1 عٍلِسٍ نَشَ عَ قَلَ، «وٌ وٌ تُلِ مَتِ عَلَتَلَ شَ مَسٍنيِ رَ، ‹تِنَ، يِ وَشَتِ، وٌن قَرِن كِلٌ قُ نُن قِرِن، شَ نَ مُ مّنفِ مَنِيّ كِلٌ مْشْحّن نُن نَانِ سَرَ مَ فبٍتِ كٌلٍ كٍرٍن نَن نَ سَمَرِ تَا سٌدٍ دّ.›» 2 مَنفّ شَ مِشِ ندٍ، نَشَن نُ مَنفّ مَتِمَ يِرٍ بِرِن، نَ نَشَ عَلَ شَ مِشِ يَابِ، «هَلِ عَلَتَلَ كٌورٍ رَبِ نّ، عِ نَشَن قَلَشِ نَ كِ، نَ مُ نْمَ رَبَدٍ؟» عٍلِسٍ نَشَ عَ قَلَ عَ بّ، «عِ تَن عَ تٌمَ نّ عِ يَ رَ، كْنْ عِ مُ عَ دٌنمَ قٍوٌ!»

3 كُنّ كَنيِ نَانِ نُ نَ تَا سٌدٍ دّ رَ. نٍيٍ نَشَ عَ قَلَ عٍ بٌرٍ بّ، «وٌن نَ قَشّ مَمّقٍ بٍ مُنقٍ رَ؟ 4 شَ وٌن سَ سٌ تَا كُي، وٌن قَشَمَ نّ كَامّ رَ. شَ وٌن مَن لُ بٍ، وٌن قَشَمَ نّ. وٌن نَشَن نَبَمَ، وٌن شَ سَ وٌن يّتّ سٌ عَرَ مِكَيٍ يِ رَ عٍ يٌنكِندٍ كُي. شَ عٍ دِحّ وٌن مَ، وٌن بَلٌمَ نّ. شَ عٍ وٌن قَشَ، وٌن قَشَمَ نّ.»

5 نَ كُي عٍ نَشَ كٍلِ نُنمَرٍ رَ، عٍ شَ سَ عٍ يّتّ سٌ عَرَ مِكَيٍ يِ رَ، كْنْ عٍ تٌ نٍيٍ يٌنكِندٍ لِ، مِشِ يٌ مُ نُ نَ مّننِ. 6 مَرِفِ نُ بَرَ سٌي نُن فِسٍ فَلِ شُي رَ مِنِ عَرَ مِكَيٍ يٌنكِندٍ كُي، عَلْ سْورِ فَلِ نّ قَمَ. نَ كُي، عٍ نَشَ عَ قَلَ عٍ بٌرٍ بّ، «عِسِرَيِلَكَيٍ بَرَ شِتِكَيٍ نُن مِسِرَكَيٍ شِلِ عٍ مَلِدٍ فٍرٍ كُي.» 7 نَ نَشَ عَ نِيَ عٍ شَ عٍ فِ، عٍ عٍ شَ سٍ بِرِن لُ نَا. عٍ نَشَ كٍلِ عٍ شَ كِرِ بَنشِيٍ، عٍ شَ سٌي، نُن عٍ شَ سٌقَلٍيٍ شُن مَ، عٍ عٍ يٌنكِندٍ لُ نَ كِ، عٍ عٍ فِ عٍ نِي رَتَنفَقٍ رَ.

8 كُنّ كَنيِيٍ تٌ نَ قٍ لِ يٌنكِندٍ كُي، عٍ نَشَ سٌ كِرِ بَنشِ ندٍ بُن مَ، عٍ عٍ دّفٍ. عٍ تٌ فّ عٍ دّفٍدٍ، عٍ نَشَ فبٍتِ، شّيمَ، نُن سٌسٍيٍ شَنِن، عٍ سَ نَ سٍيٍ نْشُن يِرٍ ندٍ. عٍ مَن نَشَ فبِلٍن كِرِ بَنشِ فبّتّ كُي، عٍ سَ سٍيٍ تٌنفٌ، عٍ عٍ شَنِن عٍ نْشُندٍ.

9 نَ دَنفِ شَنبِ، عٍ نَشَ عَ قَلَ عٍ بٌرٍ بّ، «وٌن مُ نَ قٍ قَنيِ شَ رَبَقٍ يِ كِ. تٌ لْشْي قِندِشِ شِبَارُي قَنيِ عِبَ لْشْي نَن نَ، شَ وٌن دُندُ يِ قٍ مَ، سُبَشّ نَشَ يِ قٍ لِ وٌن يِ، حَشَنكَتّ حَاشِ وٌن لِمَ نّ. وٌن شّي، وٌن شَ سَ مَنفّيٍ رَكٌلٌن يِ قٍ قَنيِ رَ.» 10 عٍ نَشَ سِفَ عٍ سَ تَا نَادّ كَنتّ شِلِ، عٍ عَ قَلَ عَ بّ، «مُشُ بَرَ سٌ عَرَ مِكَيٍ يٌنكِندٍ كُي، مُشُ مُ مِشِ يٌ لِشِ نَا. عٍ بِرِن سِفَ. عٍ بَرَ كٍلِ عٍ شَ سٌييٍ نُن عٍ شَ سٌقَلٍيٍ شِرِشِ شُن مَ، مِشِ يٌ مُ نَ عٍ شَ كِرِ بَنشِيٍ كُي.»

