1 Labunyagen pun si Jesus, tilelala hachiʼn chewwang un Jordan. Ot ha Ispiritun Apudyus un inggew kan siya, impuyutla siya si lugeɏʼn lappun ummili. 2 Udchi lalubsubyen Satalas kan Jesus si ulog chi opatpuɏuʼn eɏgew. Si hachiʼn timpu, achipun langan si Jesus inggalad lagamput ot labitin.

3 Ot kalan Satalas kan siya, “Lu tuttuwaʼn Alak chika kan Apudyus, ibyegam kan cha allaʼn byetu ta mambyalincha tilapay.”

4 Ot silongbyatan Jesus siya, “Liigili si ugud Apudyus un, ‘Chakampun si makan abus chi ikatagun chi tagu.’ ”* 4:4 Deuteronomy 8:3

5 Ot impuyut Satalas si Jesus si langatu un lugeɏ ya achipun asampiga ot ilaminla impaila kan siya cha losan un mampangatan utla lubung. 6 Ot kalala kan siya, “Idchok kan sika kalobbongan un mangituray si losan un ili ya kilabyaklangcha. Ti laatod losan kan sakon ked makwaʼn idchok lu silu piok un mangidchen. 7 Ked lu mampalintumingkaʼn manchayaw kan sakon, idchok losan kan sika ta mangkuwam.”

8 Ot silongbyatan Jesus un kalala, “Liigili si ugud Apudyus un, ‘Chayawom si Apu un Apudyuslu ya siya abus chi mansimbiyam.’ ”† 4:8 Deuteronomy 6:13

9 Oli pun impuyut Satalas si Jesus ud Jerusalem ot pilasikedla si salimpatuk chi templo. Ot kalala kan siya, “Lu tuttuwaʼn Alak chika kan Apudyus, lumayugka, 10 ti liigili si ugud Apudyus un ‘Bililon Apudyus cha anghelesla ta ayyuwalan chika.’ 11 Ked liigili bo un, ‘Tapayaon chika, ta ulay chi chepanlu achipun masugat si byetu.’ ”‡ 4:11 v. 10-11, Psalm 91:11-12

12 Ot kalan Jesus kan siya, “Liigili boʼn, ‘Achim mangin-in-an si Apu un Apudyuslu.’ ”§ 4:12 Deuteronomy 6:16

13 Gilamput pun Satalas silubsub si Jesus, tilelala Jesus inggala gumatong chi kasin un timpuʼn mangwaala.

14 Langulin si Jesus ud Galilee, ot inggew chi kilabyelin chi Ispiritun Apudyus kan siya. Ked lanchilongeɏ chameg mipanggop kan siya si losan un mampalikwos un ili. 15 Lantudtuchu si cha sinagogacha un maup-uppulan cha Judio, ot chilaychayaw cha losan un tagu siya.

16 Oli pun ummoy si Jesus ud Nazareth un chummakeɏala, ot Sabyechu pun un man-illongan cha Judio, ummoy si sinagoga ti siya pin-ala koon. Ot summiked siya ta mambyasa si ugud Apudyus 17 un impuɏedcha kan siya. Ha allaʼn liblu inggilin propeta Isaiah si awi. Bilukyedla ot pililiyala byasaola. Ot bilasala,

20 Ot lilukut pun Jesus chi liblu, inyulinla si taguʼn langipuɏed kan siya, ot ummamuy. Ot losan cha taguʼn inggew si sinagoga intutukkeɏcha siya. 21 Ot kalan Jesus kan chicha, “Si salaʼn eɏgew latungpeɏ laoy un libyasan ugud Apudyus un chingngeɏyu.”

22 Laslas-om cha losan kan siya, ot laschaawcha si kilabiɏun chi ilugudla. Ot kalancha, “Chakampun kamman un alak Joseph siya?” O, siya. 23 Ot kalan Jesus kan chicha, “Kapilitan un ibyegayu kan sakon chi laoy un ug-uggud, ‘Chuktuɏ, palin-awaom chi long-eglu.’ Ti pionyu boʼn pakwa kan sakon utla ilik chi lakaskaschaaw un chingngeɏyuʼn killingwak ud Capernaum.”

