142
Yenmiaru nba jiin sommir po
1 N yi Yennu ki loon sommir, n barimɔe.
2 N teen ŋɔɔe n maan kura, n want ŋɔɔe n daamii kur.
3 Mi-i tan yaa man ŋaa tama yoo nba,
u mi maa saa teen biaŋinba.
N datai pii barite sɔnu nba ki n tɔkii na ni, ki guuntin.
4 Mi-i got ki lint n mɔŋ, n ki laat wunba saa sommin
ki nyinnin, sɔɔ baka kaa n po.
5 Yennu, n mɔ nan fine ki loon sommir,
Yennu, fine tee n guutɔɔ,
fine tee wunba ki n mantik loon, n manfoor ni na.
6 Gbiintir mɔnii nba ki n mɔ ki loon sommir na,
n gbee nan parbiire.
Nyintin n datai nuu ni, kimaan bi paŋ gar n yara.
7 Nyintin n daamii na ni, ki man pak donta, a niib sinsuuk ni,
kimaan faa ŋan ki turin na paak.