1 Si osaʼn eɏgew, summiked si Jesus si teɏanteg chi Byeybyey ud Gennesaret, ot ummaguyut cha amod un tagu ti pionchaʼn chongɏon chi itudtuchulaʼn ugud Apudyus. 2 Ot lailala chuwaʼn byangka si igid chi byeybyey un lappun inggew si malabukuɏ ti lummogsedcha ot ummoycha bilebyeɏan cha tabukuɏcha. 3 Ot summakyat siya si osaʼn byangka un uwan Simon, ot imbyegala kan siya un ichulunla akit. Ot ummamuy si Jesus un lantudtuchu kan cha tagu.

4 Lagamput pun lantudtuchu, kalala kan cha Simon, “Ipooyyu byangka si kalusgongan chi chelum ta malabukuɏ kayu si ikan.”

5 Ot kalan Simon, “Apu, illablabimiʼn lalabukuɏ ot lappun illaɏami. Ngim lu siya kalam, malabukuɏ kami kasin.” 6 Ot ummoycha lalabukuɏ ot lilokchencha ikan ot allà akit un mapissay chi tabukuɏcha. 7 Ot ilayagencha biɏuncha si osaʼn byangka ta umoycha tuɏungan chicha. Ummoycha tummuɏung ot laplu chuwaʼn byangka si ikan ot allà akit un milutob cha byangka. 8 Intullong pun Simon Peter chi lakwa, lampalintuming si sangwalan Jesus, ot kalala, “Apu, telam sakon ti malagbyasuɏak!”* 5:8 Ha osaʼn ingngachen Jesus kan Simon ked Peter, ot lingachencha Simon Peter. 9 Katchi imbyegala ti laschaawcha siya ya cha kakadwala si kilaachun chi ikan un laaɏacha. 10 Ot laschaaw bo cha James kan John un alak Zebedee.

Ot kalan Jesus kan Simon, “Achika umogyat, ti malipud si sala chakampun si ikan chi tabukuɏam, siyad tabukuɏam cha tagu.” 11 Insang-at pun cha Simon cha byangkacha si teɏanteg, tilelancha losan ot litun-udcha kan Jesus.

12 Si osaʼn eɏgew, inggew si Jesus si osaʼn ili ot inggew bo osaʼn leɏaki un laleprosy. Intullongla pun si Jesus, ummoy lampalintuming si sangwalanla ot langkadkachegu kan siya un kalala, “Apu, lu piom, palin-awaolak.”

13 Ot ilappachen Jesus chi leɏaki, ot kalala, “O, Piok chi lumin-awaka.” Ot kakma lakaan chi sakitla.

14 Ngim bililin Jesus siya un kalala, “Achim pay ibyegbyega killingwak kan sika ulay siluʼn tagu. Ngim ingka mampeɏang si pachi ya manchatunka kan Apudyus ti hachi imbilin Moses un maluttuwaan cha taguʼn lummin-awaka.”† 5:14 Leviticus 14:1-8

15 Ngim laam-amod un lanchilongeɏ chameg mipanggop kan Jesus. Ot amod cha taguʼn ummoy lanchongeɏ kan siya ya ummoy lampalin-awa si sakitcha. 16 Ngim pappasig umoy si Jesus tumalin si lugeɏʼn lappun ummili ta malluwalu.

17 Si osaʼn eɏgew, lantudtuchu si Jesus si osaʼn byeɏoy. Si hachi illinggew bo cha uchum un ummaammuy un Pariseo kan cha mimistulun chi lintog un lampeɏpuʼd cha losan un ili ud Galilee ya Judea ya leɏpu cha uchum ud Jerusalem. Ked awed chi kilabyelin Apudyus kan Jesus un mampalin-awa kan cha lasakit. 18 Oli pun inggetong cha uchum un leɏaki lapalalais un bilumbulligencha ot pilachaschaʼn illok si byeɏoy ta iyoycha si sangwalan Jesus. 19 Ngim lappun in-ilonchaʼn mangillok kan siya ti amod cha tagu. Ot ummoy cha si otop chi byeɏoy ot ilabutancha, ot impacheɏacha bulig si sangwalanla.