24 “Tuttuwa ibyegak kan chikayu, un ha propeta achipun mapotgen si mismuʼn ilila. 25 Ya chongɏonyu: Achu cha kachegchegu un labyaɏu utla Israel si timpun Elijah un propeta, ti achipun ummuchen si tiɏuʼn tawon ya kagodwa, ot laamin lauɏat cha tagu udchi Israel. 26 Ngim chakampun si imbuun Apudyus si Elijah kan chicha ta tuɏungala chicha, ngim imbuunla siya ta tuɏungala osaʼn labyaɏu un iZarephath un sakup chi Sidon.† 4:26 v. 25-26, 1 Kings 17:1, 7-16 27 Ot si timpun bo Elisha un propeta, achu cha Judio ud Israel un laleprosy, ngim lappun lapalin-awa kan chicha malaksig kan Naaman un Gentil, un iSyria.”‡ 4:27 2 Kings 5:1-14

28 Chingngeɏn pun cha taguʼn inggew si sinagoga imbyegala, amod chi sangacha ti laawatanchaʼn chicha ug-ugguchola. 29 Lummibbyatcha ot liyaggicha siya illiyoycha si lasin chi ili un angit un ummiliyancha. Ha panggopcha pionchaʼn odchagon siya si angit. 30 Ngim gilagawan Jesus cha amod un tagu ot ummoyon.

31 Ot lan-osog si Jesus un umoy ud Capernaum, un osaʼn ili si probinsiya ud Galilee. Lantudtuchu kan cha tagu si Sabyechu un man-illongan. 32 Ot laschaaw cha taguʼn langngeɏ si in-ilolaʼn lantudtuchu, ti lantudtuchu un alla kalobbongala.

33 Si hachi, inggew chi osaʼn leɏakiʼn laaɏan ot impokawla un kalala, 34 “Sika Jesus un iNazareth, simma ga koom kan chikami? Ummalika un manyam-an kan chikami? Tagammuk sika, sika lappun byasuɏla un imbuun Apudyus.”

35 Ngim tilubngeɏn Jesus chi aɏan, un kalala, “Gumilokka! Ya wissedka kan siya.” Ot inchukmam chi aɏan chi leɏaki si sangwalan cha tagu ot tilelala un achipunla pilasigabyen siya.

36 Ot laschaaw cha losan un tagu ot kalan chi kacha osa, “Ay-ay, kaskaschaaw chi imbyegala. Alla kalobbongala ya kilabyelinla un mameɏyaw kan cha aɏan, ked tiluttuwacha siya.” 37 Ot lanchilongeɏ chameg mipanggop kan Jesus si losan un ili si hachiʼn lugeɏ.

38 Lummawa si Jesus si sinagoga ot ummoy si byeɏoycha Simon. Ha byebyaiʼn katugangan Simon ked amod chi palatingla. Ot imbyegacha kan Jesus ta tuɏungala siya. 39 Ot ummoy si Jesus si kuwetula ot summiked si cheeg chi uumbogela ot imbyegalaʼn makaan chi atungla, ot kakma lakaan. Bummangon ot pilakalala chicha.

40 Lummaschom pun, inggetong cha tagu cha kadwachaʼn lakalakalasi cha sakitcha kan Jesus. Ot intetepangla ilappachen chicha ot lummin-awa cha losan. 41 Lampeɏyaw bo kan cha aɏan un inggew kan cha achuʼn tagu, ot si ummoyolan cha aɏan, inyipkawcha un kalancha, “Sika alak Apudyus!” Ngim pilagilokla chicha ti tilagammucha un siya si Kristu un ingkarin Apudyus un umali.

42 Wiswisngit pun si labigat, lummibbyat si Jesus ot ummoy un ossaan si lugeɏʼn lappun tagù inggew. Ngim singsingngit cha tagu siya, ot inchesancha pun, tilawichen cha siya ta achi umoyon. 43 Ngim kalala kan chicha, “Masapuɏʼn inyak bo si cha uchum un ili ta inyak ibyegbyega bibiɏuʼn Chameg mipanggop si Mampangatan Apudyus, ti siya gapu un imbuulak kan Apudyus utla pita.” 44 Ot ummoy siya lambyegbyega kan cha tagu si sinagogan cha Judio ud Judea.