143
Yenmiaru nba jiin sommir po
1 Yennu, gbatir n miaru.
A popeensin ni, a gbiint n fabinii.
Turimin gatu a mamɔmm paak.
2 A daa bu min nba tee a toontunnɔ na buut,
sɔɔ kaa ki tee kasii a tɔɔnni.
3 N dataak tɔkiime ki saa soorin ki nyannin.
U kɔɔnin bunbɔnn dansarik nie,
ki n tee nan binba din kpo sianyoowa na,
4 ki n ji loon man ŋaa tamae, n be parbiir nba kaa paak nie.
5 N tian daa nba gar na po, ki dukii faa tun linba po,
ki tian linba kur ki a tun.
6 N dont n nii sanpaapo ki meia,
ki loona nan tinkooŋ nba loon nyun biaŋinba na.
7 Yennu, turimin gatu mɔtana.
N ji ki mɔk dindann nan waama, a daa nyikitimi.
Li-i tee ki a nyikin, n saa pukin binba sik kpeentiŋ na poe.
8 Sanyiɔk kur, a tuu tiarin a lomm nba kaa gbennu na po,
kimaan fine ki n teena yada.
N miaru do a boor nie. Wantin sɔnu nba ki n saa tɔkin.
9 Yennu, n baat a boor ki loon guuru, nyintin n datai nuu ni.
10 Fine tee n Yennu, wantin biaŋinba ki n saa tun a loomm.
Ii ŋan ki turin, ki tɔkin nanin sɔnŋanu.
11 Yennu, tintin nan faa senn mɔsonn biaŋinba na,
jiin a ŋant na ki nyinnin daamii ni.
12 Faa mɔk lomm nanin na paak,
a kpi n datai ki biir binba dintin biak na,
kimaan n tee a toontunnɔe.