51
David: Yusru wait anentrurta timiauri
David Betsabéjai tunau takasu asamtai, Yuse chichame etserin Natán naartin tari, Davidtan ni tunaarin pachis chichasu asamtai, David Salmon aarmia nuka nuwaitai:✡ 2 Sam 12.1-15
1 Yusru ame timiá wait anengkratin asam,
wait anentrurta.
Tura timiá pengker asam,
wina tunaaruka tsangkutrurta.
2 Wi tunau asamtai nintir nijatrurta.
Tura pasé aints asamtai nintir japitrurta.
3 Wikia ami chichamin umirkachuitjai tusan nekajai.
Tura wina tunaarunka tuke nintimsan pujajai.
4 Ameka jiimia pujamning,
ame nakitame nuna takasmiajai.
Tura asan ame tunaawaitme turutme nunaka nekasaintai tajame.
Tura ame tunau asam wait wajaktatme turutme nunasha pengkeraitai tajame.✡ Sal 32.5; Rom 3.4
5 Wikia nekasan akiinamunmayang tunaawaitjai.
Tura nukuru muntsurin muntsuyaja nuning tunau ayajai.
6 Tu ataing nekasam pengke nintintin ata tusam wakerutame.
Tura asam paan nintimratnusha surusuitme.
7 Tura asamtai wisha seajme:
Wina nintir japitrurta.
Turutakminkia tunaarinchau wajastatjai.
Turasha tunaar tsangkutrurta.
Turutakminkia angkan wajastatjai.
8 Tura tunaawitme turutiatmek ataksha waramtikrusta tusan seajme.
9 Wina tunaar ainauka mengkaatrukta.
Tura wina pasé turutir ainausha mash sakturata.
10 Yusru nintir tunaarinchau awajtursata.
Turasha yamaram nintimau tupin nintimratin aa nu surusta.
11 Aminka jiitnaka nakitajme turutiip.
Tura ami Wakanim pengker aa nu jurutrukiip.✡ 2 Cor 5.17
12 Tura nekasan uwemrawaitjai,
tu nintimsan warastinka ataksha surusta.
Tura ami pengker Wakanmijai kakamtikrurta.
13 Tura asakmin ami chichammin umirtan nakitinaunka ataksha ami jintimin wekaasarti tusan jintintawartinuitjai.
Tura asamtai tunaarintin ainau ni tunaarincha inaisar aminak umirtamkartinuitai.
14 Yusru wina uwemtikruru asam,
aints maawaip tusam ame surimrukta.
Turakmin amin pachisan:
Aints pengker inawaitme tusan kantan kantamruatjame.
15 Apuru wina jangker uratriniakminkia amin:
Ameketme pengkeram tusan kantan kantamruatjame.
16 Ame tangku maata turutkumningkia,
nunaka umiktinuitjai.
Tura tangku epeata turutkumnisha wikia turamnawaitjai.
Turayatun nujaingkia pengkerka awajsachainjame.✡ Sal 40.6; 50.9
17 Antsu Yus asam,
ame nekasam wakerame nuka juwaitai:
Aints tunau asa,
miajuitjai tumamtsuk,
antsu napchau nintimias:
Tunaawapitja tusa ni tunaarin inais,
amin nintimturmas pujauka,
Yusru nu aintsnaka tsuutajai pengké tichatatme.✡ Heb 9.13-14, 19-20
18 Ame wakerau asam,
Sión yaktaka pengker awajsata.
Tura kayajai wenukri ataksha inankiarti tusam tsangkamkata.
19 Turakmin tangkun maawar epee armia nuna ataksha turinamtai,
nuka pengkeraitai titatme.
Turasha amin suramsartas epeena nuka jiisam,
pengkeraitai titatme.
Nu turakminkia tangku epetinam ataksha waaka uchirin epetan nangkamawartinuitai.