1 ዪሁዳ ካኣቲ፥ ሴዴቂያሴ ማልኪያ ናኣዚ ፓሽሁሬና ሜዕሴያ ናኣዚ ቄኤሳሢ ሶፖኒያሴና ታ ኮይላ ዳካዖ፦ 2 «ባብሎኔ ካኣቲ ናብካዳናፆኦሬ ፔኤኮ ዖሎ ዓሶና ዎላ ኑ ካታሞ ዖላኒ ማንጊሢዳኬ፤ ዬያሮ ጎዖንቴ ናንጊና ናንጋ ጎዳ ኑና ማኣዲ ኑኡና ዎላ ማዒጋፓ ዒዛ ዎልቆና ማዺንታ ዼኤፖ ማዾ ማዺ ናብካዳናፆኦሬ ማሂ ዳካንዳያናንዳኔ፥ ዒዛ ኑኡም ዖኦጬ» ጌዔኔ። 2ካኣቶ. ማ 25፡1-11፤ 2ፆኦሲ. ዓሃኬ 36፡17-21።

3 ታ ኮይላ ዳኪንቲ ሙኬ ዓሳ ሴዴቂያሴም ሂዚ ጌይ ኬኤዛንዳጉዲ ጌይ ታ ዳኬኔ፦ 4 «ዒስራዔኤሌ ፆኦዛሢ ማዔ ናንጊና ናንጋ ጎዳሢ ሂዚ ጋዓኔ፤ ‹ሴዴቂያሴ! ኔ ካታሞ ዲፆኮ ዙሎ ሙኪ ማንጌ፥ ባብሎኔ ካኣቲንታ ባብሎኔ ዓሶንታ ኔ ዖላኒ ጊኢጌ ዓንጋሞ ኔ ባንሢ ታኣኒ ሺርሻንዳኔ፤ ዬያ ዖሎ ዓንጋሞ ካታሞኮ ሳዞይዳ ዔኪ ሺኢሺ ታ ኩላንዳኔ። 5 ታኣኒ ታ ቶኦኪና ዔዔኤታ ዻጋና፥ ጊንሣ ሃሣ ዼኤፒ ጎሪንቲና ማዒ ታኣኮ ዎልቆና፤ ሃሣ ጊንሣ ታ ቢታንቶና ኔና ዖላንዳኔ። ማቲ. 23፡38፤ ሉቃ. 13፡35። 6 ሃኖ ካታሞይዳ ናንጋ ዓሶ ማዔቴያ ቆልሞ ቢያ ዓሲኮ ዑስካ ጌሊ ዒጊቻ ፑርታ ዶርዖና ዎዺ ታ ኩርሳንዳኔ፤ 7 ኔናንታ ኔኤና ዎላ ቢቶ ማዒ ማዻ ዓሶንታ ፑርቶ ዶርዓሢ፥ ናዮንታ ዖሎንታይዳፓ ቶሊ ዓቴ ዴሮዋ ቢያ ካኣቲ ናብካዳናፆኦሬና፤ ጊንሣ ሃሣ ዎዻኒ ዒንሢ ኮዓ ሞርኮና ዲዒ ዔኪ ዓኣዻንዳጉዲ ታ ማሃንዳኔ፤ ዒዚ ኔና ማኣሪ ሃንጎ ሃሣ ሚጪንቲ ፔቴ ዓሲታዎ ኔኤም ዓይሳዓኬ፤ ዬያ ጌዔሢ ታና፥ ናንጊና ናንጋ ጎዳኬ።› »

8 ዬካፓ ናንጊና ናንጋ ጎዳ ዴሮም ታኣኒ ሂዚ ጌይ ኬኤዛንዳጉዲ ዓይሤኔ፦ «ሂንዳ ዋይዙዋቴ! ታኣኒ፥ ናንጊና ናንጋ ጎዳ ናንጊ ባንሢ ዔኪ ዴንዳ ጎይፆና ሃይቢ ባንሢ ዔኪ ዴንዳ ጎይፆና ዒንሢ ቤርታ ጌሤኔ፤ ላምዖንሢፓ ፔቴማ ዶኦሩዋቴ፤ 9 ሃኖ ካታሞይዳ ዓቴ ዓሳ ቢያ ዖልዚና፥ ናይዚና፤ ጊንሣ ሃሣ ዱማ ዱማ ዶርዖና ሃይቂ ኩዳንዳኔ፤ ሃሢ ካታሞ ማንጊ ዓኣ፥ ባብሎኔ ዓሶም ዴንዲ ኩቺ ዒንጌ ዓሲ ጋዓንቴ ሃይቃዓኬ፤ ሜሌ ባካ ዓቴቴ ሼምፓሢ ፔኤኮ ዬይ ዓውሳንዳኔ፤ 10 ሃና ካታማ ባይቃንዳጉዲ ታኣኒ ጌዔኔ፤ ፔቴታዖ ታ ዔያቶ ማኣራዓኬ፤ ባብሎኔ ካኣቲም ታኣኒ ዓኣሢ ዒንጋንዳኔ፤ ዒዚ ታሚና ዒዞ ሚቻንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»

11-12 ዳውቴ ዜርፆ ማዔ፥ ዪሁዳ ካኣቲ ማኣሮ ዓሶም ኬኤዛንዳጉዲ ናንጊና ናንጋ ጎዳ ታና ዓይሤ ቃኣላ ያዺኬ፦ «ታኣኒ፥ ናንጊና ናንጋ ጎዳ ዒንሢም ኬኤዛ ባኮ ዋይዙዋቴ፤ ቢያ ኬላ ኬላ ዒንሢ ዎጋ ዎጎ ዎቢሲፖቴ፤ ፔቴይ ባጋሢ ቡሪ ጌኔ ማዾ ማዹዋጉዲ ካፒ ላኣጉዋቴ፤ ዬያ ዒንሢ ማዺባኣቴ ጋዓንቴ ዒንሢ ማዻ ፑርቶ ማዻፓ ዔቄያና ታኣኮ ዻጋ ታሚጉዲ ዔኤታንዳኔ፤ ዬያ ዎዻንዳ ዓሲያኣ ባኣሴ፤ 2ካኣቶ. ማ 23፡31-34፤ 2ፆኦሲ. ዓሃኬ 36፡1-4። 13 ዬሩሳላሜ! ኔኤኒ ቦኦሊዳ ዓኣ ዼኤፒ ሹቺጉዲ ዶኦጫዻ ቤዛፓ ዼግ ጌይ ጴዻኔ፤ ጋዓንቴ ታኣኒ ኔና ዖላንዳኔ፤ ኔኤም ጋዓንቴ ዓይጎ ዓሲያ ማዖም ዎልቄና ዋርዲዮ ኔኤኮ ሻሂ ጌላንዳያ ማሉዋሴ፤ 14 ጋዓንቴ ኔኤኒ ማዼ ባኮ ዛሎና ታኣኒ ኔጊዳ ሜቶ ዓጋንዳኔ፤ ካኣቶ ማኣራ ኔኤኮ ታሚና ሚቺንታንዳጉዲ ታኣኒ ማሃንዳኔ፤ ዬይ ታማ ኮይሎይዳ ዓኣ ባኮ ቢያ ፁኡጋንዳኔ፤ ዬያ ጋዓሢ ታና፥ ናንጊና ናንጋ ጎዳኬ።»