2
मुठलो सुटकारो
1 केरीन जोरवरी हे काय ज्यी खेरली वातु आपु होमलेल हेते, त्यु पोर मोन लागाड़े, ओहलो नाय एय काय आपु तीह रेन सेटा जात रेहु। 2 काहाकाय जो वचन हेरोगदुतान द्वारे केवाय जायेल एतो, जेवी तो थोबीन रियेल एने एकेक गुनो एने उकुम नाह माणनेन ठिक ठिक बुदलो आपेह, 3 ते आपु ओहला मोटला सुटकारा पोर द्यान नाह देन किहीक वोच सेकतेह? ज्यान बाराम पेल आमुह मालीक केयो, एने जा ताह होमलेल एता ता फाय रेन आमुह पुतो लागो काय तो सुटकारो खीरलो हे। 4 ता सावाय बोगवान तान मोरजीन गेत निसाण्यु, चोमेत्कार ने कामे एने बात बातीन ताकेतीन कामे, एने चोखाला जीवान वरदान वाटाणेन द्वारे ज्यान गोवाय दिते रिनो।
आपणो सुटकारो केरनार
5 बोगवान ती आवणारी देरतीह जीन वात आपु केरतेह, हेरोगदुतान ताबाम नाह होप्यो। 6 पुण कुण तीबी चोखाली पुस्तेक माय ज्यी गोवाय दियेल हे:
“माणुह काय हे, काय तु ताह इर केरी;
एने माणहान बिटोख काय हे, काय तु तान चिन्ता किरेह?
7 तु ताह हेरोगदुताह रेन थुड़ोस कोम किरेल हे;
तु ता पोर बोड़ाय एने आदर ने मुकूट मिलेल हे,* 2:7 मोकतास लेख माय तु जो काय बाणायेल ता पोर तु ताह आदिकारी नियुक्त किऱ्यो जुड़ेल हे (देखी बजन 8:6।)
8 तु आखी वोस्तु तान ताबाम किर दियेल हे।”
आखी केल तान ताबाम किरते लेन बोगवान ओहलो कायस नाह सोड्यो, जो तान ताबाम नाह केराय गीयो। पुण खेराय ज्यी हे काय एवी वोर आपुह आखो काय तान ताबाम नाह देखते। 9 पुण आपु यीशुह जो हेरोगदुताह रेन थुड़ोस कोम किरेल ईतो, मोतीन दुख उखेलनेन वोजेसे बोड़ाय एने आदर ने मुकूट पेर रियेल देखतेह, काहाकाय बोगवानान किव माय तु एकेक माणहान केरता मोतीन होवाद चाखी। 10 काहाकाय जान केरता आखो काय हे एने जान द्वारे आखो काय हे, ताह ज्योच हाजो लागनो काय जुलबुखे तो मोकतास बेटाख बोड़ाय माय पोचाड़ी, ते तान सुटकारो आपणाराह दुख उखेलनेन द्वारे पाको केरी।
11 काहाकाय चोखो केरनार एने जा चोखाला केराय जातेह, आखा एकुस मुलाम रेन हेते, तीस कारेण तो ताह बाहख बोणीख केणे नाह लाजवात। 12 तो किथे,
“मी तारो नाव मार माणहाह होमलावुह;
पोंचान विची माय मी तारो गीत गावुह।”
13 उंजु पोशो ज्य किथे, “मी ता पोर बुरहो केरूह।” एने उंजु ज्य किथे, “हुमेल, मी ता सोरा हिऱ्यो जाह बोगवान माहु आपेल हे।”
14 जेवी सोरा माह एने लुय ने गोवांदी हेते, ते तु सोता बी तान बाराबोर तान गोवांद्यो एय गीयो, काहाकाय मोतीन द्वारे ताह जाह मोती पोर ताकेत जुड़ेल एती, मतलब सैतानाह विणकाम्यो केर देय, 15 एने जोलाक मोतीन बिय ने वोजेसे जीवाय ने गुलामी माय फुसील एता, ताह सोड़ेव लेय। 16 काहाकाय तो ते हेरोगदुताह नाह, पुण अब्राहाम ने वोसीह मोदेक किरेह। 17 ज्यान वोजेसे ताह ज्य जोवतालो काय आखी वातु माय आपणा बायाख ने गेत बोणी, ज्याकेरीन तो ती वातु माय ज्यु बोगवाना हेऱ्यु नातो मेलत्युह। एक गिणातो एने बोरहावालो मुठलो बोगवानान मुखी चाकर्यो बोणी, ताकाय तो माणहान पाप माफ केरनेन केरता बोली बोणी। 18 काहाकाय जेवी तो पारेख ने हाल माय दुख विसेल ईतो, ते तो तान बी मोदेक केर सिकेह जान पारेख ईथे।
*2:7 2:7 मोकतास लेख माय तु जो काय बाणायेल ता पोर तु ताह आदिकारी नियुक्त किऱ्यो जुड़ेल हे (देखी बजन 8:6।)