20 Laammuwan pun Jesus chi gettok un pammaticha, kalala si leɏaki, “Biɏun, lapakawan cha byasuɏm.”

21 Ngim cha Pariseo ya mimistulun chi lintog sin-aayumimitcha un kalancha, “Silu maga kilatatagun chi lait un iyisula ga long-egla kan Apudyus! Lappun makapakawan si byasuɏ ngim si Apudyus abus!”

22 Ngim laammuwan Jesus chi somsomokcha ot kalala kan chicha, “Puggey katlat chi somsomokyu? 23 Simma lagodgochong un ibyega, ‘Lapakawan cha byasuɏm,’ willu ‘Lumibbyatka ta malidchaɏanka’? 24 Allaya maligammuwanyu un Sakon un Alak chi Tagu, alla kalobbongak utla pita un mamakawan si byasuɏ.” Ot kalala si hachiʼn lapalalais, “Ibyegak kan sika, lumibbyatka, aɏam chi oboklu ya ingkan uwayu!” 25 Ot kakma lelibbyat siya si sangwalancha ot ilalikamla obokla ot ummoyon un lanchaychayaw kan Apudyus. 26 Laschaaw cha losan un langitullong ya ummogyatcha. Ot chilaychayawcha si Apudyus un kalancha, “Lappun miyisuwan chi intullong taku si salaʼn eɏgew.”

27 Oli pun lummawa si Jesus ot intullongla osaʼn manchachagup si bugis, un mangngachen Levi, ummaammuy si bubuggisan. Ot kalan Jesus kan siya, “Tun-ucholak.”‡ 5:27 Tun-ucholak - piolaʼn ibyega mitun-ud kan Jesus un mandisipulusla. 28 Ot lummibbyat si Levi, tilelala cha losan ot litun-ud kan Jesus.

29 Ot pileɏlusan Levi si Jesus ud byeɏoycha. Illinggew si hachi cha achu un biɏun Levi un manchachagup si bugis ya cha uchum boʼn taguʼn lakakan kan siya si lamisaan. 30 Sin-iingok cha Pariseo ya uchum un mimistulun chi lintog un inggew, ot kalancha kan cha disipulus Jesus, “Pakayuggey makakan ya makain-ilum kan cha manchachagup si bugis ya cha malagbyasuɏ?”

31 Ot silongbyatan Jesus chicha, un kalala, “Ha taguʼn lappun sakitla, achipunla masapuɏ chuktuɏ. Ngim ha makasapuɏ ked ha lasakit. 32 Achipulak ummaliʼn mangayeg kan cha singkalan un lalintogcha, ngim cha malagbyasuɏ ta mambyabyawicha.”

33 Illinggew bo cha uchum un taguʼn kalancha kan Jesus, “Cha disipulus John mallauncha lu sin-udchuman ya malluwalucha ya katchi bo koon cha uchum un disipulus cha Pariseo, ngim puggey cha disipuluslu manga-mangan ya umilu-ilum?”

34 Ot inyalig Jesus un summongbyat kan chicha un kalala, “Ha kalanyu lin un mallaun cha bubuɏun chi leɏakiʼn mangkaseɏ lu awed cha kan siya? Mangancha bò amin. 35 Ngim gumatong chi timpu un miyachayu likaseɏ kan chicha, ked hachi asicha mallaulan.”

36 Kasin lan-alig si Jesus kan chicha, un kalala, “Lappun tagù pumissay si paat un luput si baruʼn silup ked intekupla si chachaan un silup, ti yam-alola baruʼn silup ya achipun miyapot chi baruʼn luput un mantekup si chachaan un silup. 37 Willu lappun bo mangigga si ilabuyuʼn byeyas si chachaan un giledchang un iiggaan§ 5:37 Cha Judio iggacha grape juice willu byeyas si giledchang un iiggaan. ti bumtak chi hachiʼn chachaan un giledchang ked misuyat chi byeyas ya mayam-an chi gedchang. 38 Ngim ha ilabuyuʼn byeyas, maigga si baruʼn giledchang un iiggaan. 39 Ha ummingsa si chachaan un byeyas, issala ilabuyuʼn byeyas ti kalala lu, ‘Lapippiya chachaan.’ ”