ታ ዻንጎና ኔኤኮ ጉሙርቂንቲፆ ሙካ ሾይንቶም ታ ኬኤዛንዳኔ።

ጉሙርቂንቲፆዋ ጫሪንጫ ኔ ዶዲሻሢ ታ ኬኤዛንዳኔ።

ታ ዓይላሢ ዳውቴም ታ ሳላዼኔ» ጌዔኔ።

«ኔ ዜርፃፓ ናንጊና ካኣታዻንዳይ ኬስካንዳኔ፤

ካኣቱሞ ዖይቶ ታኣኒ ሾይንቲፓ ሾይንቲ ሄላንዳኣና ዶዲሻንዳኔ» ጋዓያኬ። 2ሳሙ. 7፡12-16፤ 1ፆኦሲ. ዓሃኬ 17፡11-14፤ ዓይኑ. 132፡11፤ ዳኪ. ማዾ 2፡30።

ጉሙርቂንቲፆዋ ኔኤኮ ኔኤም ማዻ ኪኢታንቻ ፔ ቡኪንታ ሄርሾንጎ።

ዒዛኮ ኪኢታንቾይዳፓ ዒዛጉዴይ ዖናዳይ?

ዒዛ ኮራ ዓኣዞንሢዳፓ ቢያ ዑሣ ዒ ዲቃሣያኬ።

ኔጉዴያ ዖኦኒ ዓኣይ!

ኔኤኮ ጉሙርቂንቲፃኣ ኮሮ ማንጊ ዓኣኔ።

ባዞ ጉዳሢያ ኔኤኒ ዚቲዳኔ።

ኔኤኮ ዼኤፖ ዎልቆና ሞርኮ ኔኤኮ ኔ ላኣሌኔ።

ዓጮንታ ዒኢካ ዓኣ ባኮ ኔኤኒ ማዤኔ።

ታቦኦሬንታ ሄርሞኔ ዹኮንታ ኔ ሱንፆና ዎዛዻኔ።

ኩጫኣ ኔኤሲ ዎልቄናኬ፤

ሚዛቆ ኩጫኣ ኔኤኮ ዼግ ዼጊ ጌዔያኬ።

ሚጪንቲፆንታ ጉሙርቂንቲፆንታ ኔኤኮ ቤርታ ቤርታ ዓኣዻኔ።

ኔኤኮ ፖዓ ናንጋዞንሢ ዓንጂንቴያኬ።

ኔ ፂሉሞናኣ ዔያታ ኮሺ ዎዛዻኔ።

ኔ ኮሹሞና ካኣሮ ኑኡኮ ኔኤኒ ዼግ ዼጊዴኔ።

ኑኡኮ ካኣቲያ ዒስራዔኤሌኮ ዱማዼ ፆኦዛሢሮኬ። 1ካኣቶ. ማ 4፡31።

ሚና ኔ ናኣቶም ኔ ኬኤዛዖ ሂዚ ጌዔኔ፦

ዴሮ ባኣካፓ ዶኦሪንቴሢ ታኣኒ ዼግ ዼጊዴኔ።

ዱማዼ ዛይቶ ቲዦና ታ ዒዛ ቲሽኪ ዶኦሜኔ። 1ሳሙ. 13፡14፤ 16፡12፤ ዳኪ. ማዾ 13፡22።

ቃሳ ታኣኮ ዒዛ ዶዲሻንዳኔ።

ፑርቶ ማዻ ዓሳኣ ሄርቂ ዎይሣዓኬ።

ዒዛ ዒፃዞንሢ ታ ሺርኪ ባይዛንዳኔ።

ታ ሱንፆና ካኣራ ዒዛኮ ዼግ ዼጊ ጋዓንዳኔ።

ዒዛ ዓጮኮ ዛጶ ፄግሮሴና ዔፕራፂሴ ዎሮ ሄላንዳኣና

ታኣኒ ዳልጊሻንዳኔ።

ኔ ታኣኮ ፆኦዛሢና ዻቂንቶ ላላሢናኬ› ጋዓንዳኔ።

ዓጮ ካኣቶይዳፓ ዑሣ ዼጊ ዒ ጋዓንዳኔ። ዮሃ. ፆፔዻ 1፡5።

ታ ዒዛና ጫኣቄ ጫኣቁማ ዶዲ ናንጋንዳኔ።

ካኣቱሞዋ ጫሪንጫ ናንጋማ ጎይፆ ታ ዶዲሻንዳኔ።»

ታ ዳምቦና ዔያታ ናንጊባኣያታቴ፥

ታኣኮ ዓይሢፆዋ ካፒባኣቴ፥

ዻቢንቶሮዋ ታ ዔያቶ ዢራፓና ጳርቃንዳኔ።

ታ ጉሙርቂንቲፆዋ ታ ዒዛም ፓጪሳዓኬ።

ታ ዻንጋፓ ታ ኬሴ ባኮዋ ማሃዓኬ።»

ዳውቴም ታኣኒ ሉኡቃዓኬ።

ካኣቱማኣ ዒዛኮ ዓቢ ናንጋማጉዲ ታ ቤርታ ዶዲ ናንጋንዳኔ።

ዒዛኮ ካኣቱማ ናንጊና ዶዲ ዴዓያ ማዓንዳኔ።»

ኔኤኒ ዶኦሚ ካታሤሢያ ሚርጌና ጎሬኔ።

ቦንቾሮ ቶኦካ ዓጎ ባኮዋ ሲላላ ኔ ኬኤሬኔ።

ዋርዲዮ ቤዞዋ ዶይሲ ኔ ባይዜኔ።

ዒዛኮ ዓሺኖማኣ ዓማሊ ዒ ማዔኔ።

ዒዛ ዒፃ ዓሶ ቢያ ኔ ዎዛሴኔ።

ዖሎ ዎዶና ኔ ዒዛ ማኣዲባኣሴ።

ካኣቱሞ ዖይቶዋ ኔኤኒ ሳዓ ኬኤሬኔ።

ቦርሲሲያ ኔ ዒዛ ዴይሤኔ።

ኔ ኑም ፔጋዹዋዖ ናንጊና ናናንጋኒዳ?

ዻጋ ኔኤኮ ታሚጉዲ ዔኤታሢ ዓይዲ ሄላንዳኣናዳይ?

ዓሲ ኔ ማዤሢ ዔኤቢ ጉሪ ባኣዚምዳ?

ፔ ቶኦኮ ዱኡፒፓ ዓውሳንዳይ ዖናዳይ?

ዳውቴም ኔኤኮ ጉሙርቂንቲፆና ኔ ጫኣቄሢ

ኔኤኮ ሚናኣ ሚጪንቲፃ ዎካ ዓኣይ?

ዓይላሢ ኔኤኮ ዎማይዲ ቶኦቺንቴቴያ

ሚርጌ ዓሶኮ ቦሂፆ ዒዚ ዔኤዼሢያ ማሌ።

ሞርካ ኔኤኮ ዒዛ ሚኢጬሢ

ኔኤኒ ካኣታሤ ዓሢኮ ሄፆ ዔያታ ቶኦቼሢ

ሂንዳ ማሌ።