19
Jimi jettooje Alla nder kammu
1 Toon nder kammu, sey nanumi daaɗe toowɗe gom, daaɗe nannduɗe he daaɗe jama'aare mawne no mbi'a :
Kisinam, teddungal e baawɗe
ngonani Alla meeɗen !
2 Kiite makko no goonga,
no dartii !
O hiitake debbo jenoowo sanne oo,
debbo pijuɗo sanne faa bonni duuniyaaru fuu oo.
Alla hiitake mo ngam o rufi ƴiiƴam maccuɓe mum.
3 Daaɗe ɗeen towna kaden, nden ɗe mbi'i :
—Aleluuya,
hiite wulunge huɓeere ndeen cuurki mum no ɗon no ƴeenya dow, faa abada abadin !
4 Dottiiɓe laso e nayo ɓeen he kujje nay buurɗe ɗeen, kofi, cujidani Alla gonɗo dow jooɗorgal laamu. Dottiiɓe ɓeen e kujje ɗeen no mbi'a :
—Aleluuya ! Aamiin !
5 Daane gom ƴuwi dow jooɗorgal laamu ngaal, wi'i :
—Mawɗo e pamaro mooɗon, on fuu njettee Alla meeɗen, onon maccuɓe makko, onon wooduɓe kulal makko !
6 Nanumi daaɗe jama'aare gom nannduɗe iido benkeƴƴe naa diggaali mawɗi. Daaɗe ɗee, no mbi'a :
—Aleluuya !
Alla Jom baawɗe tabbintini laamu muuɗum.
7 En ceyo, nanen belɗum, teddinen mo,
ngam wakkati ɓanngal Njawdiri ndiin yottake,
ɓaŋaaɗo oon duu siryake.
8 O hokkaama koltal lamngal, canyaangal faa moddi, naatowal hitere, o ɓorno.
Koltal ngal woni golle moƴƴuɗe, golle seniiɓe, himɓe Alla.
9 Sey maleykaajo gom, wi'i kam :
—Winndu : Welɓe ko'e ngoni noddaaɓe-ngara nyaama nyaamdu batu ɓanngal Njawdiri ndiin !
O wi'i kaden :
—Tabbat haalaaji ɗii no goonga. To Alla ɗi ƴuwi.
10 Nden kofiimi faa hadde koyɗe maleykaajo oon, ngam sujidande mo. Amma o wi'i kam :
—To sujidanam ! Sujidan Alla ! Miin he hoore am, mi maccuɗo Alla non hano maaɗa, hano banndiraaɓe maaɗa, ceediiɓe yeeso jama'aare dow ko Iisa *Almasiihu waɗi. Teddin Alla ! Ceedaaku dow Iisa *Almasiihu nguu, kam woni ko annabaaku nguu tefata.
Jaalorgal baɗɗiiɗo puccu ndaneewu tar
11 Yeeso am ngi'umi kammu no omtii, puccu ndaneewu tar gom wanngi. Baɗɗiiɗo ngu oon no inndiree jom holnaare e goonga. Nder dartinaaku, o watta kiite makko e konu makko. 12 Gite makko no njalɓa hano ɗemle hiite, omo melli meetali laamu keewɗi. Innde gom, nde neɗɗo fuu anndaa se hanaa kanko, no winndaa he makko. 13 Omo ɓornii jabbaare heewnee ƴiiƴam. Omo inndiree : « Haala Alla ».† 19.13 Daaru Yahaaya 1.1.
14 Cefe soogeeji kammu, gonɗi dow pucci mum'en daneeji no tokki mo. Neɗɗo maɓɓe fuu no ɓornii kolte haabu canyaaɗe faa moddi, iɗe ndawni tar. 15 Takubaahi mbelki no wurtoo nder hunnduko makko. Kanki ngooti kiin o heɓirta jaalorgal dow leyɗe duuniyaaru fuu. O laamorto ɗe sawru njamndi. O niisan ɓiɓɓe cabiije nder ɓoosirde tikkere Alla mawne, Jom baawɗe. 16 Innde gom no winndaa dow jabbaare makko he dow busal makko, no wi'a : « Laamiiɗo laamiiɓe fuu, Joomiraawo joomiraaɓe fuu. »
17 Ngi'umi maleykaajo gom no darii dow naange. O ƴewni pooli piirooji dow o wi'i ɗi :
—Ngaree, kawree ngam hiraane mawne nde Alla siryi. 18 Nyaamon tewu ɓalli : Laamiiɓe, hooreeɓe soogeeji, worɓe suusuɓe, nyaamon tewu pucci ɗiin e waɗɗiiɓe ɗi. Nyaamon tewu ɓalli himɓe fuu rimɓe yahde maccuɓe, pamaro yahde mawɗo !
19 Ngi'umi kaden ndabba mannga ngaan, laamiiɓe duuniyaaru, e soogeeji mum'en, ɓe kawri faa ɓe kabda baɗɗiiɗo puccu ndaneewu oon e soogeeji mum. 20 Amma ndabba ngaan nanngaa kannga he annabiijo penoowo oon, gaɗannooɗo dobo-dobooji yeeso magga oon. Nder dobo-dobooji makko ɗiin o fergi waɗanaaɓe dow mum'en alaama ndabba ngaan, e sujidanɓe tooruure tinndinoore magga. Ndabba ngaan e annabiijo oon nanngaa, paɗɗaa he yonkiiji mum'en nder peta hiite sinaadar wulnge jaraw. 21 Takubaahi ngonki no wurtoo nder hunnduko baɗɗiiɗo puccu ndaneewu oon wari soogeeji ɗiin fuu. Pooli ɗiin ngari nyaami tewu ɓalli maɓɓe faa kaari.