qímuqusinara íriaqeera ákara rúmannimaqeeqa.

5 Ínni Yísuna ufa írimariasakiqari faiqí moó fannoo narí áaqaranannai ínniki moómoosa nifaaqa rumbárana níminau sía qifaaqa rumbárana qiní qíminoo ínni nifaaqa rumbárana nimiqaifaqa qinée nisaurírana firaaná nímianoora minára sía nifaaqa rítianauranoo. 6-7 Dóo ínnee moómoosa áaqamáqoo fasiqana Yísuna ufara suqíranakiqari aqiqámasoona árirafa dóo amanaikámambinoo dóo narí mandáinaina minníseenoo dóo ínnee miná mandáinaina ákiaqara minní áisasee idaaqámamaqaaqa, ínnee sía miqífanoo firaaqóo ákooqainanoo Yísuna ufa minní uqannáseenoo káasau uqáandoora. 8 Ínneeqa mi-fasiqánara kúqaa nímuqusianara óonu qímamifanoo íriani.

9 Minára kai qinée mi-akarána rúmannimaqeeqa. Qinée ínniara naamúa qúnna ufana írifaree sía fee írifaree qímasee nimanamándee qáfarara pása ákara rúmannimaqeeqa. 10 Ínnee Koorinti máqanaasa mi-fasiqána mandáinaina ákiaqara minnísee moodáanaki kífaqa qinée faqa miná mandáinaina minnísee miná faqa moodáanaki kianáura. Ínnee moo mándainaina mandáikamma qímaqoonara qinée ínni minníseeqa, mikarí moo mandáikamma qímaqaqau fee sía fee miqímma qímaqaqau fee minára qinée ásauku mundírana áfusaa márunausa ínniara irisée minnínisaidaqa. 11 Maasá Sadannana mandíriranara íridaqa mifá maasá úridaaqáraandoora mandáinaina máraana akiaqara minínniseeqa kafáa moodáanaki kíaqa.

12 Qinée Pauroosa Asia máqa maaqaki fíqu fíqu ídaqa Tarooasa máqusai óonureeqa ásauku mundírana ámiqira fasaasa ufa qímannimiraree qíafananoo Karaambáiqa fáasai kooqí atúqeenoora foo ínoo márufaqa mi-maqusánaki saiká ámiqimasee firaaqóo uqéeraqiafana. 13 Miqóo máridaqa maasá qíkaqaafasaa Titusafa ínni maqúsaindari aní ífoo qímaseeqa randáidaqa sía paqúriafannanara qímuqusa mandáikufaqa miqóoqaraasa nímandamásee Maseedoonia máqa maaqaki minára randárara fiqíafana.

14 Óo Ánutunara dúfi dúfi qiaqa. Ínnisaimbaqa ásauku mundírana faqa moodáanaki kámambi máridaqa minakíqari Ánutufa narí nárúnakinaana Ánutuna asumu fíriara foora ínnisaimbaqa nífiqee ásauku mundíranara kaanina maréeqa idíreeqa máree maqúsaira foora míniqaasa rákiranara foora úriqararausa máridaqa. Miqóoqari ínnisaimbaqa Ánutufa maréeqeenoo ásauku mundírana ufa ámiqira afundara foora nímifaqa aiqáma ánaamurunni dáraaniqa qímannimiqa nídaqa.

(Óoqai Pauroona áukuana Roomma máqannaasa sundíauqa faqa misá karaambáiqauqa faqa namuqáa maqúsai óonureeqa misá naruséeqa misá aináina faqa faiqí kaakadi nárirausa rumbámareeqa náriqa maqúsai nífiqamaree fiqau. Náriqa maqúsa adeedí óonureeqa padí máfufaqa nári indaarú fíqa rumbáqoosa ootúpa ootúpa rumbára rumbáseeqa nífiqee nárirara maqúsa qámbaanai nárirara nífiqee fiqau. Rumbárausa nínaaqiana áfundi marú ainaina idá muqúru maréeqa fímarufanoo mi-afundáfa misá qámbaanamma áfundi márinau. Miná anaaqíana sundía firaafá Karaambáiqa misá sufáfaqa máree finau. Rumbáqoosa mi-afundánara maasá kúqunna afundafa qídanoo fee qiqau. Sundíauqa faqa káiqeesa faqa mi-afundiránara ámiqira afunda fee qiqau.)

15 Pauroofa minára iriséenoo Koorinti máqannaasa naríara maaqí qímasee qímanniminau. Maasá faiqí ánaasee qámbaanai fídaqa ásauku mundírana ufa ámiqira afundara foora úqirausa nídaqa akaqáusa mi-ufána írimariasa asumu máriranaki fifáranoo, akaqáusa mi-ufána sía írimariasa kurídiranaki fifáranoo. 16 Kurídiranaki fifándinausa mi-ufána mi-afundirána udirámasee faiqí kuqá nárimaria mandá afundanafée qídaqa. Asumu máriranaki fifándinausa mi-afundána udirámasee náaru marirana máree mária afundanée qídaqa. Minára irisée nána írirana faqaa fee maa-saikána amanaikíannoo fee. 17 Maasá amaná mi-saikána máraanaura. Akaqáusa Ánutuna ufara fífau óorudupira ainainee qímasee minásaaqaraana mandá munnimma máraidaqa. Miqí qímariasa sía mi-saikána amaná máreefaranoo. Maasá sía misá naanna ráidaqa. Ánutufa maasá mi-saikánaki diqiqoosa márunnanara miná áfusaara foora máridaqa ásauku mundírana aináinira faiqi máridaqa nóori runúsee faiqí ánaasee qímannimidaqa.