11 تَا نَادّ كَنتّيٍ نَشَ نَ دّنتّفّ سَ مَنفّ بّ. 12 مَنفّ نَشَ كٍلِ نَ كْي رَ، عَ عَ قَلَ عَ شَ مِشِيٍ بّ، «عَرَ مِكَيٍ وَ مَ نَشَن نَبَقٍ وٌن نَ، ﭑ شَ نَ قَلَ وٌ بّ. عٍ تٌ عَ كٌلٌنشِ كَامّ نَ وٌن مَ، عٍ كٍلِشِ نّ عٍ يٌنكِندٍ، عٍ سَ عٍ نْشُن بُرُنيِ، عٍ نُ قَ عَ قَلَ، ‹عٍ نّقّ مِنِ عٍ شَ تَا كُي، وٌن بَفَنمَ نّ عٍ مَ، وٌن قَ سٌ عٍ شَ تَا كُي.›» 13 عَ شَ مِشِ ندٍ نَشَ عَ يَابِ، «يَندِ، وٌن شَ مِشِ سُولِ سُفَندِ، عٍ شَ سٌي ندٍيٍ تٌنفٌ نَشٍيٍ لُشِ وٌن يِ رَ تَا كُي، عٍ شَ سِفَ يِ قٍ مَتٌدٍ. هَلِ عٍ قَشَ نَا، نَ مُ حَاشُ دَنفِ قَشَقٍ رَ تَا كُي بٍ. وٌن قَمَ عَ مَتٌدٍ قٍ نَشَن عَ رَ.» 14 عٍ نَشَ فِسٍ نُن سٌي رَفِ قِرِن شّي عَرَ مِ سْورِيٍ قْشْ رَ، عَلَكٌ عٍ شَ عَ كٌلٌن قٍيٍ نَ كِ نَشّ. 15 نٍيٍ نَشَ بِرَ عٍ قْشْ رَ هَن يُرُدّن شُرٍ. عَرَ مِكَيٍ نُ بَرَ عٍ شَ سٌسٍيٍ نُن عٍ شَ فٍرٍ سٌسٍيٍ لُ كِرَ شْن مَ عٍ شَ فِ كُي. عِسِرَيِلَ شّيرَيٍ نَشَ فبِلٍن عٍ شَ مَنفّ يِرٍ، عٍ نَ دّنتّفّ سَ عَ بّ. 16 نَ تّمُي حَمَ نَشَ مِنِ تَا كُي، عٍ سَ سٍ بِرِن تٌنفٌ عَرَ مِكَيٍ يٌنكِندٍ كُي.

نَ كُي قَرِن قُحِ كِلٌ قُ نُن قِرِن نَشَ سَرَ فبٍتِ كٌلٍ كٍرٍن نَ. مّنفِ مَنِيّ كِلٌ مْشْحّن نُن نَانِ نَشَ سَرَ فبٍتِ كٌلٍ كٍرٍن نَ، عَلْ عَلَتَلَ عَ مَسٍن كِ نَشّ. 17 مَنفّ نُ بَرَ عَ مَتِمَ لُ تَا سٌدٍ دّ رَ. حَمَ تٌ مِنِ تَا كُي عٍ شَ فبَتَ فبَتَ كُي، عٍ نَشَ نَ مَنفّ شَ مِشِ مَبٌرٌن، عَ قَشَ. نَمِحْنمّ شَ مَسٍنيِ نَشَ كَمَلِ، عَ نَشَن قَلَ مَنفّ بّ عَ تٌ سِفَ عَ يِرٍ. 18 نَمِحْنمّ نُ بَرَ عَ قَلَ مَنفّ بّ، «تِنَ يِ وَشَتِ، سَمَرِ تَا نَادّ رَ، مِشِ قَرِن كِلٌ قُ نُن قِرِن سَرَ مَ فبٍتِ كٌلٍ كٍرٍن نَن نَ، شَ نَ مُ مّنفِ مَنِيّ كِلٌ مْشْحّن نُن نَانِ سَرَ مَ فبٍتِ كٌلٍ كٍرٍن نَ.» 19 مَنفّ مَتِمَ نُ بَرَ عَ يَابِ، «هَلِ عَلَتَلَ كٌورٍ رَبِ نّ، عِ نَشَن قَلَشِ نَ كِ، نَ مُ نْمَ رَبَدٍ؟» عٍلِسٍ نَشَ عَ قَلَ عَ بّ، «عِ تَن عَ تٌمَ نّ عِ يَ رَ، كْنْ عِ مُ عَ دٌنمَ قٍوٌ!» 20 قٍيٍ دَنفِ نَ كِ نّ يَتِ. حَمَ نَشَ عَ مَبٌرٌن عٍ شَ فبَتَ فبَتَ كُي تَا سٌدٍ دّ رَ، عَ نَشَ قَشَ.