1 Ii Apuringkia mash aints ainau yusri Yusrintai.

Ni tsaa taakmanumaninisha tura tsaa jeamunmaninisha mash nungkanam pujuinaun chicharkamia nuketai.

2 Yus ni yaktari Sión tutainum timiá pengker aa nuni pujus ni paaniurincha akupawai.

3 Ii Yusringkia tatinuitai.

Antsu winakka takamtaikia winishtinuitai.

Tura ni tatintri jeatsaing,

ji tsuweran eemak akupkatnuitai.

Turamtai ipiamat kakaram niinka tenteatnuitai.

4 Yuska yakiiya chichaak:

“Wina aintsur turamuri jiirmatai,

atumsha jiitaram” tusa,

nayaimpinam tura nungkanam pujuinauncha untsuktinuitai.

5 Tura untsuak:

“Wina umirtukaru ainauka wina umirtukartas tangkurin main armia nuka irurtaram” titinuitai.

6 Yus tamati nayaimpinam pujuinauka:

Yus aints ainaun tunaarin nekamtikin asa,

nekas pengkeraitai tiartinuitai.

7 Yus Israel ainautin chichartamak:

“Wina aintsur ainautiram anturtuktaram.

Atumjaingkia tépaan chichastatjarme:

¡Wikia Yusetjai,

atumi Yusrinjai!

8 Atumi tangkuri maaram tuke epee wearme nuna pachisnaka:

Nuka paseetai tatsujrume.

9 Turasha wikia atumniaka:

Waaka uchiri maaram,

tura chipu aishmangkrisha maaram wina surustaram tatsujrume.✡ Sal 40.6

10 Kuntin ainau tura tangku ainau muranam irunuka mash winar ainawai.

11 Muranam nanamin ainausha tura paka nungkanam yujainausha mash winar ainawai.

12 Mash nungka ainauka winar ainawai.

Tura mash nungkanam iruna nusha winar asaramtai,

wi tsukamakun pujaknasha atumniaka ujakchatnuitjarme.

13 ¿Wikia waaka namangken yuukitaj? ¿Tura chipu numpen uminkitaj?

14 Nunaka pengké yuumatsjai.

Antsu winaka tuke maaketai turuttiaram tusan nunak wakerajai.

Tura wi turatatjai turutmiarume nuke umiktaram.

15 Shamakrum pujakrumka wina seattiaram.

Turuakrumningkia wikia atumin angkanmamtikiatatjarme.

Wi turamtai atumka wina warartursataram”,

Yus turamji.

16-17 Antsu pasé aints ainaun Yus chicharak:

“Atumi tunaari inaisataram tamaitiatrum,

nu antut nakitau asaram,

wina chichamur tuntupearam ukuarme.

Tura asaram wina chichamur etserkachmin ayatrumsha ¿warukaya wina chichamrusha etserume? 18 Atumka kasa ainau wainkaram nujai amikmaram,

tura kajmin ainausha wainkaram nujai iruntraram pujarme.

19 Tura pasé chicham chichastasrum atumi jangke awaa wearme.

20 Tura atumi yachí pachisrum aujmatu wearme nunia jiyaa wearme.

21 Nunaka mash nekayatun wikia chichakchamiajai.

Atumek nintimsaram:

Yuska iijai metekaitai tarume.

Tu nintimu asakrumin atumin wiasmatkatatjarme.

Tura atumi nintimaurincha tu awai tusan nekamtikiatatjarme.

22 Atum wina kajinmatrukrum pujau asaram,

tenapkesrum anturtuktaram.

Antsu wina anturtutsuk pujakrumningkia,

wikia atumin tsairtinuitjarme.

Wi turamtaisha ¿yáki atumnasha uwemtikramrarat?

23 Antsu wina maaketai turutinauka winaka waramtikrusartin ainawai.

Tura wina jintarun wekainaunka wikia uwemtikratnuitjai”,

Yus tawai.