88
ቆሬ ናኣቶኮ ጋላቶ ዓይኑሞ
ዓይኑሞ ሱኡጋሢ ዓይሣ ጎይፆና ዎሊም ዓጊ ዓጊ ዓይናዾያ፥ ዒዝራዔኤሌ ዓሢ ዔማኔ ካላሎ፥ ፆኦሲ ማኣዶ ዴንቃኒ ሺኢቂንቴ ሺኢጲሢ
1 ናንጊና ናንጋ ጎዳ ማዔ ታና ዓውሳ ፆኦዛሢዮ!
ሮኦሮና ዋንቶና ታ ኔ ቤርታ ዒላታኔ።
2 ሺኢጲፃ ታኣሲ ኔ ቤርቶ ሄሎንጎ፤
ዋዮ ኔኤኮ ታ ዒላቶ ባንሢ ማሄ!
3 ሚርጌ ሜታ ታና ሄሌሢሮ
ሃይቃኒ ታኣኒ ዑኬኔ።
4 ሃይቂ ዱኡኪንታ ዓሶና ዎላ ታኣኒ ፓይዲንቴኔ፤
ፔቴታዖ ማኣዳ ዓሲባኣያ ታ ማዔኔ።
5 ሃይቄ ዓሶ ባኣካ ኬኤሪንቴ ዓሶጉዲ
ዎዺ ዱኡኮና ዓሲጉዲ ታ ላሄኔ፤
ሃካፓ ሴካ ኔ ማሊ ጶቂሡዋ ዓሶጉዲ
ኔ ኩጫፓ ኬስኪ ኬኤሪንቴ ዓሶጉዲ ታ ማዔኔ።
6 ኔ ታና ዔቶ ቶርጳሢዳ ኬኤሬኔ፤
ዹሚ ዔቴይዳ ኔ ታና ዓጌኔ።
7 ኔ ጎሪንቶ ዴኤሡማ ታ ዑፃ ማዔኔ፤
ኔኤኮ ዋኣፆ ጉዳሢና ኔ ታና ዱኡኬኔ።
8 ታኣኮ ዑካ ላጎ ታ ኮራፓ ኔ ሃኪሴኔ፤
ዔያታ ታና ሻኣኪንታንዳጉዲ ኔ ማዼኔ፤
ታ ማንጊንቴኔ፥ ቶላኒያ ታ ዳንዳዒባኣሴ።
9 ዓኣፓ ታኣኮ ዖዪፆና ዴዒ ዓቴኔ፤
ናንጊና ናንጋ ጎዳሢዮ! ታ ኔ ባንሢ ዒላታኔ፤
ኩጮዋ ታ ኔ ባንሢ ዔቂሳኔ።
10 ኔኤኮ ዲቃሢ ሄርሺሳ ማዾ ሃይቄ ዓሶም ኔ ቤኤዛ?
ሃይቄ ዓሶኮ ዔኤዣ ዔቂ ኔና ጋላታ?
11 ሚጪንቲፃ ኔኤኮ ዱኡፒ ቤስካ
ጉሙርቂንቲፃኣ ባይሲንታ ቤስካ ኬኤዚንታ?
12 ዲቃሢ ሄርሺሳ ማዻ ኔኤኮ ዹሞ ቤዛ
ፂሉማኣ ኔኤሲ ዋሊንቴ ሳዓይዳ ዔርታ?
13 ናንጊና ናንጋ ጎዳሢዮ!
ኔ ታና ማኣዳንዳጉዲ ኔ ባንሢ ታ ዒላታኔ፤
ጉቶዋ ሺኢጲፆ ታኣኮ ታ ኔ ቤርቶ ሺኢሻኔ።
14 ናንጊና ናንጋ ጎዳሢዮ! ዓይጋ ኔ ታና ሃኪሳይ?
ኔኤኮ ዓኣፖ ካሮዋ ታ ጊዳፓ ዓይጋ ኔ ሺርሻይ?
15 ታኣኒ ናኣቱሞፓ ዓርቃዖ ሜታዼያና
ሃይቃኒያ ዑኬያኬ፤
ኔ ታና ሚርጌና ዲቃሤኔ፤
ዔርቲያ ታኣም ዒፄኔ።
16 ኔ ጎሪንታ ዑፆ ታኣኮ ካንቄኔ፤
ዱማ ዱማ ባይዛ ባካኣ ታና ኩርሴኔ።
17 ሮኦሮ ጉቤ ዓዳ ዲጲጉዲ ታና ማንጌኔ፤
ጋፒ ታና ዬይ ዔኤዼኔ።
18 ታኣኮ ዒጊኖንታ ላጎንታ ኔኤኒ ታ ኮራፓ ሃኪሴኔ፤
ዹሚ ሌሊ ታኣኮ ላጌ ማዒ ዓቴኔ።